Departamenti Amerikan i Shtetit e ka renditur Kosovën në Nivelin 2 në raportin vjetor për Trafikimin e Qenieve Njerëzore për vitin 2025. Kjo kategori përfshin vendet që kanë bërë përpjekje të konsiderueshme, por ende nuk i përmbushin plotësisht standardet minimale ndërkombëtare për luftën kundër trafikimit, përcjell albinfo.ch.

Progres, por jo i mjaftueshëm

Sipas raportit, Kosova ka shënuar përmirësime të dukshme, si:

Rritje e ndjekjeve penale ndaj trafikantëve të dyshuar (49 të dyshuar në 17 raste më 2024)

Identifikim i më shumë viktimave

Rritje e fondeve për ndihmë dhe kompensim të viktimave

Por, raporti kritikon faktin se:

Janë dhënë dënime shumë të ulëta – vetëm një trafikant seksual u dënua me tetë muaj burg, ndonëse dënimi minimal sipas ligjit është pesë vjet

Gjykatat shpesh lirojnë të dyshuarit ose japin dënime jo proporcionale me krimin

Fëmijët që detyrohen të lypin trajtohen si raste neglizhence, jo si viktima trafikimi

Viktimat dhe mbështetja

Gjatë vitit 2024 janë identifikuar 14 viktima të trafikimit në Kosovë (nga 17 një vit më parë). Shumica morën ndihmë ligjore, psikologjike dhe mbështetje për riintegrim – për këtë aspekt, qeveria është vlerësuar pozitivisht.

Rekomandimet kryesore për Kosovën:

Të rriten hetimet dhe ndjekjet penale

Të jepen dënime më të rënda dhe në përputhje me ligjin

Të trajtohen si trafikim edhe rastet ku viktimat janë fëmijë të detyruar për të lypur

Të rriten fondet për ndërgjegjësim dhe mbrojtje

Kosova nuk është e vetme në këtë kategori. Në Nivelin 2 janë renditur edhe Shqipëria, Serbia, Mali i Zi, Maqedonia e Veriut dhe Bosnja e Hercegovina – çka tregon sfidat e përbashkëta të rajonit në luftën kundër trafikimit të qenieve njerëzore.

Gjykata Kushtetuese e Republikës së Kosovës ka shpallur aktgjykimin në lidhje me bllokadën në Kuvend, duke konstatuar se seanca konstituive e nisur më 15 prill 2025 ende nuk ka përfunduar dhe Kuvendi nuk është konstituuar në përputhje me Kushtetutën, përcjell albinfo.ch.

Rasti KO265/25 ishte ngritur nga deputeti Igor Simiq dhe nëntë deputetë të tjerë, të cilët kishin kërkuar vlerësimin e kushtetutshmërisë së procesverbaleve dhe vendimeve të marra gjatë seancës konstituive më 26 dhe 28 gusht 2025.

Gjykata, me vendim unanim, ka konkluduar se moszgjedhja e nënkryetarit të Kuvendit nga radhët e komunitetit serb e bën të papërfunduar procesin e konstituimit të Kuvendit, në kundërshtim me nenet 66 dhe 67 të Kushtetutës së Kosovës.

Në aktgjykim thuhet se:

• Kuvendi duhet të përfundojë seancën konstituive brenda 12 ditëve nga hyrja në fuqi e këtij vendimi;

• Të gjithë deputetët janë të obliguar që gjatë procedurës të veprojnë në përputhje me Kushtetutën dhe në interes të shtetit;

• Masa e përkohshme e pezullimit të vendimeve të Kuvendit, e vendosur më 5 shtator 2025, mbetet në fuqi deri në hyrjen në fuqi të aktgjykimit;

• Vendimi hyn në fuqi ditën e publikimit në Gazetën Zyrtare dhe njoftimit të palëve.

Ky aktgjykim pritet të ketë ndikim të madh në zhvillimet politike, pasi e detyron Kuvendin dhe partitë parlamentare të arrijnë marrëveshje për zgjedhjen e nënkryetarit nga komuniteti serb, në mënyrë që të përmbyllet procesi i konstituimit dhe të hapet rruga për formimin e institucioneve të reja.

