Archives

Hetimi ndërkombëtar për shpëlarje të parave përfshin edhe Kosovën

Posted on by BR

Prokuroria Speciale e Kosovës ka njoftuar për një operacion policor në kuadër të një hetimi të përbashkët me EUROPOL-in dhe Prokurorinë Distriktuale të Republikës së Katanisë kundër krimit financiar dhe piraterisë audovizive që ka çuar në shpëlarje të parave.

Ky hetim që u zhvillua në disa shtete të botës, përfshiu edhe Kosovën ku është arrestuar një shtetas i Kosovës me inicialet P.B., transmeton albinfo.ch.

“Urdhër kontrolli në Kosovë është realizuar si një hap i rëndësishëm procedural, në kuadër të një operacioni të gjerë ndërkombëtar kundër krimit financiar dhe piraterisë audiovizive, që kanë çuar në shpëlarjen e parave dhe përfitimeve financiare të kundërligjshme, në disa shtete të ndryshme të botës, përfshirë edhe në Kosovë. Gjatë hetimeve të zhvilluara ka rezultuar se në mesin e të dyshuarëve të këtij grupi kriminal është edhe një shtetas i Kosovës, me inicalet P.B”, thuhet në raportin e Prokurorisë Speciale të Kosovës.

Bastisje me urdhër të PSRK-së u kryen në dy lokacione në Prishtinë dhe në fshatin Zaplluxhë të Komunës së Dragashit nën dyshimin për kryerjen e veprave penale: “Cenim i të drejtave të autorit”, nga neni 290 i KPRK-së; “Shpëlarja e parave”, nga neni 302 i KPRK-së;

Ky operacion u zhvillua njëkohësisht edhe në Mbretërinë e Bashkuar, në Spanjë, Itali dhe Rumani.

“Operacioni, i zhvilluar njëkohësisht edhe në Mbretërinë e Bashkuar, Spanjë, Itali, dhe Rumani, ka mundësuar eliminimin e një infrastrukture informatike, e cila shërbente në mënyrë të paligjshme për miliona përdorues, në nivel kombëtar dhe ndërkombëtar, përmes një sistemi të sofistikuar informatik – IPTV. Ndërsa, në hetim kanë bashkëpunuar edhe Kandaja, India, Koreja e Jugut dhe Emiratet e Bashkuara. Gjatë bastisjes është gjetur dhe sekuestruar një kompjuter dhe katër hard disqe. Prokuroria Speciale dhe Policia e Kosovës, ritheksojnë përkushtimin në luftën kundër krimit financiar dhe atij ekonomonik”, thuhet tutje në njoftim.

Ky operacion policor u zhvillua më 22 janar të këtij viti.

Manipulimet me vota në Kosovë, ndalohen edhe 15 persona në Malishevë

Posted on by BR

Ndaj 15 kryesuesve zgjedhorë në Komunën e Malishevës është caktuar masa e ndalimit prej 48-orësh, pas aksionit të sotëm në këtë komunë lidhur me dyshimet për manipulime të votave të kandidatëve për deputetë për zgjedhjet e 28 dhjetorit.

Kryeprokurori i Prokurorisë Themelore në Gjakovë, Enis Gashi, tha se gjatë aksionit të sotëm cak ishin 18 kryesues dhe 50 komisionerë.

Ata dyshohen për veprën penale “falsifikim i rezultatit të votimeve”.

Gashi tha se sot u intervistuan 15 kryesues, që u dërguan në ndalim dhe 43 komisionerë. Për komisionerët tha se do të vendoset nëse do të ndërmerret ndonjë masë sigurie, pasi ata janë intervistuar pas kryesuesve.

Ndërkaq, tre kryesuesit dhe shtatë komisionerët e tjerë, të cilët sot nuk u morën në pyetje, nga Policia e Kosovës thanë se do të merren më vonë, pasi mund të jenë jashtë vendit.

“Në Malishevë janë 75 vendvotime. 9.057 vota janë të shuar, 7.996 të hequra. Pra, gjithsej në total kemi 17.053 vota”, tha Gashi.

Ai shtoi se edhe në Komunë e Gjakovës, ku është vërejtur mospërputhje e votave, janë në kontakt me policinë, e cila po grumbullon prova.

Prokuroria e Gjakovës tha se ka pranuar si prova edhe video-incizimet nga Qendrat e Numërimit, dhe ato do të analizohen më vonë.

Rinumërimi në Malishevë – komunë në pjesën qendrore të vendit – ka përfunduar tashmë dhe ai tregon një dallim në votat për kandidatët për deputetë. Të paktën tre kandidatëve të Partisë Demokratike të Kosovës u janë hequr nga mbi 700 votat secilit në këtë komunë.

Edhe kandidatëve nga partitë e tjera si ajo në pushtet Lëvizja Vetëvendosje, Nisma, Lidhja Demokratike dhe Aleanca për Ardhmërinë e Kosovës, u janë hequr vota pas rinumërimit në këtë komunë, por në numër diçka më të vogël.

Operacioni në Malishevë është i dyti i këtij lloji si pjesë e një hetimi të gjerë për manipulim të votave në zgjedhjet e fundit të parakohshme të Kosovës.

Një operacion i ngjashëm u krye javën e kaluar në Prizren, ku u arrestuan 109 të dyshuar, prej të cilave 23 u dërguan në paraburgim nën dyshimin se kishin manipuluar vota të kandidatëve për deputetë.

Dyshimet për manipulim të votave të zgjedhjeve të dhjetorit kanë hedhur dyshime serioze mbi procesin zgjedhor, dhe Komisioni Qendror i Zgjedhjeve u detyrua ta bëjë rinumërimin e plotë të votave, pasi kishte gjetur mospërputhje të mëdha në votat për kandidatët për deputetë.

Komisioni bëri të ditur të martën se pret ta përfundojë rinumërimin në fundjavë, pasi tashmë janë rinumëruar mbi 80 për qind e votave.

