Sonte në “Zürich Film Festival” shfaqet filmi “Drita” me Arta Dobroshin

Përveç sonte, filmi “Drita” do të shfaqet edhe më 2 tetor, ditë e mërkurë dhe më 6 tetor, e dielë, që është dhe dita e mbylljes së festivalit

Sonte, më 30 shtator, në kinemanë “Kosmos 1” të Cyrihut, me fillim në orën 18.15 shfaqet filmi “Drita”, që është një koproduksion SHBA-Kosovë. Filmi është pjesë e festivalit “Zürich Film Festival”, i cili këtë vit vjen me edicionin e tij të 15-të, jubilar.

Festivali ka filluar më 26 shtator dhe përfundon më 6 tetor.

Regjinë e filmit e ka bërë regjisori amerikan Daniel Kruglikov ndërsa në rolin kryesor paraqitet aktorja e shquar, Arta Dobroshi. Krahas saj janë edhe aktorët Genc Jakupi, Florist Bajgora etj.

Përveç sonte, filmi “Drita” do të shfaqet edhe më 2 tetor, ditë e mërkurë dhe më 6 tetor, e dielë, që është dhe dita e mbylljes së festivalit. Më 2 tetor jepet në Kino “RiffRaf 1”, ë orën 15.00 dhe të dielën në “RiffRaf2”, në orën 18.15, shkruan albinfo.ch.

Ngjarja e filmit vendoset në Kosovë ndërsa ka për temë hakmarrjen, dashurinë, dhunën, gjegjësisht rrethin e mbyllur që nis me një akt dhune…

Në shfaqjen e sontme pritet të marrin pjesë dhe të prezantohen para publikut edhe aktorët kryesorë dhe një pjesë e stafit.

---