Vuçiq takon Lajçak, i tregon për “jetën e papërballueshme” të serbëve të Kosovës

Aleksandar Vuciq, Instagram

Emisari i Bashkimit Evropian, Mirsolav Lajçak këtë të premte është takuar me presidentin e Serbisë, Aleksandar Vuçiq me të cilin ka biseduar për rrugën tutje në dialog.

Megjithatë, Presidenti i Serbisë, Aleksandar Vuçiq, i është ankuar emisarit të Bashkimit Evropian për “jetën e papërballueshme” të serbëve në Kosovë.

“Kam biseduar me Miroslav Lajçakun për situatën në Kosovë dhe kushtet e papërballueshme për jetën e popullit tonë. Shqyrtuam mundësitë dhe temat për vazhdimin e bisedimeve konstruktive në Bruksel, si dhe hapat e nevojshëm për progres drejt normalizimit të marrëdhënieve ndërmjet Kosovës dhe Serbisë. Edhe një herë i kam bërë thirrje bashkësisë ndërkombëtare që konkretisht dhe me vendosmëri të angazhohet në çështje thelbësore të rëndësishme për mbijetesën e popullit serb në Kosovë dhe stabilitetin rajonal”, ka shkruar Vuçiq në rrjetin social në Instagram.

Më 19 mars në Bruksel, kryenegociatorët e Kosovës dhe Serbisë do të takohen në Bruksel.