Eksportet e Kosovës në Gjermani, në vlerë 82 milionë euro

Produktet kryesore që eksportoi dhe importoi Kosova me Gjermaninë gjatë vitit 2022

Kosova dhe Gjermania janë duke thelluar bashkëpunimin gjithnjë e më shumë nga viti në vit, përcjell albinfo.ch.

Vlen të theksohet se Gjermania është ndër partnerët më të rëndësishëm tregtarë të vendit tonë, ku sipas të dhënave të Doganës, është partneri i dytë i Kosovës sa u përket importeve.

Shteti gjerman plotësoi rreth 11 për qind të importeve të Kosovës gjatë vitit 2022.

Kosova më së shumti nga Gjermania importon vetura dhe makineri të tjera të transportit, derisa vend të rëndësishëm zënë edhe medikamentet e ndryshme mjekësore dhe duhani.

Nga ana tjetër, Kosova në Gjermani gjatë vitit 2022 eksportoi mallra në vlerë rreth 82 milionë euro, apo 9.5 për qind e vlerës së përgjithshme të eksporteve.

Produktet kryesore që bizneset tona eksportuan në gjermani janë dyer, dritare, mobilie. Një vend të rëndësishëm në eksportet e Kosovës në Gjermani zunë edhe bimët mjekuese aromatike, transmeton talegraf.

Miliona euro bizneset e Kosovës kanë fituar duke importuar speca në Gjermani gjatë vitit që sapo lamë pas.

 

Eksportet e Kosovës në Gjermani – 82 milionë euro

 

1. Dyer, dritare dhe skeletet e tyre – 24.5 milionë euro
2. Mobilie – 3.1 milionë euro
3. Grilla, rrjete dhe gardhe – 3.9 milionë euro
4. Bimë mjekuese aromatike (Ephedra) – 2.5 milionë euro
5. Dyshekë, jorganë e jastëkë – 2.5 milionë euro
6. Artikuj prej plastike – 2 milionë euro
7. Speca të freskëta dhe konservuara – 1.8 milionë euro
8. Paleta për mallra – 1.5 milionë euro
9. Pije freskuese – 1 milionë euro
10. Preparate për fasada, mure dhe tavane – 960 mijë

 

Importet e Kosovës nga Gjermania – 605 milionë euro

1. Vetura dhe goma – 207.5 milionë euro
2. Shufra, shkopinj, profile – 35 milionë euro
3. Automjete transporti të rënda – 32.7 milionë euro
4. Medikamente – 17.1 milionë euro
5. Cigare – 15.1 milionë euro
6. Djathëra të ndryshëm – 14.4 milionë euro
7. Autobusë – 7.9 milionë euro
8. Kos me fruta – 7.8 milionë euro
9. Shampona – 2.7 milionë euro
10. Deodorantë – 2.5 milionë euro

 

Vlen të përmendet se Republika Federale e Gjermanisë është prej donatorëve më të mëdhenj të Kosovës që nga paslufta.

Shtetet e Bashkuara të Amerikës për eksport të produkteve dhe Turqia për importin e tyre, janë partnerët kryesorë tregtarë të Kosovës gjatë vitit 2022.

Dogana e Kosovës thotë se të hyrat e mbledhura për në vitin 2022 ishin 1 miliard e 531 milionë euro apo 11.23 për qind më shumë.

Vlera e mallrave të importuar është 5 miliardë e 603 milionë euro apo 20 për qind më shumë se vitin paraprak, ndërsa vlera e mallrave në eksport ishte 869.5 milionë euro.

Rritja e gjithëmbarshme krahasuar me vitin paraprak për nga vlera është 22 për qind më shumë se në vitin 2021 ku vlera e mallrave në eksport ishte 712.8 milionë euro.

---