Por, derisa rinumërimi ka vazhduar drejt përfundimit, edhe hetimet e autoriteteve për zbatim të ligjit po zgjerohen.

Përveç Prizrenit dhe Malishevës ku tashmë janë zhvilluar operacione, autoritetet janë duke kryer hetime edhe në Ferizaj e Drenas.

Në Kosovë manipulimi i votave është vepër penale e dënueshme me burgim.

Megjithatë, së voni organizata joqeveritare, ÇOHU, e publikoi një hulumtim që tregoi se mbi 90 për qind e rasteve për manipulime zgjedhore përfundojnë me dënime me kusht ose gjoba.

Sanija Ameti dënohet me gjobë pasi qëlloi me armë imazhin e krishterë

Posted on by albinfo.ch

Në shttor të vitit 2024, Sanija Ameti kishte drejtuar pistoletën e saj ajrore në një imazh të Jezusit dhe Marisë dhe kishte shpërndarë pastaj në instagram fotot e realizuar të të shtënave. Ajo kishte shkrur mbi këtë postim: “Fikeni”. Postimi është fshirë më vonë por, si pasojë e tij ajo ka humbur punën dhe anëtarësimin në parti. Tani ajo përballet me një gjobë.

Veprimin e politikanes së paditur nga Prokuroria e Cyrihut, Gjykata e Qarkut të Cyrihut e ka cilësuar si shkelje e lirisë së besimit.

Sipas paragrafit përkatës, kushdo që “fyen ose tall me qëllim të keq besimet e të tjerëve në çështjet e fesë, veçanërisht besimin në Zot”, është i detyruar të ndiqet penalisht. Ameti u urdhërua të paguante 500 franga zvicerane. Një gjobë tjetër prej 3,000 frangash zvicerane e kërkuar nga prokuroria, u pezullua. Ajo mund të apelojë vendimin.

Incidenti kishte shkaktuar zemërim, kur kishte ndodhur, në shtator të vitit 2024. Siç raportohet nga SRF, Ameti dhe familja e saj ishin përkohësisht nën mbrojtjen e policisë. Politikania pati fshirë postimin në Instagram pas disa orësh dhe u pati kërkuar falje përfaqësuesve të kishës. Ajo humbi punën dhe parandaloi përjashtimin nga Partia Liberale e Gjelbër (GLP) duke dhënë vetë dorëheqjen.

Sipas SRF, ajo nuk do të kandidojë në zgjedhjet për parlamentin e qytetit të Cyrihut.

Avokati i saj kishte kërkuar lirim nga akuzat. Sipas tij, Ameti vuante nga trauma që nuk e kishte trajtuar për 30 vjet. Si fëmijë, ajo dhe familja e saj kishin ikur nga ish-Jugosllavia (Bosnjë e Hercegovina), ku vëllai i saj i madh ishte qëlluar për vdekje.

Vetë politikania nuk ka folur në gjykatë. Para procesit, ajo kishte thënë se kishte grisur pa kujdes një faqe nga një katalog dhe e kishte përdorur si shënjestër. Një gjyqtar argumentoi se edhepse Ameti kishte lënduar ndjenjat e të krishterëve, ajo nuk e kishte bërë këtë qëllimisht.

Zyra e prokurorit publik, megjithatë, e përshkroi veprimin si një provokim të qëllimshëm.

Frangu zviceran forcohet kundrejt dollarit, por Banka Kombëtare Zvicerane nuk ka gjasa të ndërhyjë

Posted on by BR

Frangu zviceran vazhdon të forcohet kundrejt dollarit, me një nivel të ri rekord të raportuar të martën. Por Banka Kombëtare Zvicerane (SNB) nuk ka gjasa të ndërhyjë, sipas një eksperti financiar.

Të martën pasdite, një dollar amerikan ra në 0.7701 CHF, niveli më i ulët ndonjëherë, duke përjashtuar turbulencën e çmimeve që lidhet me heqjen e kursit minimal të këmbimit me euron në janar 2015. Monedha zvicerane u forcua gjithashtu kundrejt euros, e cila arriti në nivelin më të ulët prej 0.9189 CHF, niveli më i ulët që nga nëntori i kaluar, shkruan swissinfo.ch, transmeton albinfo.ch.

Megjithatë, SNB nuk ka bërë asnjë kundërveprim në treg, tha një analist i Valiant. Kjo është në përputhje me shenjat se banka qendrore është e shqetësuar jo aq shumë nga niveli absolut i kurseve të këmbimit, por më tepër nga luhatjet e forta.

“Megjithatë, presioni aktual po vjen më shumë nga dollari, ku paqëndrueshmëria është më e lartë”, tha analisti. Një lehtësim i tensionit në këtë front do të çonte gjithashtu në një relaksim në lidhje me euron.

Këtë javë, fokusi i tregjeve është te Rezerva Federale e SHBA-së, e cila fillon takimin e saj dy-ditor të politikës monetare të martën.

Vëzhguesit nuk presin një ulje të normës së interesit. Megjithatë, takimi mund të japë një shtysë të re, pasi mund të shfaqen shenjat e para ose edhe një njoftim mbi emërimin e ardhshëm të Kryetarit të bankës qendrore.

Mandati i Kryetarit aktual Jerome Powell, i cili është nën presion të madh nga Presidenti Donald Trump, do të përfundojë në maj.

Popullsia në plakje godet kërkesën për prona në disa pjesë të Zvicrës

Posted on by BR

Tregu i pronave në Zvicër pritet të ndiejë ndikimin e ndryshimeve demografike gjithnjë e më ashpër gjatë viteve të ardhshme. Një popullsi në plakje dhe kërkesa në rritje për shtëpi më të vogla ka të ngjarë të ushtrojnë presion mbi disa rajone.

