Gjimshiti me 3 pasaporta dhe 6 gjuhë të huaja

"Në Zvicër kemi bërë frëngjisht e anglisht në shkollë. Jam nga Cyrihu dhe atje flitet gjermanisht. Këtu bëra një muaj shkollë në italisht kur erdha. Pastaj është gjuha shqipe dhe serbo-kroatisht”, shprehet Gjimshiti

Mbrojtësi shqiptar, Berat Gjimshiti, ka shkëlqyer në ndeshjet e fundit tek Atalanta, duke bërë paraqitje shumë të mira.

Gjimshiti ka lindur në Cyrih, derisa ka prejardhje nga Lugina e Preshevës, përcjell albinfo.ch.

Në një intervistë për mediat italiane, ai ka zbuluar: “Flas 6 gjuhë, njërën jo aq mirë. Ndoshta isha pak më mirë në gjuhët e huaja se në gjërat e tjera në shkollë. Në Zvicër kemi bërë frëngjisht e anglisht në shkollë. Jam nga Cyrihu dhe atje flitet gjermanisht. Këtu bëra një muaj shkollë në italisht kur erdha. Pastaj është gjuha shqipe dhe serbo-kroatisht”, shprehet Gjimshiti, transmeton ‘Panorama-Sport’.

Por, në kombëtaren shqiptare flitet më shumë italisht, për shkak të trajnerëve. “Aty flasin të gjithë italisht, flitet vetëm italisht me stafin italian. Tani është Panucci, më parë ishte Tramezzani me De Biasin, të gjithë flasin italisht e kuptohet”, shton tutje mbrojtësi shqiptar.

Ai zbulon edhe diçka. “Kam nënshtetësi të trefishtë. E treta është serbe. Familja ime është e lindur në një vend në Serbi që ka vetëm shqiptarë, pak e vështirë ta shpjegoj. Kemi pasaportat serbe, por jemi shqiptarë. Kur ika nga moshat e Zvicrës te Shqipëria e di që janë mërzitur”, ka shtuar tutje mbrojtësi shqiptar.

 

---