Mbledhja komemorative në nder të Nazmi Mikullovcit

Foto: Zyra e Kryeministrit te Kosoves

Nën udhëheqjen e Kryeministrit të Kosovës, Albin Kurtit është mbajtur mbledhja përkujtimore për Nazmi Mikollovcin. Para familjarëve, miqve e bashkëpunëtorëve, Kurti nderoi jetën dhe veprën e Mikullovcit.

“Njeriu mund të jetë i zëvendësueshëm për thuajse gjithë gjërat që i bën, por njeriu kurrë nuk mund të zëvendësohet për atë që ai është. Nazmiu, me kujtimet e takimeve me të, por mbi të gjitha me punët e kontributet e tij si profesionist drejtues i nivelit të lartë, në këtë kuptim, është i pazëvendësueshëm për ne, në zemrat tona”, është shprehur kryeministri.

U vlerësua e çmua lartë kontributi i Nazmi Mikollovcit në fushën e ekonomisë si dhe u vlerësua si figurë e rëndësishmë për Kosovën. “Unë nuk njoh njeri të lindur për drejtor sikurse Nazmiun. Do të na duhen shumë e shumë vjet për të sjellur në ekonominë e Kosovës një figurë publike që është drejtor si ai, që drejton si ai. Vdekja e Nazmi Mikullovcit është vdekja e Drejtorit”, është shprehur tutje Albin Kurti.

Me fjalë rasti në këtë mbledhje komemorative u drejtuan edhe Mentor Mikullovci, djali i të ndjerit, si dhe Kryesuesi i Bordit “Trepça” Sh.A.,  z. Bahri Hyseni, Zëvendëskryesuesja e Bordit të AKP-së, znj. Suzana Dautaj- Surdulli dhe Kryesuesi i Bordit “Ibër Lepenci”, z. Bajram Mustafa, ndërkaq në pamundësi për të qenë i pranishëm për shkaqe shëndetësore me një letër u drejtua Akademik Mynir Dushi.