Analistët e pronave të MoneyPark kanë arritur në këtë përfundim: trendet demografike po krijojnë sfida të thella strukturore për tregun e banesave në disa kantone zvicerane. Sipas raportit të publikuar të mërkurën, ndikimi është veçanërisht i mprehtë në dhjetë nga kantonet më të prekura të vendit, shkruan Swissinfo.ch, transmeton albinfo.ch.

Presionet demografike

Këto përfshijnë kantonin Ticino, Bernën, Neuchâtelin, Jurën, Appenzell Outer Rhodes, Nidwalden, Obwalden, Graubünden, Glarus dhe Schaffhausen. Së bashku, ato përbëjnë afërsisht 23% të vëllimit të përgjithshëm të kredive hipotekare të Zvicrës.

Në të njëjtën kohë, këto kantone po përjetojnë ndryshimet më të mprehta demografike dhe, sipas studimit, tashmë po shohin që kërkesa për strehim të ngecë ose edhe të fillojë të bjerë.

Në zemër të çështjes është profili i moshës së këtyre rajoneve. Pothuajse e gjithë rritja e popullsisë në këto kantone vjen nga njerëz mbi moshën 65 vjeç.

“Ky grupmoshë lëviz rrallë dhe krijon shumë pak kërkesë për banesa të reja”, thotë drejtori ekzekutiv i MoneyPark, Lukas Vogt. Në të njëjtën kohë, numri i njerëzve në moshë pune po bie.

Si rezultat, grupi i blerësve dhe qiramarrësve potencialë po zvogëlohet, gjë që po ul numrin e transaksioneve dhe po ngadalëson rritjen e çmimeve. Në disa kantone, duke përfshirë Ticino, Graubünden dhe Jura, kjo prirje është tashmë e qartë. Kërkesa për shtëpi është e dobët, pronat po zgjasin më shumë për t’u shitur dhe uljet e çmimeve po bëhen më të zakonshme.

Si do të ndikonte tek ju ligji i planifikuar i Zvicrës për taksat individuale?

Posted on by BR

Për çfarë bëhet fjalë në këtë votim?

Nëse miratohet në kutinë e votimit, futja e taksimit individual do të jetë një nga reformat më të rëndësishme tatimore të Zvicrës në dekadat e fundit.

Ky veprim do të sjellë mbylljen – në një mënyrë ose në një tjetër – të një çështjeje që ka qenë në pezull legjislativ për vite me radhë, përpara se të merrte dritën jeshile nga Parlamenti në vitin 2024, shkruan The Local, transmeton albinfo.ch.

Bashkëshortët gjithmonë janë tatuar bashkërisht, kryesisht sepse në të kaluarën shumë gra nuk punonin.

Deri më sot, çiftet e martuara ende tatohen së bashku, dhe kjo përfshin çiftet e të njëjtit seks që jetojnë në një partneritet të regjistruar.

Kjo do të thotë që nëse të dy partnerët janë të punësuar, ata shpesh duhet të paguajnë taksa më të larta sesa çiftet e pamartuara që deklarojnë taksat e tyre veçmas. Të ardhurat e tyre shtohen (dhe tatohen) së bashku pavarësisht se kush ka fituar sa.

Kjo është mirë për qeverinë, sepse më shumë para po rrjedhin në arkën publike, por jo aq mirë për njerëzit e martuar që kanë barrë të lartë tatimore.

Miratimi i sistemit të ri më 8 mars do ta ndryshonte këtë – por si?

Me pak fjalë, sipas këtij ligji të ri, çiftet e martuara do të tatohen gjithashtu individualisht.

Çdo person do të paguajë taksë mbi të ardhurat dhe pasuritë e veta, dhe e njëjta normë tatimore do të zbatohet për të gjithë, pavarësisht nga statusi i tyre civil.

Po në lidhje me pronën në pronësi të përbashkët?

Në të ardhmen, asetet do të tatohen sipas pronësisë.

Për pasuritë e paluajtshme, ajo që ka rëndësi është ajo që regjistrohet në regjistrin e tokës. Nëse një shtëpi është në pronësi të barabartë nga të dy bashkëshortët, secili do të duhet të deklarojë pjesën e tij në deklaratën e tij tatimore. Nëse, sipas regjistrit të tokës, shtëpia është në pronësi vetëm të njërit bashkëshort, ai ose ajo do të duhet ta deklarojë atë individualisht.

I njëjti parim do të zbatohet për asetet e tjera, siç janë llogaritë bankare dhe portofolet e investimeve: pronësia do të përcaktojë detyrimin tatimor – në të njëjtën mënyrë siç zbatohet tashmë për çiftet e pamartuara.

Çfarë ndikimi do të ketë taksimi individual?

Disa përfitime shtetërore varen nga martesa si një njësi ekonomike, domethënë nga të ardhurat familjare, të përcaktuara aktualisht nga një deklaratë e përbashkët tatimore.

Këto përfshijnë, për shembull, uljet e primeve të sigurimit shëndetësor, grantet studentore dhe subvencionet për kujdesin ndaj fëmijëve. Këto fusha bien nën juridiksionin e kantoneve ose bashkive, të cilat kanë liri të konsiderueshme veprimi në përshtatjen e tyre.

Kantonet do të duhet të rishikojnë ligjet e tyre dhe t’i përshtatin ato nëse është e nevojshme.

Ligji federal u lejon atyre të zgjedhin nëse do të marrin apo jo parasysh të ardhurat e partnerit. Disa kantone tashmë i marrin në konsideratë të ardhurat familjare për çiftet e pamartuara kur vlerësojnë të drejtën për ulje të primeve të sigurimit shëndetësor.

Kush do të paguajë më pak taksa?

Lajmi i mirë është se me reformën, taksa federale direkte do të ulet në përgjithësi.

Përfituesit kryesorë do të jenë çiftet e martuara me dy të ardhura, përfshirë shumë pensionistë.

