Shqiptarët lanë gjurmë në shoqëritë arabe

Abedel Karim Arnaout shtroi nevojën për krijimin e një qendre kulturore shqiptare në Bejrut e cila, sipas tij, do të fillonte të ngjallte gjuhën shqipe tek shqiptarët në Lindje

Modeli i bashkëjetesës fetare tek shqiptarët mund të shërbej edhe si model në gjithë Lindjen e Mesme e cila po kalon kohë të vështira periudhën e fundit. Kështu konsideroi Abedel Karim Arnaout, udhëheqës i Qendrës Ndërkombëtare Shqiptare për Kulturë dhe Art në Bejrut të Libanit.

Arnaut ishte panelist në debatin me temën “Shqiptarët në botën arabe” organizuar në Stamboll nga Qendrën Kulturore e Republikës së Kosovës në Turqi.

Ky debat u mbështet nga Ministria e Diasporës, ku ishte i pranishëm edhe ministri Valon Murati, konsulli i Përgjithshëm i Republikës së Kosovës Rrahim Morina, drejtori i Qendrës Kulturore, Qamil Bytyqi si dhe përfaqësues të diasporës shqiptare në Stamboll, studentë, por edhe shqiptarë me prejardhje nga bota arabe.

Panelisti Arnaout, familja e të cilit ishte vendosur në Bejrut që në shekullin e 18-të, foli për shpërndarjen e shqiptarëve në botën arabe, por edhe për rolin e rëndësishëm që kanë luajtur shqiptarët në procesin e shtet-ndërtimit jo vetëm të Egjiptit, por edhe në Liban dhe shtetet e të tjera arabe.

Duke folur për përkatësitë e ndryshme fetare të shqiptarëve në Liban, ai theksoi se modeli i bashkëjetesës fetare tek shqiptarët mund të shërbej edhe si model jo vetëm për Libanin dhe kontekstin e tij divers fetar, por edhe për tërë Lindjen e Mesme e cila po kalon kohë të vështira.

Ai gjithashtu shtroi nevojën për krijimin e një qendre kulturore shqiptare në Bejrut e cila do të fillonte të ngjallte gjuhën shqipe tek shqiptarët atje.

Ministri i Diasporës, Valon Murati theksoi se diaspora shqiptare në botën arabe është e veçantë, dhe ndonëse janë humbur kontaktet dekadave të fundit, duhet të punohet që të rivendosen urat e komunikimit. Sië thuhet në njoftimin e MeD, Murati e ka vlerësuar të rëndësishëm rolin e tyre në historinë shqiptare, por edhe në shoqëritë arabe.

“Shqiptarët e botës arabe mund të shërbejnë si një urë lidhëse në mes të arabëve dhe shqiptarëve dhe se ky komunitet mund të luaj rol të rëndësishëm në njohjen e Kosovës nga shtetet arabe që nuk e kanë njohur Kosovën”, ka thënë Murati, raporton Albinfo.Ch.