Video: Koncert madhështor i pavarësisë i organizuar nga Konsullata e Përgjithshme e Republikës së Kosovës në Gjenevë

Në një atmosferë festive, ku glamuri dhe klasi par ekselansë u ndërthurën natyrshëm me elegancën e sallës prestigjioze Victoria Hall në Gjenevë, arti shqiptar u prezantua përmes interpretimit brilant të tenorit Rame Lahaj dhe sopranos Marigona Qerkezi .

Koncerti i organizuar nga Konsullata e Përgjithshme e Republikës së Kosovës në Gjenevë u shndërrua në një manifestim solem, me një audiencë prej mbi 1000 të pranishmish, duke reflektuar në mënyrë dinjitoze shpirtin kulturor, diplomatik dhe ndërkombëtar të Kosovës. Emocionet artistike kulmuan me ovacione dhe duartrokitje të gjata, duke krijuar një rezonancë të fuqishme me publikun e mërgatës shqiptare në Zvicër.

Videoja përcjell gjithashtu impresionet e Konsulles së Përgjithshme, zonjës Floreta Kabashi-Ademaj si dhe të diplomatëve të pranishëm, duke e ngritur këtë ngjarje përtej një koncerti në një manifestim përfaqësues dhe mbresëlënës të shënimit të 18-vjetorit të Pavarësisë së Kosovës në skenën ndërkombëtare.