Nëse, për shembull, burri fiton 70 përqind të të ardhurave familjare dhe gruaja 30 përqind (ose anasjelltas), çifti do të përfitojë nga reforma, pavarësisht nga numri i fëmijëve që kanë.

Shumica e beqarëve do të paguajnë gjithashtu më pak taksa, veçanërisht ata me të ardhura të ulëta dhe të mesme.

Dhe kush do të paguajë më shumë taksa?

Megjithatë, jo të gjithë do të përfitojnë nga sistemi i ri: afërsisht 14 përqind e taksapaguesve do të paguajnë më shumë taksa.

Këto janë familjet që aktualisht përfitojnë nga një “bonus martese” – kur detyrimi total tatimor i një çifti të martuar bie për shkak të deklarimit të kombinuar, shpesh duke përfituar bashkëshortët me të ardhura shumë të ndryshme, pasi të ardhurat më të larta tatohen me një normë më të ulët të përbashkët.

Çiftet e martuara me një të ardhur të vetme ose një të ardhur shumë të ulët të dytë, me ose pa fëmijë, preken veçanërisht.

Dhe për shkak të rregullimit të kategorive tatimore, beqarët me të ardhura të larta do të shohin gjithashtu rritje të taksave të tyre.

Alban Elezi Cannaferina siguron podiumin e parë në Kupën e Botës

Posted on by Drin Reçica

Alban Elezi Cannaferina ka arritur sonte një moment historik në karrierën e tij, duke siguruar podiumin e parë në Kupën e Botës në moshën vetëm 22 vjeç, transmeton albinfo.ch.

Skijatori francez përfundoi në vendin e tretë , duke ndarë momentin e madh me legjendat e skijimit @loicmeillard dhe @pinheiiiroo.

“Faleminderit të gjithëve për mbështetjen – familjes, bashkëlojtarëve, stafit dhe sponsorëve. Ëndrrat realizohen!” – shkruan Elezi në rrjetet sociale. /Albinfo.ch

 

https://www.facebook.com/share/p/1SCtJekWya/

Ja 5 veturat më të shitura në Kosovë gjatë vitit 2025

Posted on by Drin Reçica

Tregu i veturave të reja në Kosovë gjatë vitit 2025 ka shënuar një rritje të dukshme, duke konfirmuar një trend të qartë: blerësit po zgjedhin modele me çmim të arsyeshëm, kosto të ulëta mirëmbajtjeje dhe prakticitet për përdorim të përditshëm, transmeton albinfo.ch.

Të dhënat zyrtare nga Qendra e Automjeteve të Kosovës tregojnë se SUV-të kompakte dhe hatchback-ët ekonomikë kanë pasur kërkesën më të madhe. Ja Top 5 veturat e reja më të shitura në Kosovë për vitin 2025:

1. Dacia Sandero Stepway – 413 vetura

Modeli më i shitur i vitit, i preferuar për çmimin konkurrues, pozicionin e ngritur të vozitjes dhe prakticitetin për kushtet rrugore në Kosovë.

2. Renault Captur – 323 vetura

SUV-i kompakt i Renault tërheq blerësit me dizajn modern, komoditet dhe balancim të mirë mes performancës dhe konsumit. Zgjedhja ideale për familjet urbane.

3. VW Golf – 208 vetura

Ikona e segmentit hatchback vazhdon të ruajë pozicionin e saj. Golf mbetet sinonim i cilësisë, teknologjisë dhe vozitjes së qëndrueshme, duke ruajtur besnikërinë e klientëve ndër vite.

4. Peugeot 308 – 201 vetura

Model me dizajn modern dhe teknologji të avancuar, i preferuar nga blerësit që kërkojnë stil dhe efikasitet në një veturë kompakte.

5. Skoda Octavia – 200 vetura

Octavia është zgjedhje e fortë për ata që kërkojnë hapësirë, rehati dhe raport të mirë çmim-cilësi, e përshtatshme për familje dhe biznese.

Rezultatet e vitit 2025 tregojnë qartë se tregu kosovar po anhohet drejt veturave ekonomike, funksionale dhe të besueshme, duke lënë pas automjetet luksoze me kosto të larta mirëmbajtjeje. Me këtë performancë, Auto Mita mbyll vitin 2025 si një nga shtyllat kryesore të tregut të veturave të reja në Kosovë, duke vendosur standarde të larta për vitet që vijnë. /Albinfo.ch

Essen: 13-vjeçari sulmon një të moshuar për vdekje

Posted on by Drin Reçica

Një incident i rëndë dhune ka ndodhur në muajin tetor 2025 në një park lojërash në qytetin Essen, Gjermani, ku një 80-vjeçar është sulmuar fizikisht. Tre muaj më vonë, i moshuari ka ndërruar jetë si pasojë e plagëve të rënda në kokë, transmeton albinfo.ch.

Sipas autoriteteve, një 13-vjeçar është identifikuar si i dyshuari kryesor. Hetimet kanë treguar se viktima nuk është sulmuar nga një grup, por nga një person i vetëm, raporton Focus.de.

Nga goditja, pensionisti është rrëzuar në tokë dhe ka pësuar lëndime të rënda në kokë, të cilat më vonë rezultuan fatale. Viktima ka vdekur në moshën 81-vjeçare.

Policia e Nordrhein-Westfalen ka bërë të ditur se është në kontakt të ngushtë me familjen e të miturit si dhe me zyrën e rinisë (Jugendamt). Megjithatë, sipas ligjit gjerman, fëmijët nën moshën 14 vjeç nuk janë penalisht përgjegjës, ndaj ndaj 13-vjeçarit nuk mund të ngrihen akuza penale./Albinfo.ch

Hajdari dhe Avdullahu kontribuojnë në fitoren e Hoffenheimit ndaj Werder Bremenit

Posted on by Drin Reçica

Mbrojtësi Albian Hajdari dhe mesfushori Leon Avdullahu luajtën deri në fund te Hoffenheimi, që arriti të mposhtë Werder Bremenin në ndeshjen e mbetur të xhiros së 16-të të Bundesligës, përcjell albinfo.ch.

