Kurti shkon për ngushëllime në familjen e 18-vjeçarit që u rrah deri në vdekje

Shpejtim Bulliqi, FB

Kryeministri i Kosovës, Albin Kurti bashkë me ministrat, Albulena Haxhiu (Ministre e Drejtësisë) dhe Xhelal Sveçlën (Ministër i Punëve të Brendshme) dhe kryetarin e komunës së Podujevës, Shpejtim Bulliqin kanë shkuar për vizitë në familjen e 18-vjeçarit që u rrah për vdekje nga dy bashkëmoshatar.

“Bashkë me kryeministrin Albin Kurti, ministrat Albulena Haxhiu dhe Xhelal Sveçla, deputetin Fitim Haziri, veprimtarin dhe ish-kryetarin e Komunës Ilaz Pireva, drejtorë komunal dhe zyrtarë të tjerë ishim për ngushëllime tek familja Fejzullahu për humbjen e familjarit të tyre Lulzimit, pak ditë më parë në vrasjen mizore që e tronditi gjithë shoqërinë. Ndamë dhimbjen me familjen dhe të afërmit, si dhe ju shprehëm mbështetjen tonë të plotë për tejkalimin e kësaj dhimbjeje që na pikëlloi thellësisht të gjithëve. Zoti ju dhashtë durim e forcë familjes! Urojmë që drejtësia ta thotë fjalën e saj në mënyrë meritore!”, shkroi kryetari i Podujevës.

Të shtunën 20 janarit ka vdekur L.F., 18-vjeçar, i cili u rrah brutalisht më 14 janar në Podujevë.

Prokuroria Themelore në Prishtinë kishte njoftuar lidhur me rastin e dt. 15 janar 2024, në Podujevë, ku pas një përleshje fizike, dy të dyshuar (të mitur) e kanë goditur me një shkop viktimën (tashmë të ndjerin, 18 vjeç), duke i shkaktuar lëndime trupore, ku si pasojë e këtyre lëndimeve të marra, viktima është dërguar në QKUK për trajtim mjekësor, ndërsa po në të njëjtën ditë, me urdhër të Prokurorit të Shtetit, dy të miturit janë ndaluar për shkak të veprës penale ‘Vrasje në tetnativë’ (tashmë vrasje) dhe rasti ka filluar të trajtohet në Prokurorinë Themelore në Prishtinë.