Bolton: Të arrihet sa më shpejt një marrëveshje mes Kosovës dhe Serbisë

Këshilltari amerikan për Siguri Kombëtare, John Bolton, ka thënë se Kosova dhe Serbia duhet të arrijnë një marrëveshje sa më shpejt të jetë e mundur.

Në rrjetin social Twitter Bolton tha se është takuar me ministrin e Jashtëm të Sllovenisë, Miro Cerar, në Shtëpinë e Bardhë, ku u diskutua për çështjet e përbashkëta të sigurisë dhe ekonomisë, përcjell albinfo.ch.

“Unë e mirëprita ministrin e Jashtëm të Sllovenisë, Miro Cerar, në Shtëpinë e Bardhë sot. Si aleatë të NATO-s, ne diskutuam për interesat tona ekonomike dhe të sigurisë në Evropë si dhe nevojën që Kosova dhe Serbia të arrijnë një marrëveshje sa më shpejt të jetë e mundur. Unë i vlerësova shumë qëndrimet e tij”, thuhet në Tweet-in e lëshuar nga Bolton.

Rundi i ri i bisedimeve në Bruksel, i nivelit të lartë të përfaqësimit, ende nuk është ftuar nga Zyra e Përfaqësueses së Lartë të Bashkimit Evropian, Federica Mogherini, e cila e ndërmjetëson dhe lehtëson dialogun ndërmjet Kosovës dhe Serbisë në Bruksel.