Edhe Rexhep Selimit i largohet njëri nga avokatët kryesorë

Keystone EPA/Koen van Weel / POOL

Pas largimit të Gregory Keohe, avokatit kryesor të ish-presidentit të Kosovës, Hashim Thaçi, në procesin gjyqësor në Hagë, në bazë të një dokumenti të publikuar nga Dhomat e Specializuara të Kosovës, ish-deputetit Rexhep Selimi i është larguar një ndër avokatët kryesorë të tij, David Young.

Avokati kryesor i Selimit, Geoffrey Roberts, më 8 shkurt të këtij viti dërgoi një letër, ku njoftoi trupin gjykues se do t’ia ndërpresë kontratën si bashkëpunëtor David Young.

“Më 8 shkurt 2024 avokati i z. Selimi, z. Geoffrey Roberts, i dërgoi një letër shefit të Zyrës së Mbrojtjes, duke deklaruar se ai vendosi të ndërpresë punën e z. Young si bashkëpunëtor i z.Selimi me efekt të menjëhershëm”, thuhet në dokument.

Arsyet e largimit të tij nuk janë bërë ende të ditura, ndërkaq më 13 shkurt 2024 sekretari konfirmoi ndërprerjen e kontratës së zotit Young në përputhje me nenin 18(6) të udhëzimit për avokatët.