Themeluesi dëshiron që Forumi Ekonomik Botëror të mbetet në Zvicër

Ai gjithashtu ka propozuar që toka ku ndodhet selia e fondacionit të WEF në Cologny pranë Gjenevës t’i transferohet shtetit, ndërsa fondacioni të ruajë të drejtën e përdorimit për gjithë jetën

Themeluesi i World Economic Forum, Klaus Schwab, ka deklaruar se dëshiron që forumi të vazhdojë të mbahet në Zvicër, duke theksuar se një platformë neutrale ka nevojë për një vend neutral si Zvicra.

Në një intervistë për gazetën Neue Zürcher Zeitung, Schwab tha se është e rëndësishme që forumi dhe fondacioni që ai themeloi të mbeten të lidhur me Zvicrën dhe me qëllimin e tyre fillestar, transmeton albinfo.ch.

Ai gjithashtu ka propozuar që toka ku ndodhet selia e fondacionit të WEF në Cologny pranë Gjenevës t’i transferohet shtetit, ndërsa fondacioni të ruajë të drejtën e përdorimit për gjithë jetën.

Kjo, sipas tij, do ta mbronte pronën nga spekulimet në tregun e pasurive të paluajtshme.

Schwab shtoi se për të, Davos ka qenë gjithmonë simboli i një “fshati global”, ndaj mbetet vendi ideal për takimin vjetor të forumit ku mblidhen liderë politikë, ekonomikë dhe akademikë nga e gjithë bota.

---