Kjo ndeshje ishte një nga dy ndeshjet e shtyra për shkak të motit të keq në Gjermani. Hoffenheimi shënoi një gol në pjesën e parë dhe një tjetër në pjesën e dytë, duke siguruar fitoren 2:0, edhe pse luajti me një lojtar më pak pas kartonit të kuq të marrë nga Wouter Burger në minutën e 51-të.

Futbollisti tjetër i Kosovës, Fisnik Asllani, mbeti në stol gjatë këtij takimi. Me këtë fitore, Hoffenheimi forcohet në vendin e tretë të Bundesligës me 39 pikë./Albinfo.ch

Frangu vazhdon të forcohet edhe më tej ndaj euros

Posted on by Drin Reçica

Franga zvicerane po vazhdon trendin e saj forcues, duke fituar terren ndaj euros, edhe pse kjo e fundit ka shënuar rritje kundrejt dollarit amerikan, përcjell albinfo.ch.

Aktualisht, një euro këmbehet me 0.9165 franga zvicerane, niveli më i ulët i regjistruar në dhjetë vitet e fundit.

Ky zhvillim nuk ka ardhur si surprizë për ekonomistët, të cilët kishin parashikuar se franga do të ruante trendin e saj rritës edhe gjatë vitit 2026, falë stabilitetit ekonomik dhe rolit të saj si monedhë e sigurt.

Në të njëjtën kohë, dollari amerikan ka shënuar rënie, duke bërë që franga zvicerane dhe euro të forcohen kundrejt tij. Në një moment, një dollar vlente rreth 0.77 franga ose 0.83 euro, niveli më i lartë për euron që nga qershori 2021. Sipas Cash.ch, duke cituar AWP, Banka Kombëtare Zvicerane mund të ndërhyjë në treg për të dobësuar frangun./Albinfo.ch

Mërgim Berisha drejt rikthimit në Austri, në negociata intensive me Sturm Graz

Posted on by Drin Reçica

Sulmuesi Mërgim Berisha pritet të rikthehet në futbollin austriak, kësaj radhe te Sturm Graz, ekip me të cilin tashmë është në negociata intensive, transmeton albinfo.at.

Mediumet austriake raportojnë se Sturm Graz e sheh Berishën si përforcim të rëndësishëm për repartin ofensiv dhe është duke negociuar me Hoffenheimin për huazimin e tij deri në fund të sezonit.

Berisha nuk ka regjistruar asnjë paraqitje për Hoffenheimin këtë edicion. Pas rikthimit nga huazimi, 27-vjeçari ka qenë jashtë fushës, pjesërisht për shkak të lëndimeve.

Paraqitjen e fundit në një ndeshje zyrtare, Berisha e ka zhvilluar në muajin maj të vitit të kaluar me fanellën e Augsburgut, skuadër ku ishte i huazuar nga Hoffenheimi.

Sulmuesi ka kontratë me Hoffenheimin deri vitin e ardhshëm, ndërsa një huazim te Sturm Graz do të shënonte rikthimin e tij në një kampionat ku ka hedhur hapat e parë si futbollist profesionist.

Në total, Berisha ka zhvilluar 88 paraqitje në elitën e futbollit austriak, duke luajtur për skuadra si Salzburgu, Altach dhe LASK./Albinfo.at

Shkurtime të reja të vendeve të punës në Zvicër

Posted on by Drin Reçica

Zvicra po përballet me një valë të re shkurtimeve të vendeve të punës, pasi disa kompani të mëdha kanë njoftuar masa të reja në kuadër të ristrukturimeve të tyre, transmeton albinfo.ch.

Grupi mediatik Tamedia ka bërë të ditur se, për shkak të riorganizimit të sektorëve të tij print dhe digjital, do të shkurtojë 25 deri në 30 vende pune me orar të plotë gjatë këtij viti.

Ndërkohë, edhe dega zvicerane e IKEA-s ka paralajmëruar se mund të eliminojë deri në 60 pozita administrative në selinë e saj qendrore në Spreitenbach, kantoni Aargau.

Sipas kompanisë, arsyeja e këtyre shkurtimeve lidhet me nevojën që “IKEA të ketë një organizatë më të thjeshtë, më efikase dhe më të fokusuar”.

Këto humbje të vendeve të punës i shtohen shkurtimeve të tjera që janë paralajmëruar më herët, duke shtuar shqetësimet për stabilitetin e tregut të punës në vend. /Albinfo.ch

Luksemburgu ofron mbi 1 milion euro për ide inovative në Kosovë

Posted on by Drin Reçica

Bashkëpunimi për Zhvillim i Luksemburgut ka lansuar një thirrje të re për propozime, duke synuar ndërmarrjet inovative në Kosovë. Fondi Demonstrues LuxAid (LDF) ofron mbështetje financiare deri në 350,000 euro për projekte që zhvillojnë zgjidhje dixhitale dhe të gjelbra me ndikim shoqëror dhe ekonomik, transmeton albinfo.ch.

Sipas njoftimit të LUXDEV, aplikimet për këtë thirrje janë të hapura deri më 6 shkurt 2026, ndërsa dhjetë projektet më të mira do të përfitojnë trajnime dhe mbështetje për prezantimin para komisionit të përzgjedhjes. Vendimi final pritet të shpallet në korrik 2026, me 3-4 projekte të përzgjedhura që do të financohen.

Fokus në inovacion dhe rritje të qëndrueshme

Fondi synon të përshpejtojë rritjen e zgjidhjeve inovative që adresojnë sfida të mëdha shoqërore, duke përfshirë:

• Inovacion dixhital: AI, analiza e të dhënave, automatizimi, fintech, tregtia elektronike dhe siguria kibernetike.

• Aftësi për punësim: Zgjidhje që lidhen me aftësitë dixhitale dhe të gjelbra për të rritur mundësitë e punësimit.

