Kurti thotë se po punojnë për rrëzimin e Qeverisë

Kryetari i Lëvizjes Vetëvendosje, Albin Kurti, ka deklaruar se zgjedhjet janë të domosdoshme për Kosovën që t’i hapet rrugë zhvillimit ekonomik, prodhimit e punësimit.

Kurti shprehet kategorikisht kundër propozimeve për një Qeveri gjithëpërfshirëse apo edhe teknike.

“Ne të Lëvizjes Vetëvendosje nuk udhëhiqemi nga parashikimet, por nga parimet. Ne dëshirojmë që të ketë sa më parë për interesin e vendit zgjedhje të parakohshme parlamentare, zgjedhje demokratike, nga të cilat do të dalin institucione me legjitimitet të freskët, edhe qeveri e re, e cila do t’i hapë rrugë zhvillimit ekonomik të vendit që koncentrohet në prodhim e punësimi dhe tek drejtësia institucionale dhe gjyqësore, e cila përqendrohet te luftimi i krimit e korrupsionit”, ka thënë Kurti për Ekonomia Online.

Kreu i VV-së thotë se me LDK-në janë duke bashkëpunuar për të siguruar numrat për rrëzimin e Qeverisë, por që nuk do të mbështesin asnjë iniciativë të Listës Serbe në këtë drejtim.