Qeveria e Kosovës organizon udhëtimin e parë pa viza

Ilustrim, Pixabay

Qeveria e Kosovës do të organizojë udhëtimin e parë pa viza për fituesit me fat nga kuiz-i i Bashkimit Evropian.

Sipas njoftimit për media, ngjarja do të mbahet më 1 janar 2024 në Aeroportin e Prishtinës “Adem Jashari” (Terminali kryesor).

“Me këtë rast, Kryeministri i Republikës së Kosovës, Albin Kurti dhe zëvendëskryeministrja, njëherësh ministrja e Punëve të Jashtme dhe Diasporës, Donika Gërvalla-Schwarz, do të urojnë dhe përshëndesin qytetarët e parë që do të udhëtojnë pa viza, dhe do të mbajnë konferencë për media”, ka njoftuar Qeveria.

Nga 1 janari i vitit 2024, qytetarët e Kosovës do të fitojnë të drejtën e udhëtimit pa viza në atë që njihet si zona Schengen, e përbërë prej 27 shtetesh, shumica e tyre anëtare të Bashkimit Evropian.

Udhëtimet pa viza duhet të shërbejnë kryesisht për vizita turistike apo familjare dhe assesi për qëllime punësimi. /Telegrafi