• Teknologji shëndetësore: Zgjidhje e-health, me fokus te kujdesi kardiovaskular.

• Energjia dhe mjedisi: Efikasitet energjetik, ekonomia rrethore, riciklimi i mbeturinave, agrobiznesi i qëndrueshëm dhe adaptimi ndaj klimës.

Kush mund të aplikojë?

Fondi është i hapur për kompani ose bashkëpunime të regjistruara në Kosovë para 1 nëntorit 2022, me të paktën 5 të punësuar dhe xhiro nën 50 milionë euro. Projektet duhet të kenë një produkt ose shërbim inovativ të testuar tashmë në treg me të ardhura të provuara për të paktën një vit dhe të jenë të afta të bashkëfinancojnë të paktën 50% të kostove të projektit.

Mbështetje dhe shkallëzim

Bashkëfinancimi varion nga 100,000 deri në 350,000 euro, me qëllim të shkallëzimit të zgjidhjeve inovative dhe zgjerimit të ndikimit të tyre në komunitetet lokale. /Albinfo.ch

Instituti i Vjenës: Anëtarësimi i pjesshëm në BE, skenari më realist për Shqipërinë

Posted on by Drin Reçica

Mali i Zi dhe Shqipëria janë të parët në radhë për anëtarësim në Bashkimin Europian nga të gjitha vendet kandidate, por një integrim i plotë politik duket ende larg. Kjo është përfundimi i diskutimeve të fundit në një forum të organizuar nga Instituti Ndërkombëtar i Vjenës për Studime Ekonomike (wiiw), transmeton albinfo.ch.

Referuar ekspertëve të këtij forumi, megjithëse Shqipëria ka një pozicion të favorshëm për pranimin në BE, shqetësime të tilla si përqendrimi i pushtetit brenda vendit dhe ndikimet gjeopolitike në rajon, përfshirë ndikimin e presidentit serb Aleksandër Vuçiç mbi Malin e Zi, e bëjnë të mundshëm një skenar të anëtarësimit të pjesshëm brenda tre viteve të ardhshme.

Në këtë model, vendet kandidate do të integrohen ekonomikisht dhe rregullatorisht në BE, duke pasur akses në tregun e brendshëm, duke përfituar nga fondet strukturore, bujqësore dhe infrastrukturore, dhe duke zbatuar legjislacionin europian, por pa të drejta të plota politike: nuk do të kenë të drejtë vote në Këshillin e BE-së, komisioner europian ose përfaqësim të plotë në Parlamentin Europian.

Ky model synon të kapërcejë paradoksin aktual të zgjerimit, ku vendet kandidate detyrohen të zbatojnë një pjesë të madhe të rregullave të BE-së pa përfituar ekonomikisht nga ky proces.

Përfitimet për Shqipërinë:

• Kompanitë shqiptare do të kenë akses të plotë në tregun e përbashkët europian, pa tarifa dhe barriera jo-tarifore, duke integruar ekonominë shqiptare direkt në zinxhirët e prodhimit dhe shërbimeve të BE-së.

• Vendit do t’i shtohen fonde zhvillimi më të mëdha sesa ato që merr aktualisht përmes instrumenteve të para-anëtarësimit.

• Qytetarët shqiptarë do të kenë më shumë të drejta për të punuar, studiuar dhe qëndruar në vendet e BE-së, por me kufizime të caktuara, të ngjashme me modelet e Norvegjisë apo Zvicrës.

Analistët e Vjenës theksuan se Ballkani Perëndimor ka pritur gjatë për integrim dhe fitimet nga konvergjenca ekonomike të BE-së kanë qenë të kufizuara. Politikat fiskale strikte dhe mungesa e konkurrueshmërisë janë sfida të tjera që vendet e rajonit duhet të adresojnë. Megjithatë, perspektiva makroekonomike e rajonit mbetet pozitive, me investime të huaja që kanë qenë të qëndrueshme dhe potencial për zhvillim të mëtejshëm.

Sipas ekspertëve, anëtarësimi i pjesshëm mund të jetë një rrugë praktike për të lidhur Ballkanin Perëndimor fort me ekonominë europiane, duke ulur ndikimin e aktorëve të jashtëm, pa i detyruar vendet e BE-së të marrin vendime politike të ndjeshme për anëtarësimin e plotë. /Albinfo.ch

Bordi i Paqes mirëpret Shqipërinë si anëtare themeluese të organizatës ndërkombëtare

Posted on by Drin Reçica

Bordi i Paqes ka bërë të ditur pranimin e Shqipërisë si anëtare themeluese të organizatës ndërkombëtare të Paqes dhe Stabilitetit, në nivel global, përcjell albinfo.ch.

Ky hap vlerësohet si një moment i rëndësishëm për rolin e Shqipërisë në arenën ndërkombëtare dhe vjen si rezultat i angazhimit të saj të vazhdueshëm në mbrojtjen e vlerave demokratike, respektimin e të drejtave të njeriut dhe ruajtjen e integritetit territorial. Përmes këtij angazhimi, Shqipëria kontribuon në forcimin e paqes dhe stabilitetit, si në rajon ashtu edhe më gjerë.

Pranimi i Shqipërisë është konfirmuar përmes një postimi zyrtar të Bordit të Paqes në platformën X, ku thuhet:

“Bordi i Paqes mirëpret Shqipërinë si një anëtare themeluese të organizatës sonë ndërkombëtare në rritje.”

Po udhëtonte drejt Francës, i riu shqiptar humb jetën në një aksident

Posted on by Drin Reçica

Një aksident i rëndë trafiku ka ndodhur të martën në Rumani, ku ka humbur jetën një i ri shqiptar, me inicialet V. P., së bashku me gjashtë tifozë të klubit grek PAOK, shkruan albinfo.ch.

