Njësia Speciale vendoset në veri të Kosovës

Autoblinda të Njesisë Speciale të Kosovës janë parë afër Zveçanit

Forca të shtuara të Policisë së Kosovës janë vendosur në rrugën për Jarinje, raporton T7, përcjell Albinfo.ch.

Njësia Speciale po monitoron aty situatën, një ditë pasi Kosova ndaloi mbajtjen e referendumit serb në Republikën e Kosovës.

Kujtojmë se sot në orët e mëngjesit një grup i qytetarëve serbë ishin tubuar për të kundërshtuar kështu moslejimin e mbajtjes së referendumit serb në Kosovë.

Policia ka deklaruar se tubimi ka përfunduar pa incidente, derisa ka bërë të ditur se për në orën 12:00 është paralajmëruar mbajtja e një proteste tjetër.

Në këtë tubim prezent ishte edhe kryetari i Listës Serbe, Goran Rakiq, deputeti Igor Simiq, si dhe kryetarët e komunave veriore të vendi.

Rakiq tha se do të vendosin reciprocitet në veri të vendit nëse Qeveria e Kosovës nuk e lejon mbajtjen e zgjedhjeve serbe të 3 prillit.

Deputetët e Kuvendit të Kosovës të shtunën (15 janar) kanë miratuar një rezolutë që shpreh kundërshtimin që në Kosovë të mbahen votime për një referendum të shtetit të Serbisë për ndryshime kushtetuese.

Sipas rezolutës, mbajtja e referendumit të Serbisë në Republikën e Kosovës “cenon sovranitetin dhe rendin kushtetues të Republikës së Kosovës, është në kundërshtim me Kushtetutën, ligjet e Republikës së Kosovës, si dhe me normat e praktikat ndërkombëtare”.

---