Kupa e Botës 2026 do të zhvillohet nga 11 qershori deri më 19 korrik, duke shënuar herën e parë që turneu do të zgjasë me 48 ekipe të ndara në 12 grupe. Pas raundeve të fundit kualifikuese, lista e plotë e kombëtareve pjesëmarrëse është kompletuar, përcjell albinfo.ch.

Ndër vendet e fundit që siguruan pjesëmarrjen ishin:

Iraku, i cili mundi Bolivinë 2-1 në finalen kualifikuese ndërkontinentale dhe rikthehet në Botëror pas një mungese që nga 1986.
Republika Demokratike e Kongos, e cila mundi Xhamajkën 1-0 pas kohës shtesë.

Në fazën kualifikuese pati fitore të mëdha evropiane: Turqia mposhti Kosovën, Suedia eliminon Poloninë, Bosnja dhe Hercegovina përmbysi Italinë në penallti, ndërsa Çekia mundi Danimarkën.

Ja grupet e plota për Botërorin 2026:

Grupi A: Meksika, Afrika e Jugut, Koreja e Jugut, Republika Çeke
Grupi B: Kanadaja, Bosnja dhe Hercegovina, Katari, Zvicra
Grupi C: Brazili, Maroku, Haiti, Skocia
Grupi D: SHBA, Paraguai, Australi, Turqi
Grupi E: Gjermania, Kurasao, Bregu i Fildishtë, Ekuador
Grupi F: Holanda, Japoni, Suedia, Tunizia
Grupi G: Belgjika, Egjipti, Irani, Zelanda e Re
Grupi H: Spanja, Kepi i Gjelbër, Arabia Saudite, Uruguai
Grupi I: Franca, Senegali, Iraku, Norvegjia
Grupi J: Argjentina, Algjeria, Austria, Jordania
Grupi K: Portugalia, Republika Demokratike e Kongos, Uzbekistani, Kolumbia
Grupi L: Anglia, Kroacia, Gana, Panama

Ky Botëror pritet të jetë më i madhi në histori dhe premton gara të forta, surpriza dhe përballje të paharrueshme mes 48 kombëtareve më të mira të botës./Albinfo.ch

Botërori 2026 i Futbollit po afrohet dhe tashmë janë publikuar parashikimet e para për skuadrat favorite që mund të fitojnë Kupën e Botës, e cila do të zhvillohet në SHBA, Kanada dhe Meksikë, përcjell albinfo.ch.

Sipas analizave dhe kuotave të fundit, Spanja konsiderohet favoritja kryesore për të fituar titullin, pas suksesit në Euro 2024 dhe formimit të një skuadre të re me shumë talente.

Pas saj renditen Anglia dhe Franca, të cilat kanë ekipe shumë të forta dhe përvojë në turne ndërkombëtare, ndërsa Brazili dhe Argjentina mbeten gjithmonë pretendentë për shkak të historisë dhe cilësisë së lojtarëve.

Skuadra surprizë që mund të shkojë larg përmenden Norvegjia, Maroku dhe Holanda.

Ky Botëror do të jetë më i madhi në histori, me 48 skuadra të kualifikuara, dhe do të zhvillohet nga 11 qershori deri më 19 korrik 2026. Parashikimet e hershme tregojnë se garat do të jenë më intensive se kurrë, me shumë surpriza të mundshme./Albinfo.ch

Pavarësisht humbjes 1-0 në “Fadil Vokrri”, paraqitja e Kosovës u vlerësua pozitivisht, ndërsa Kreshnik Hajrizi u shpall lojtari më i mirë i ekipit sipas “SofaScore”, përcjell albinfo.ch

Paraqitja e Kombëtares së Kosovës ndaj Turqisë është vlerësuar lart, pavarësisht se “Dardanët” u mposhtën minimalisht me rezultat 1-0 në stadiumin “Fadil Vokrri”, duke humbur mundësinë për kualifikim në Kampionatin Botëror 2026.

Kosova ishte e barabartë me Turqinë në shumë faza të lojës, duke treguar organizim dhe luftë në fushë, megjithëse mbrojtja kosovare u vu në presion të vazhdueshëm nga yjet turq dhe emrat e njohur të futbollit evropian.

Sipas faqes së specializuar për statistika në futboll, “SofaScore”, mbrojtësi Kreshnik Hajrizi ishte lojtari më i mirë i Kosovës në këtë takim. Ai u vlerësua me notën 7.4, më e larta nga të gjithë futbollistët kosovarë.

Pas tij, me notën 7.2, u vlerësuan Lumbardh Dellova dhe Fisnik Asllani, ndërsa Florent Muslija mori notën 6.9.

Portieri Aro Muriq dhe mesfushori Veldin Hoxha u vlerësuan me 6.7, ndërsa Albian Hajdari dhe Dian Gallapeni me 6.6.

Kapiteni Vedat Muriqi u vlerësua me notën 6.5, njëjtë si Mërgim Vojvoda, ndërsa Elvis Rexhbeçajmori notën 6.3.

