Qeveria e Shqipërisë merr 650 milionë euro borxh

Bëhet e ditur se Shqipëria ka finalizuar marrëveshjen për marrjen e huasë së katërt në tregjet ndërkombëtare, duke emetuar Eurobondin e ri 10-vjeçar. Republika e Shqipërisë doli në tregjet ndërkombëtare financiare me një obligacion ndërkombëtar të ri 10-vjeçar në vlerën prej 650 milionë €, me një kupon prej 3.50%, me interes 3.75%, përcjell albinfo.ch.

Procesi u drejtua nga zv. kryeministri  Arben Ahmetaj dhe ministrja e Financave dhe Ekonomisë,  Delina Ibrahimi. Referuar njoftimit zyrtar të qeverisë, investitorët kanë shprehur interes në ofertat, të cilat që kaluan 1.8 herë vlerën e kërkuar. Qeveria vlerëson se ky ishte një test real për ekonominë shqiptare, që rikonfirmon besimin e tregjeve në qëndrueshmërinë e ekonomisë shqiptare edhe në kohë të vështira, pas goditjes së tërmetit dhe pandemisë.

Kjo është hera e katërt që Shqipëria u drejtohet për hua tregjeve ndërkombëtare të kapitalit, duke pasuar emetimet e mëparshme të realizuara në vitin 2015 dhe 2018 dhe 2020. Edhe kësaj radhe u arrit financimi me po të njëjtin kupon si në vitin 2020, por këtë herë me një afat maturimi 10-vjeçar. Marrja e e kësaj huaje e rrit nivelin e borxhit publik në vend në mbi 80 për qind të Prodhimit të Brendshëm Bruto.