Kurti: Qasja e LDK-së “merre ose lëre”, do të thotë “lëre”

Lideri i Lëvizjes Vetëvendosje është deklaruar pas propozimit të dërguar tek presidenti i vendit, Hashim Thaçi për mandatimin e tij si kryeministër i vendit.

Kandidati për kryeminister, Albin Kurti, së fundi ka sqaruar nëpërmjet një video-incizimi se Vetëvendosje ka dorëzuar letrën për vendimin e mandatarit për formimin e Qeverisë së Kosovës, pa arritur një marrëveshje me Lidhjen Demokratike të Kosovës, përcjell albinfo.ch.

Sipas tij, deri sot nuk është dorëzuar ky vendim te presidenti për shkak se e kanë pritur LDK-në që të arrijnë një marrëveshje për bashkëqeverisje.

“Në mbledhjen konstituive të Kuvendit më 26 dhjetor shkova pa pasur një marrëveshje, edhe te Presidenti më 6 janar shkova pa marrëveshje paraprake, dhe tani, dy javë pas atij takimi katër minutësh ende nuk kemi marrëveshje për qeverinë e re”, ka thënë Kurti në videon e publikuar pas vendimit që e ka dërguar në Presidencë.

Nëpërmjet kësaj video ai edhe një herë i ka bërë ftesë LDK-së që të merren vesh, pavarësisht se ishte VV e fundit që i refuzoi propozimet e partisë së Isa Mustafës.

 

https://www.facebook.com/albini2017/videos/188089132335119/

 

 

KY ËSHTË MESAZHI I PLOTË I KURTIT

 

Ne sot po e dërgojmë propozimin tonë me shkresë te Presidenti. Sekretarja jonë organizative, Vlora Haxhimehmedi, do ta bëjë këtë.

 

Ne nuk e kemi pranuar propozimin e fundit të drejtuesve të LDK-së por jemi treguar shumë të gatshëm për takime të mëtejme me synim gjetjen e alternativave tjera që do ishin të pranueshme për të dy palët.

 

E theksoj përsëri: nuk mund të kthehemi në të kaluarën, nuk mund të kthehemi në vitin 2019. Ata s’e kanë pranuar propozimin tonë të fundit, ndonëse, ndryshe nga dakordimi, nuk e trajtuan fare në Këshillin e tyre të Përgjithshëm. Qëndrimi se takohemi vetëm për ceremoninë e nënshkrimit të marrëveshjes, pra, qasja “Merre ose lëre”, do të thotë lëre.

Unë besoj se ne mund të kthehemi dhe e kemi detyrim ndaj të gjithë jush që të kthehemi në tavolinën e bisedimeve, për të mos dalë nga ajo deri në gjetjen e një gjuhe të përbashkët dhe arritjen e marrëveshjes sonë.

Ne, si Lëvizje VETËVENDOSJE! kemi marrë madatin ta bëjmë qeverinë që ju e dëshironi, e që vendit i duhet me aq urgjencë. As më shumë e as më pak.

E kemi filluar duke e çliruar nga kapja, udhëheqjen e Kuvendit: nuk është më aty ai Pronto kryeparlamentari që shante e kërcënonte nga foltorja, por kryetari i ri, Glauk Konjufca.

Unë besoj se ne mund të kthehemi e duhet të kthehemi në tavolinën e bisedimeve.

Në ditët në vijim do të takoj edhe përfaqësuesit e pakicave.

Ju falemnderit e mirupafshim.

---