Sipas autoriteteve rumune, viktima shqiptare është identifikuar zyrtarisht nga policia e këtij shteti. Ngjarja e rëndë ka ndodhur gjatë udhëtimit të tifozëve drejt Francës.

Mësohet se V. P. jetonte prej shumë vitesh me familjen e tij në qytetin Alexandria të rajonit Imathia, në Greqi. Miqtë e tij kanë bërë të ditur se ai ishte një tifoz i zjarrtë i PAOK-ut dhe kishte ndjekur pothuajse çdo ndeshje të skuadrës së zemrës.

Edhe këtë herë, V. P. po udhëtonte për të qenë pranë ekipit të tij, por udhëtimi drejt Francës përfundoi tragjikisht./Albinfo.ch

Bordi i Paqes mirëpret Kosovën si anëtare themeluese

Posted on by Drin Reçica

Bordi i Paqes, një iniciativë ndërkombëtare e nisur nga presidenti amerikan Donald Trump, ka mirëpritur zyrtarisht Republikën e Kosovës si anëtare themeluese të kësaj organizate, përcjell albinfo.ch.

Ky mirëseardhje është bërë publike përmes një postimi në platformën X, ku Bordi i Paqes ka konfirmuar anëtarësimin e Kosovës në strukturën e tij.

“Bordi i Paqes e mirëpret Kosovën si anëtare themeluese të organizatës sonë ndërkombëtare në rritje”, thuhet në njoftim.

Anëtarësimi i Kosovës u formalizua më 22 janar të këtij viti, kur presidentja Vjosa Osmani nënshkroi dokumentin përkatës, duke e bërë Kosovën pjesë të kësaj iniciative që synon promovimin e paqes dhe bashkëpunimit ndërkombëtar.

Presidentja Osmani ishte gjithashtu e vetmja lidere grua që nënshkroi këtë iniciativë, fakt që i jep një dimension të veçantë përfaqësimit të Kosovës në këtë organizatë globale./Albinfo.ch 

 

Rinumërimi drejt fundit zbulon manipulime masive të votave

Posted on by Drin Reçica

Procesi i rinumërimit të votave të zgjedhjeve parlamentare të 28 dhjetorit po i afrohet përfundimit, duke nxjerrë në pah një sërë parregullsish serioze. Sipas të dhënave të publikuara në uebfaqen e Komisionit Qendror të Zgjedhjeve (KQZ), deri më tani janë rinumëruar mbi 80 për qind e vendvotimeve, përkatësisht 2061 nga gjithsej 2557, përcjell albinfo.ch.

Vendimi për rinumërim të plotë u mor pas rinumërimit të pjesshëm, gjatë të cilit u evidentuan manipulime të shumta në garën ndërmjet kandidatëve për deputetë. Në pothuajse të gjitha partitë politike janë identifikuar kandidatë që në numërimin fillestar kishin përfituar ose humbur qindra vota në mënyrë të pajustifikueshme.

Sipas rezultateve të deritanishme, kandidatët e Partisë Demokratike të Kosovës (PDK) rezultojnë të jenë më të prekurit nga këto manipulime, me dhjetëra mijëra vota të kontestuara dhe të korrigjuara gjatë rinumërimit.

Parregullsitë e publikuara edhe në platformën zyrtare të KQZ-së kanë nxitur reagimin e organeve të drejtësisë. Prokuroria ka nisur hetime në disa rajone të vendit, ndërsa në Prizren janë paraburgosur 23 persona të dyshuar për përfshirje në manipulimin e procesit zgjedhor. Hetime janë duke u zhvilluar edhe në komuna të tjera.

Një operacion i gjerë hetimor është duke u zhvilluar në Gjakovë, ku mbi 50 komisionerë zgjedhorë janë shoqëruar deri më tani nën dyshimet për manipulim të procesit zgjedhor.

Manipulimet nuk lidhen vetëm me Gjakovën, por dyshimet serioze shtrihen edhe në komuna të tjera, përfshirë Malishevën, si dhe zona të tjera ku janë evidentuar mospërputhje të rezultateve të votimit.

Komisionerët e shoqëruar po intervistohen në lidhje me dyshime për: ndërhyrje në numërimin e votave, mospërputhje të rezultateve përfundimtare, keqpërdorim të detyrës zyrtare gjatë procesit zgjedhor. /Albinfo.ch 

Brilant Milazimi përfaqëson Kosovën në Bienalen e Venecias 2026

Posted on by Drin Reçica

Pasi kanë mbetur më pak se katër muaj deri në edicionin e 61-të të Bienales Ndërkombëtare të Artit në Venecia, përgatitjet për prezantimin e artit të Kosovës janë në fazën përfundimtare. Pavijoni i Kosovës do të shfaqë sivjet për herë të parë një pikturë, veprën monumentale 17-metërshe “Dhëmbë të fortë” të artistit Brilant Milazimi, e cila do të vendoset në kishën e stilit barok Chiesa di Santa Maria del Pianto, transmeton albinfo.ch.

Kjo kishë dhe ish-manastir tetëkëndor, e ndërtuar në vitin 1658 nga arkitekti Francesco Contin, ndodhet përballë lagunës veneciane dhe është një prej hapësirave të çmuara të arkitekturës veneciane. Me kalimin e shekujve, kompleksi ka shërbyer si shkollë, spital, kazermë dhe hapësirë magazinimi, ndërsa më pas u mbyll për publikun dhe mbeti e paprekur për dekada. Sot, ndërtesa është në pronësi të një kompanie private dhe përdoret për aktivitete të ndryshme ambulatore, ndërsa kisha mbetet në gjendje të braktisur. Sipas Galerisë Kombëtare të Kosovës, pjesëmarrja e këtij viti shënon një rihapje të rrallë të hapësirës së mbyllur, duke përjetësuar cikle përkushtimi, braktisjeje dhe pritjeje institucionale.