25 mijë euro është dënuar për shpifje Kryetari i Kuvendit të Kosovës, Dimal Basha, nga Gjykata Themelore në Ferizaj, përcjell albinfo.ch.

Gjykata e ka detyruar Bashën që t’i kërkojë publikisht falje ish-zëvendësministrit të Financave dhe i ka caktuar atij shlyerjen e pagesës në vlerë 25 mijë euro për shpifje.

Siç raporton Paparaci, Dimal Basha është dënuar për shpifje kundrejt ish-zëvendësministrit të Financave, Mustafë Grainca, anëtar i Partisë Demokratike të Kosovës.

Tashmë, kryetari i Kuvendit është obliguar nga Gjykata Themelore e Ferizajt që të paguajë dëmshpërblim në vlerë 25 mijë euro, pasi është gjetur fajtor për shpifje.

Aktgjykimi i shkallës së parë të gjykatës është shpallur më 22 korrik, sipas shkresës së lëndës.

Basha është shpallur fajtor për shpifje në lidhje me akuzat publike ndaj Graincës, një biznesmeni të ndërtimit në Ferizaj dhe ish-zyrtar me funskion publik, veprimtarinë e të cilit e kishte përshkruar si “mafi të betonit”.

Gjykata e ka aprovuar pjesërisht si të bazuar padinë e Graincës ndaj Bashës, thuhet në dispozitivin e aktgjykimit.

“Aprovohet pjesërisht si e bazuar kërkesëpadia e paditësit Mustafë Grainca, e ushtruar kundër të paditurit Dimal Basha, si e bazuar”, thuhet në pikën e parë të dispozitivit të aktgjykimit.

Basha, në një deklarim publik më 2019 e kishte akuzuar Graincën për keqpërdorime dhe parregullsi në biznesin e ndërtimit në Komunën e Ferizajt, duke e përshkruar veprimtarinë e tij si “mafi të betonit”.

Disa javë më vonë atë vit, në korrik të 2019-s, Mustafë Grainca, ish-zëvendësministër i Financave nga Partia Demokratike e Kosovës (PDK), ushtroi padi për shpifje dhe fyerje të personalitetit kundër Bashës, asokohe gazetar në një televizion.

Sipas kërkesë-padisë, Grainca kërkonte nga Basha dëmshpërblim në formë kompensimi prej 65 mijë eurove.

Grainca është një afarist në fushën e ndërtimit. Ai është pronar i “IDEA Invest” Sh.P.K., e cila është themeluar më 2015. Në Agjencinë për Regjistrimin e Bizneseve, kompania figuron të ketë aktivitet primar ndërtimin e objekteve banesore dhe jobanesore.

Më parë, ai ka qenë i përfshirë në Partinë Demokratike të Kosovës. Ka ushtruar për më shumë se një vit funksionin e zëbvendësministrit të Financave.

Duke folur për një takim në të cilin Bernard Kouchner kishte udhëtuar për në Kosovë në shtator të 1999-ës që t’i binde komandantët e zonave për përmbushjen e kushteve të demilitarizimit, James Peter Covey tregoi se Hashim Thaçi nuk foli fare dhe se marrëdhënia e tij me komandantët e zonave ishte e ndërlikuar, përcjell albinfo.ch.

“Kjo më kujtohet fare qartë se dukej sikur po konfirmonte fuqishëm atë që ne besonim që në fillim lidhur me zotin Thaçi kur jemi njohur me atë. Pra, që ai kishte një marrëdhënie të vështirë-ndërlikuar me komandantët e UÇK-së në terren dhe se ata kishin pak kohë ose më mirë thënë kishin shfaqur mungesë respekti ndaj tij. S’kishin respekt”, tha dëshmitari, raporton “Betimi për Drejtësi“.

