Presidentja e Kosovës nesër flet në Këshillin e Sigurimit të OKB-së

Foto FB: Presidenca e Republikës së Kosovës

Presidentja e Kosovës, Vjosa Osmani, ka udhëtuar drejt Nju-Jorkut, ku në Këshillin e Sigurimit të Organizatës së Kombeve të Bashkuara do të flasë për zhvillimet politike dhe të sigurisë në Kosovë, pas sulmit të 24 shtatorit, shkruan albinfo.ch.

“Në këtë takim të Këshillit të Sigurimit, Presidentja Osmani do të flasë për zhvillimet politike dhe të sigurisë në Kosovë, pas sulmit terrorist dhe aktit të agresionit të Serbisë ndaj Kosovës, më 24 shtator. Ndër të tjera, Presidentja Osmani do të flasë edhe për përkushtimin e institucioneve të Republikës për paqe, siguri dhe stabilitet afatgjatë në rajon, si dhe për bashkëpunimin e ngushtë me aleatë e partnerë të Kosovës”, thuhet në njoftimin nga Presidenca e Republikës së Kosovës.

Sipas njoftimit, para takimit të Këshillit të Sigurimit, Presidentja pritet të takohet dhe të koordinohet me disa nga përfaqësuesit e shteteve aleate.

Ndryshe, takimi i Këshillit të Sigurimit të Kombeve të Bashkuara për Kosovën do të mbahet nesër nga ora 21:00 me kohë të Kosovës, ndërkaq në orën 15:00 me kohë të New York-ut.