Ekspozita e Milazimit, e kuruar nga meksikani José Esparza Chong Cuy, do të jetë e hapur nga 9 maji deri më 22 nëntor. Piktura “Dhëmbë të fortë” prezanton një rend figurash të radhitura ngushtë, që përkujtojnë terrenin rural të Kosovës dhe procesione të gjata njerëzish, duke krijuar një atmosferë pezullimi kohor dhe tensioni emocional. Ngjyra e kuqe dominon në veprë, ndërsa nuancat e hapura dhe errëta formojnë dritëhije që i japin figurave një dimension poetik dhe ogurzi. Vepra pasqyron tendosjen fizike dhe psikologjike të pritjes së gjatë, duke reflektuar dekada pasigurie të formësuara nga tranzicioni politik dhe njohja e kontestuar e Kosovës.

Sipas Galerisë Kombëtare të Kosovës, ekspozita fton vizitorët të përjetojnë veprën nga afër, ndërsa figurat “rezistojnë, qëndrojnë në pritje, me dhëmbët e shtrënguar fort”, duke krijuar një dialog me situatën politike dhe shoqërore të vendit. “Ekspozita synon të ngjallë reagime të thella emocionale përmes atmosferës së zhytur dhe tensionit të qetë, duke reflektuar gjendje të paqarta politike dhe krizash globale”, theksohet në arsyetim.

Milazimi, artist i gjeneratës së re nga Gjilani, u zgjodh unanimisht nga juria ndërkombëtare e përbërë nga Inke Arns, Erëmirë Krasniqi, Christine Macel, Valentine Umansky dhe Rein Wolfs. Juria vlerësoi qartësinë e vizionit, gjuhën e fuqishme vizuale dhe angazhimin e tij me mediumin e pikturës, duke e caktuar atë për të hapur kapitullin e radhës të Pavijonit të Kosovës.

Kuratori i ekspozitës, José Esparza Chong Cuy, është shkrimtar, redaktor dhe arkitekt nga Meksika, i cili ka bashkëpunuar me dhjetëra artistë në mbarë botën dhe është bashkëredaktor i librit të ardhshëm Empty Plinths: Monuments, Memorials, and Public Sculpture in Mexico, që do të botohet në vitin 2026 nga Harvard Design Press.

Kosova vijon kështu traditën e prezantimit të kulturës së saj të artit vizual në Bienalen e Venecias, duke përdorur hapësirën për dialog kulturor dhe politik, dhe duke shënuar këtë vit një kapitull të veçantë me pikturën monumentale të Brilant Milazimit. /Albinfo.ch

Shqiptarja nga diaspora drejt Olimpiadës Dimërore 2026 me flamurin kuqezi

Posted on by Drin Reçica

Lisa Brunga, skiatorja shqiptare që jeton dhe stërvitet në Toronto të Kanadasë, është gjithnjë e më pranë realizimit të një ëndrre madhore, duke u bë pjesë e Lojërave Olimpike Dimërore Milano–Cortina 2026, ku synon të përfaqësojë me krenari Shqipërinë, transmeton albinfo.ch.

Garat olimpike pritet të zhvillohen më 22 shkurt 2026, një moment historik jo vetëm për sportisten, por edhe për sportin shqiptar.

Me përkushtim, disiplinë dhe pasion të jashtëzakonshëm për skitë, Lisa Brunga ka ndërtuar një rrugëtim që reflekton talentin dhe vullnetin e fortë të sportistëve shqiptarë në arenën ndërkombëtare. Stërvitjet intensive dhe angazhimi i vazhdueshëm e kanë afruar gjithnjë e më shumë drejt objektivit për të ngritur flamurin kuqezi në një nga ngjarjet sportive më prestigjioze në botë.

Përtej rezultateve sportive, Brunga është shquar edhe për përkushtimin e saj ndaj zhvillimit të sportit në Shqipëri. Në dhjetor të vitit 2023, ajo organizoi në Toronto një Mbrëmje Bamirësie në mbështetje të Federatës Shqiptare të Skive, duke mbledhur anëtarë të komunitetit shqiptar dhe përfaqësues të biznesit. Kjo nismë u kurorëzua me dorëzimin e një çeku prej 15 mijë dollarësh, një kontribut i rëndësishëm për zhvillimin e sportit të skive dhe mbështetjen e sportistëve të rinj shqiptarë.

Lisa Brunga mbetet një shembull frymëzues i përkushtimit, solidaritetit dhe dashurisë për atdheun, duke dëshmuar se suksesi personal mund të shndërrohet edhe në mbështetje konkrete për komunitetin dhe sportin shqiptar./Albinfo.ch

Denik Prizreni përfaqëson Kosovën në Festivalin Ndërkulturor 2026 në Athinë

Posted on by Drin Reçica

Në Athinë u mbajt Festivali Ndërkulturor 2026, një ngjarje e rëndësishme që organizohet nën patronazhin e UNESCO-s, me qëllim promovimin e kulturës dhe artit nga shtetet pjesëmarrëse, transmeton albinfo.ch.

Republika e Kosovës u përfaqësua me dinjitet në fushën e muzikës nga tenori Denik Prizreni, i cili performoi për dy ditë me radhë duke sjellë një përzierje të muzikës tradicionale shqiptare dhe veprave të njohura ndërkombëtare. Performancat e tij i dhanë festivalit një atmosferë emocionuese dhe prezantuan kulturën tonë në një skenë ndërkombëtare.

Nga repertori i tij, veprat e pavdekshme shqiptare si “E bukura more”, “Lule Lule” dhe “Kosova” ishin ndër interpretimet më të spikatura, të cilat jehuan fuqishëm në festival përmes zërit të Prizrenit, duke dëshmuar talentin e tij dhe pasurinë e muzikës shqiptare.

Ky pjesëmarrje thekson angazhimin e Kosovës për të promovuar identitetin kulturor dhe muzikor në skenën ndërkombëtare, duke kontribuar në dialogun ndërkulturor përmes artit./Albinfo.ch