Aeroporti i Prishtinës garon për më të mirin e Evropës

Aeroporti “Adem Jashari” në Prishtinë garon për aeroportin më të mirë në Evropë në disa kategori. Për ta fituar këtë çmim, ANP duhet të mbledhë më tepër vota se rivalët

Foto ilustrim

Aeroporti Ndërkombëtar i Prishtinës “Adem Jashari” është nominuar për aeroportin më të mirë evropian. Për ta fituar këtë çmim, ANP duhet të mbledhë më tepër vota se rivalët e futur në këtë kontest. Një gjë e tillë mund të bëhet deri më 26 korrik, duke hapur një llogari me të dhëna personale në uebfaqen World Travel Awards.

“Kjo uebfaqe zgjedh kompanitë dhe bizneset më të mira në sektorë të ndryshëm të industrisë së turizmit. Në kuadër të World Travel Awards ka çmime në disa kategori, ku ndarja është bërë në bazë të kontinenteve”, thuhet në njoftimin e Aeroportit Adem Jashari.

Sipas të njëjtit njoftim, ndarja e çmimeve bëhet për: Aeroportin më të mirë i klasit të biznesit; Aeroporti më i mirë i klasit ekonomik; Aeroporti më i mirë i klasit të parë;  Linja ajrore më e mirë për kosto më të ulët; dhe Kompania më e mirë e dhënies me qira të veturave e disa të tjera.