Ambasada e SHBA-së: Prisni kushtetuesen për rezultatet

Shtetet e Bashkuara mirëpresin përfundimet e misionit vëzhgues të ODIHR-it, sipas të cilave zgjedhjet bashkiake të 30 qershorit u zhvilluan përgjithësisht në mënyrë të qetë dhe të rregullt, si dhe dhanë një vlerësim të përgjithshëm pozitiv për numërimin e votave.

Në një deklaratë për mediat, Ambasada e SHBA-së në Tiranë ndan të njëjtin mendim me misionin e ODIHR-it, se ngërçi dhe polarizimi politik kontribuan për zgjedhje, në të cilat votuesit nuk kishin një zgjedhje kuptimplotë.

Por pavarësisht pengesave, thotë Ambasada, populli shqiptar – qoftë ata që morën pjesë në zgjedhje, ashtu edhe ata që abstenuan – ushtruan të drejtën e tyre demokratike në mënyrë paqësore dhe ne i përgëzojmë për këtë.

Në këtë çast, Ambasada e SHBA-së u bën thirrje të gjithë udhëheqësve politikë që të respektojnë shtetin ligjor dhe të punojnë brenda institucioneve ngritura për të përcaktuar rrugën përpara për demokracinë shqiptare, përfshirë përparimin me reformat e rëndësishme zgjedhore të rekomanduara nga ODIHR.

Një mesazh specifik Ambasada e SHBA-së ka edhe për opozitës, e cila sot më së fundi i cilësoi zgjedhjet e paligjshme dhe nul.

“Ata që dëshirojnë të sfidojnë rezultatin e zgjedhjeve, mund të presin nga Gjykata Kushtetuese, e cila shpresojmë do të ngrihet së shpejti, me gjykatës të cilët kanë kaluar një proces rigoroz vetingu. Si gjithnjë, Shtetet e Bashkuara janë në krah të popullit shqiptar si një vend partner, një mik dhe një aleat”.

Në fund të deklaratës, Ambasada thekson se SHBA është e përkushtuar të ndihmojë për forcimin e shtetit ligjor dhe ndërtimin e një demokracie më të fortë dhe një të ardhmeje më të ndritur për të gjithë shqiptarët, shkruan OraNews, përcjell Albinfo.ch.