Bota

Jep dorëheqje ambasadori amerikan në Rusi

Jon Huntsman Jr, ambasadori amerikan në Rusi ia paraqiti Presidentit Donald Trump dorëheqjen, duke sinjalizuar përfundimin e mandatit të tij dy vjeçar.

Në letrën e tij zoti Huntsman falënderon presidentin për “besimin e treguar për të shërbyer si ambasador i Shteteve të Bashkuara në Rusi gjatë kësaj periudhe marrëdhëniesh të vështira dypalëshe”, siç shkruan ai.

Dorëheqja hyn në fuqi më 3 tetor.

Zoti Huntsman, anëtar i Partisë Republikane, la detyrën e guvernatorit të shtetit të Jutas në 2009-n, kur ish-Presidenti Barack Obama e emëroi atë si ambasador në Kinë. Një vit më parë ai ishte rizgjedhur për një mandat të dytë si guvernator.

Presidenti i Dhomës së biznesit të qytetit Salt Lejk, i cili ka punuar me zotin Huntsman kur ai ishte guvernator, tha se ai planifikon të kthehet në shtetin e tij dhe se, sipas njoftimeve, po sheh mundësinë për të kandiduar sërish si guvernator.

Agjencia shtetërore ruse e lajmeve “Tass” citoi një zëdhënës të Ministrisë së Jashtme, i cili vlerëson profesionalizmin e zotit Huntsman, por shton se “situata e brendshme politike në SHBA e bëri të pamundur zhvillimin e plotë të lidhjeve dypalëshe”.

Rrjeti televiziv CNN njoftoi se presidentët e të dy vendeve diskutuan rreth nevojës për një ambasador të ri amerikan në Rusi gjatë një telefonate të zhvilluar javën e kaluar. Por sipas CNN-it, dy udhëheqësit nuk kishin përmendur ndonjë emër për zëvendësimin e zotit Huntsman.

Jon Huntsman ka shërbyer gjithashtu si ambasador i SHBA-së në Singapor në fillim të viteve 1990 si dhe si zëvendës përfaqësues për tregtinë gjatë administratës së ish-presidentin George W. Bush, raporton Voa.