Arrin në 7503 numri i të vdekurve në Itali, 683 në 24 orët e fundit

Rritja është përsëri paksa më e butë në krahasim me ditën e djeshme. Të kujtojmë: të martën qenë raportuar 743 vdekje të reja

Në Itali, nga fillimi i shpërthimit të pandemisë deri më sot 7.503 njerëz kanë vdekur nga koronavirusi. Ndërkaq, brenda 24 orëve të fundit 683 pacientë të tjerë me sëmundjen e mushkërive Covid-19 kanë vdekur, raportojnë autoritetet e mbrojtjes civile të Italisë, shkruajnë mediat italiane dhe botërore sot.

Rritja është përsëri paksa më e butë në krahasim me ditën e djeshme, transmeton albinfo.ch. Të kujtojmë: të martën qenë raportuar 743 vdekje të reja. Kjo ndodhi pas dy ditëve të një uljeje të numrit të vdekjeve: 602 vdekje ishin raportuar të hënën dhe 650 të dielën.

Ndërkaq, numri më i madh i vdekjeve që nga koha kur u shfaq shpërthimi i virusit në Itali, u raportua të shtunën: 793 viktima në një ditë të vetme, përcjell albinfo.ch. Numri i përgjithshëm i të infektuarve është rritur në 74,386 të mërkurën, krahasuar me 69.176 raste të konfirmuara një ditë më parë.

Italia vazhdon të jetë vendi më i prekur nga epidemia në mbarë botën.

---