Përgjysmë më pak investime të huaja

Sipas Bankës Qendrore të Kosovës (BQK), në fund të vitit të kaluar, investimet e huaja ishin 29.5 milion euro, ose 51 për qind më pak se në periudhën e njëjtë të vitit 2013

Në tremujorin e katërt të vitit të kaluar investimeve të huaja direkte (IHD) në Kosovë kanë rënë për 50 për qind, duke regjistruar kështu rënie të dukshme të shifrave investive. Sipas Bankës Qendrore të Kosovës (BQK), investimet ishin  29.5 milion euro, ose 51 për qind më pak se në periudhën e njëjtë të vitit 2013 që ishin rreth 45 milionë euro.

Bazuar në raportin e fundit të BQK-së, niveli më i ulët i IHD-ve në këtë tremujor krahasuar me periudhën e njëjtë të vitit paraprak ka ardhur si rezultat i tërheqjes së kapitalit në formë të super disidentes dhe kthimit më të lartë të kredive ndaj kompanive investuese.

Po ashtu sipas të dhënave të BQK-së, pozicioni i investimeve në letra me vlerë jashtë vendi, pa përfshirë letrat me vlerë në kuadër të aseteve rezervë, gjatë këtij tremujori është zvogëluar për 99.4 milionë euro po ashtu edhe asetet rezervë janë zvogëluar për 80.8 milionë euro, citon Zëri.

Ndërsa, borxhi i jashtëm bruto i Kosovës, sipas të dhënave të BQK-së, i cili përfshin borxhin publik dhe borxhin privat, në fund të dhjetorit 2014 shënuar vlerën prej 1.73 miliardë euro.

Borxhi publik ka një pjesëmarrje të ulët në gjithsej borxhin e jashtëm me rreth 23 për qind, gjendja e të cilit në fund të dhjetorit ishte 392.8 milionë euro. Pjesa më e madhe e borxhit publik përbëhet nga borxhi i jashtëm i Qeverisë, i cili në fund të dhjetorit 2014 ishte 326.4 milionë euro.

“Borxhi i sektorit privat në fund të dhjetorit 2014 shënoi vlerën prej 1.34 miliardë euro. Pjesa më e madhe e borxhit privat është në formë të kredive ndërmjet kompanive, që janë në relacion të investimeve direkte 719.9 milionë euro, pasuar nga borxhi i sektorëve tjerë të ekonomisë 390.1 milionë euro dhe huamarrjet e bankave komerciale 229.0 milionë euro”, thuhet në raportin e BQK-së.