Kosovë-Austri, marrëveshje për arsim e kulturë

Zëvendëskryeministri Thaçi dhe ministri i Jashtëm, Kurz kanë nënshkruar marrëveshje për bashkëpunim Kosovë-Austri në shkencë, hulumtim, arsim dhe art

Zëvendëskryeministri dhe njëherit ministri i Punëve të Jashtme i Republikës së Kosovës, Hashim Thaçi dhe ministri i Jashtëm austriak, Sebastian Kurz, kanë nënshkruar në Vjenë  marrëveshjen për bashkëpunim institucional në shkencë, hulumtim, arsim dhe në të gjitha fushat e artit.

Para nënshkrimit të marrëveshjes, ministri Kurz priti në drekë zyrtare  zëvendëskryeministrin Thaçi, i cili e njoftoi homologun austriak për të arriturat e Kosovës në rrugëtim e saj drejt Bashkimit Evropian. Thaçi kërkoi që ky progres të njihet nga BE-ja.

“Është qenësore që BE sa më parë të nënshkruajë MSA-në me Kosovën dhe të rekomandojë liberalizimin e vizave për qytetarët e Kosovës”, u shpreh Thaçi, duke theksuar se edhe vet autoritetet e BE-së tashmë e pranojnë që Kosova i përmbushur të gjithë kriteret edhe për MSA-në edhe për liberalizimin e vizave.

Zëvendëskryeministri Thaçi falënderoi ministrin Kurz për mbështetjen e tij dhe të shtetit austriak dhënë Kosovës dhe e ftoi që Austria të vazhdojë të përkrahë Kosovën, me theks të veçantë në synimin për t’u anëtarësuar në UNESCO dhe Interpol, thuhet në një njoftim të MPJ-së, transmeton Albinfo.Ch.

Shefi i diplomacisë austriake, Kurz e përgëzoi zëvendëskryeministrin Thaçi për lidershipin politik në procesin e dialogut dhe në promovimin e dialogut dhe bashkëpunimit në rajon dhe u zotua se vendi i tij mbetet një avokat i fuqishëm i Kosovës në rrugën e saj drejt BE-së.