Thaçi kritikon UNMIK-un dhe EULEX-in që nuk kanë bërë asgjë për t`i ndëshkuar krimet serbe në Kosovë

Presidenti i Kosovës, Hashim Thaçi, gjatë pjesëmarrjes së tij në konferencën “Të gjithë së bashku me një zë”, të organizuar nga Bashkësia Islame e Kosovës, në mbështetje të të mbijetuarve të dhunës seksuale gjatë luftës së fundit në Kosovë, ka thënë se shteti serb është munduar ta zhveshë identitetin njerëzor me krimet që i ka kryer, raporton albinfo.ch.

“Serbia u mundua të na zhveshë nga identiteti njerëzor me krimet e kryera, sidomos ndaj shoqërisë civile, në veçanti ndaj motrave tona”, ka thënë ai.

Thaçi ka kërkuar nga të mbijetuarit e dhunës seksuale që të mos heshtin, por të flasin sikur Vasfije Krasniqi – Goodman.

Ai gjithashtu ka kërkuar nga shoqëria kosovare që të mos i stigmatizojë të mbijetuarat e dhunës seksuale, por ta mbështesë integrimin e tyre në shoqëri.

Në ndërkohë, i pari i shtetit kritikoi edhe misionet e huaja në Kosovë, si UNMIK-un dhe EULEX-in, që nuk kanë bërë asgjë për t’i dënuar kryesit e dhunës sistematike të ushtruar në Kosovë gjatë luftës së fundit.