Në Moskë shënohet rekord i rasteve të reja me Covid 19

Gjatë 24 orëve të kaluara, Moska i ka regjistruar 1,489 raste të reja të koronavirusit.

Kjo shifër paraqet rekord të ri ditor në kryeqytetin e shtetit me sipërfaqen më të madhe në botë. Numri i përgjithshëm i të infektuarve shkoi në 13,002.

Shifra e përgjithshme e të infektuarve me koronavirus në Rusi ka shkuar në 21,102, ndërsa 170 persona kanë vdekur, shkruan “Reuters”.

Autoritetet lokale të Moskës po përpiqen t’i riorganizojnë spitalet për shtimin e kapaciteteve për trajtimin e pacientëve me koronavirus. Megjithatë, duket se këto përpjekje nuk janë të mjaftueshme.

“Selia qendrore operacionale parashikon që klinikat shtetërore dhe private do të përballen me mungesë të shtretërve në dy ose tri javët e ardhshme, pavarësisht përpjekjeve për shtimin e kapaciteteve”, tha Departamenti i Shëndetësisë i Moskës.

Organet do t’i riorganizojnë 24 spitale të tjera dhe t’i sigurojnë gjithsej 21 mijë shtretër brenda 10 ditëve të ardhshme, thuhet në deklaratën e lëshuar të hënën.

Pavarësisht rasteve të reja, Rusia mbetet vend me numër relativisht të vogël të rasteve në krahasim me shtetet që kanë shifër të ngjashme të popullsisë, përcjell albinfo.ch.

---