291 minatorë kërkojnë ndihmë mjekësore

Minatorët e Trepçës kanë hyrë në ditën e tetë të grevës dhe gjendja e tyre shëndetësore po përkeqësohet.

Minatori Asllan Osmani bëri të ditur se sipas evdinacave që mbajnë, deri të hënën 291 minatorë kanë kërkuar ndihmë mjekësore.

“Deri dje janë trajtuar 291 minatorë, është evidenca edhe tek kujdestaria jonë mjekësore, ne e kemi edhe teknikun tonë mjekësor, tash iu ka bashkëngjit edhe emergjenca e Mitrovicës qysh nga dita e parë. 291 minatorë janë trajtuar me raste duke filluar nga më e rënda deri tek më e lehta, ka me tension shumë të lartë, të cilëve edhe iu është ndaluar rreptësisht që të lëshohen në minierë”, ka thënë për ekonomiaonline.

Ai ka përsëritur kërkesat e minatorëve.

“Kërkesat tona janë kërkesa minimale, të cilat nuk duhet përmendur. Ai (kryeshefi) të kishte ndjenja njerëzore, nuk kishte qëndruar në atë vend. Por, ai është shkatërrues dhe ai nuk e do Trepçën në asnjë minutë, sepse nëse vetëm e kishte dashur, do të ishte dorëhequr dhe Trepça kishte punuar. Ne nuk do ta lajmë me u fundos Trepça, ne kemi me e ringritë prapë, por nëse nuk hiqet ai, ne nuk mundemi me i ngrit. Nëse hiqet ai, Trepça ngritet, nëse nuk hiqet ai, Trepça fundoset”, shton ai, përcjell albinfo.ch.

Minatorët do të vazhdojnë me grevën deri në largimin e kryeshefit të Trepçës.