Kosovë: Rreth 500 profesionistë shëndetësorë preken nga COVID-19

Foto: SHSKUK

Koronavirusi në Kosovë ka prekur në masë të madhe edhe stafin shëndetësor.

Aktualisht rreth 500 profesionist shëndetësor janë infektuar me këtë virus, ku 120 prej të cilëve janë mjekë.

Kjo ka nxitur diskutime në publik se nëse numri i të infektuarve vazhdon me ketë trend, nuk dihet nëse do të kemi mjekë e infermierë për t`u dalë në ndihmë të gjithë pacientëve të prekur nga COVID-19.

Ndonëse çdo ditë është sfidë për ta, e secilën orë e kalojnë duke u kujdesur për pacientët e prekur me Covid – 19, heronjtë e ditëve të sotme, mantelbardhët, edhe vetë po përballen direkt me virusin vrastar.

Një gjë të tillë e ka konfirmuar për Kallxo.com Blerim Delija, nënkryetar i Federatës së Sindikatave të Shëndetësisë së Kosovës (FSSHK), i cili vlerëson se nëse shtimi i rasteve të reja me koronavirus vazhdon të shtohet, sistemi shëndetësor kosovar mund të kolapsojë, përcjell albinfo.ch.

“Numri i punëtorëve shëndetësorë të infektuar me Covid-19 deri më tash ka arritur në 480-500. Vlerësoj se çrregullimet e mëdha nga numri i madh i pacienteve me Covid-19 mund të sjellin në kolaps sistemin shëndetësor për shkak të resurseve humane”, ka thënë Delija.

Ndonëse në Kosovë, sipas Deliut, mungonë stafi mjekësor i kualifikuar që mund t’i trajtojë pacientët e prekur me Covid–19, problem edhe më i madh, sipas tij, paraqet fakti se ky numër po shkon duke u ngushtuar.

Kjo pasi që vetëm në javën e kaluar janë infektuar me koronavirus 14 mjekë.

“Në krejt Kosovën numri i infektologëve, pulmologëve dhe i anesteziologëve është shumë i vogël, kur kihet parasysh se vetëm javën e kaluar kanë rezultuar të infektuar me Covid-19 14 mjekë dhe teknikë të Klinikës së Anesteziologjisë. Ky është problem shumë i madh”, ka thënë tutje Delija.

Duke bërë thirrje për respektim të masave, mes tjerash Delija ka thënë se klinikat po përballen edhe me mungesa të aparateve të ventilimit, e që aktualisht, sipas tij, klinikat në shfrytëzim i kanë vetëm 120 aparate të tilla.