Kryebashkiakët e opozitës në Shqipëri nuk i lirojnë zyrat

Pas një takimi që kanë pasur me kreun e partisë, kryetarët e bashkive që janë drejtuar nga opozita në Shqipëri kanë thënë se nuk do t’i lirojnë zyrat e tyre.
Kryetari i Bashkisë së Kamzës, Xhelal Mziu, ka deklaruar se mbetet i vendosur për të mos liruar zyrën. “Vendimi është marrë, se datë 30 dhe zgjedhjet ishin të paligjshëm, e tregoi dhe pjesëmarrja”, ka thënë Mziu, përcjell albinfo.ch.

Edhe kryebashkiaku i Mallakastrës, Agron Kapllanaj, tha se zgjedhjet në 30 qershor ishin një farsë. Kapllanaj tha se kandidati i PS-së në Mallakastër është zgjedhur fitues me 13% të votave, aq sa janë militantë të PS-së në këtë zonë.

Ai tha se pret që të përballet me të më 13 tetor, duke e paralajmëruar se do të humbë me dyfishin e votave që mori në 30 qershor. Kjo ishte mbledhja e dytë e Bashës me kryetarët e bashkive të PD-së, pas asaj të një dite më parë.