Brexit shtyhet deri më 31 tetor

Kryeministrja e Britanisë së Madhe, Theresa May dhe udhëheqësit e Bashkimit Evropian janë pajtuar dakord për shtyrjen e datës së Brexit-it, apo të daljes së Britanisë nga BE-ja, deri më 31 tetor.

Presidenti i Këshillit Evropian, Donald Tusk, pas samitit të Brukselit ka bërë të ditur se May ka rënë dakord me kushtet e BE-së për shtyrje.

Tusk e përshkroi marrëveshjen si “shtyrje fleksibile”, duke thënë se ajo nënkupton “gjashtë muaj shtesë për Mbretërinë e Bashkuar, për të gjetur zgjidhjen më të mirë të mundshme”.

Konkluzionet e Samitit të BE-së thonë se Britania “duhet të përmbahet nga çdo masë që i rrezikon projektet kyçe të BE-së”, përcjell albinfo.ch.

Ky kusht thuhet se synon të parandalojë Britaninë nga ushtrimi i fuqisë së vetos mbi iniciativat në Bruksel, gjatë periudhës shtesë për Brexit-in.

Udhëheqësit e BE-së planifikojnë të takohen sërish në qershor për të vlerësuar situatën.

Britania mund të largohet nga BE-ja para 31 tetorit, nëse May arrin të bindë shumicën në Parlamentin britanik që të mbështesë marrëveshjen për Brexit që ajo ka negociuar me BE-në, vitin e kaluar.