Përpara kësaj, dëshmitarit  iu prezantua një pikturë në një libër që pretendohet se është i shkruar nga gjenerali Mike Jackson. Në këtë pikturë shiheshin pjesëmarrësit e këtij takimi.

Presidentja e Kosovës, Vjosa Osmani, ka takuar presidentin e Argjentinës, Javier Milei, gjatë pritjes së organizuar nga presidenti amerikan, Donald Trump, në kuadër të aktiviteteve përcjellëse të Asamblesë së Përgjithshme të Kombeve të Bashkuara, përcjell albinfo.ch.

“Në pritjen e presidentit Trump në New York, krah liderëve të tjerë botërorë – diskutime të rëndësishme në interes të Republikës së Kosovës dhe qytetarëve tanë!”, shkroi Osmani në “Facebook” të shtunën në mbrëmje, pa dhënë detaje specifike.

Fotografia e Osmanit me Milein ka nxitur debat në Argjentinë, për shkak se ky vend refuzon ta njohë Kosovën. Qëndrimi i Buenos Aires ka qenë i qartë që nga viti 2008, kur Kosova shpalli pavarësinë: autoritetet argjentinase e kanë kundërshtuar njohjen, duke e cilësuar një precedent të rrezikshëm për çështjen e Ishujve Falkland.

Recently Spotted Asteroid Set for Near Miss With Earth

“Përbuzje ndaj Ishujve Malvinas. Milei në OKB u fotografua – buzagaz – pranë përfaqësueses së Kosovës, duke refuzuar qëndrimin tonë historik mbi integritetin territorial”, shkroi ish-Ministri i Jashtëm, Santiago Cafiero, duke përmendur edhe misionin paqeruajtës të Forcës së Sigurisë së Kosovës në Ishujt Falkand.

Ish-sekretari i Ishujve Falkland, Guillermo Carmona, reagoi gjithashtu pas fotografisë të dy liderëve, duke kritikuar presidentin argjentinas: Argjentina pretendon sovranitet mbi ishujt, duke i konsideruar pjesë të territorit të saj historik, kurse Britania e Madhe administron ishujt dhe i konsideron pjesë të territorit të saj jashtëkontinental.

“Është jashtëzakonisht serioze që Milei është fotografuar – dhe ndoshta ka zhvilluar një takim – me dikë që pretendon të jetë president i një entiteti që Argjentina nuk e njeh si shtet, duke kundërshtuar qëndrimin tonë në lidhje me integritetin territorial”.

Në të kaluarën, emri i Kosovës është përdorur nga presidenti argjentinas vetëm në kontekste metaforike. Milei ka përdorur shprehjen “Esto es Kosovo/Kjo është Kosova” për të ilustruar një gjendje të çrregullt. Megjithatë, këto referenca kanë qenë jashtë kontekstit diplomatik dhe nuk përbëjnë qëndrim të artikuluar politik për Kosovën

Sot përfundon masa e përkohshme e vendosur nga Gjykata Kushtetuese me 5 shtator me të cilën ka pezulluar të gjitha veprimet dhe vendimet e deputetëve të Kuvendit të Kosovës, përcjell albinfo.ch.

Kjo masë e pezullimit erdhi si pasojë e ankesës së Listës Serbe pasi Kuvendi i Kosovës dështoi të zgjedh një nënkryetar nga minoriteti serb.

Kryetari i Kuvendit, Dimal Basha e kishte ndërprerë seancën konstituive duke e cilësuar si të konstituuar institucionin legjislativ.

Kryeparlamentari Dimal Basha në seancën që ka nis zgjedhja e nënkryetarëve nga komuniteti serb, ka ndarë procesin e votimit për nënkryetarët nga radhët e komuniteteve.

Këtë procedurë Lista Serbe e pati quajtur si kundër ligjeve dhe rregullores së Kuvendit. Megjithatë, nëntë deputetët e kësaj partie nuk kanë marrë shumicën e votave në Kuvend për t’u zgjedhur nënkryetar.

Votat nuk i mori as deputeti tjetër serb, Nenad Rashiq, që nuk i takon këtij grupi.