SHSKUK: Mjetet shpërthyese janë të kohës së paraluftës

Shërbimi Spitalor Klinik Universitar i Kosovës ka bërë të ditur se dyshohet se mjetet shpërthyese që u gjetën në QKUK janë të kohës së paraluftës.

“Mjetet dyshohet të jenë nga koha e paraluftës dhe janë gjetur gjatë inventarizimit të inventarit nga Oda e Mjekëve”, thuhet në njoftimin e SHSKUK-së.

Rreth orës 14:00, Policia e Kosovës u njoftua për mjete shpërthyese në afërsi të Klinikës së Patologjisë në Qendrën Klinike Universitare të Kosovës. Stafi u evakuua nga ndërtesa dhe njësitet e specializuara të Policisë së Kosovës rrethuan zonën për ta pastruar.