Nga futbollistët e futur në lojë si zëvendësues, Edon Zhegrova u vlerësua me 6.9, ndërsa Fidan Alitidhe Milot Rashica me nga 6.5.

Në anën tjetër, lojtari më i vlerësuar i ndeshjes ishte mesfushori i Turqisë, Orkun Kokçu, i cili mori notën më të lartë, 8.2.

Ndërkohë, “FlashScore” kishte vlerësime më të ulëta, ku Dellova u vlerësua me 7.1, ndërsa Hajrizi me 7.0. Futbollistët e tjerë të Kosovës morën nota më të vogla se 7, ndërsa Rexhbeçaj u vlerësua më së paku me 5.4. Edhe kjo platformë e shpalli Kokçun si lojtarin më të mirë të takimit.

Vlerësimet në këto faqe bazohen në shumë elemente statistikore të lojës, përfshirë duelet, pasimet, ndërhyrjet, pozicionimin, rastet e krijuara dhe ndikimin e përgjithshëm në ndeshje./Albinfo.ch

Përzgjedhësi i Kombëtares së Turqisë, Vincenzo Montella, ka folur me respekt të madh për Kombëtaren e Kosovës pas finales së play-off-it për Kupën e Botës 2026, duke vlerësuar paraqitjen dhe organizimin e “Dardanëve”, pavarësisht eliminimit, përcjell albinfo.ch.

Pas një ndeshjeje të luftuar deri në fund, ku Turqia arriti të triumfojë me rezultat minimal dhe të sigurojë kualifikimin në Botëror, trajneri italian pranoi se Kosova ishte një kundërshtar i vështirë dhe i rrezikshëm për ekipin e tij.

“Kosova na vuri në shumë telashe. Ne ishim të përgatitur për këtë sepse Kosova ka një ekip shumë cilësor, por është për të ardhur keq që vetëm një ekip mund të kualifikohet për Kupën e Botës”, u shpreh Montella pas ndeshjes.

Ai shtoi se kjo përballje tregoi qartë potencialin e Kosovës, duke e cilësuar atë si një skuadër në ngritje, e cila mund të rivalizojë me çdo kundërshtar në arenën ndërkombëtare.

Sipas Montellës, performanca e Kosovës ishte dëshmi se ekipi kosovar ka cilësi dhe strukturë të fortë, ndërsa eliminimi erdhi më shumë si rezultat i detajeve të vogla që vendosin ndeshje të këtij niveli.

Në fund, Turqia ishte ajo që siguroi biletën për Botërorin 2026, duke i dhënë fund ëndrrës historike të Kosovës për pjesëmarrjen e parë në Kampionatin Botëror.

Megjithatë, paraqitja e Kosovës u vlerësua gjerësisht, jo vetëm nga tifozët, por edhe nga kundërshtarët, duke konfirmuar se “Dardanët” janë një përfaqësuese që premton shumë për të ardhmen./Albinfo.ch

Presidenti turk u shpreh i lumtur pas triumfit 1-0 në “Fadil Vokrri”, duke uruar sukses për Turqinë në Kupën e Botës 2026 dhe duke theksuar rikthimin pas 24 vitesh në skenën më të madhe të futbollit, përcjell albinfo.ch.

Presidenti i Turqisë, Recep Tayyip Erdogan, ka reaguar pas fitores së Kombëtares së Turqisë ndaj Kosovës, fitore kjo që i siguroi turqve kualifikimin në Kampionatin Botëror 2026.

Turqia triumfoi me rezultat minimal 1-0 në stadiumin “Fadil Vokrri” në Prishtinë, në finalen e “play-off”-it, duke siguruar kështu biletën për Botërorin e ardhshëm.

Pas këtij suksesi të rëndësishëm, Erdogan nuk ka munguar me një reagim publik në platformën “X”, ku ka përgëzuar ekipin kombëtar për arritjen e madhe.

“E përgëzoj me gjithë zemër Kombëtaren tonë A, Djemtë Tanë, për sigurimin e një vendi në finalet e Kupës së Botës duke mposhtur Kosovën në finalen e play-off-it për Botërorin 2026”, ka shkruar Erdogan.

Ai ka theksuar se Turqia do të rikthehet në Kupën e Botës pas 24 vitesh, duke shprehur besim të plotë se ekipi do të përfaqësojë me krenari shtetin turk në arenën ndërkombëtare.

“I uroj suksese Kombëtares sonë, e cila do ta valëvitë flamurin tonë me gjysmëhënë dhe yll në skenën më të madhe të futbollit pas 24 vitesh”, ka shtuar ai.

Erdogan ka përmendur edhe kundërshtarët e Turqisë në fazën e grupeve, Australinë, Paraguajin dhe SHBA-në, duke shprehur shpresën që ekipi të shkojë sa më larg në turne.

“Kemi besim të plotë se Djemtë Tanë do ta çojnë fanellën me gjysmëhënë dhe yll nga fitorja në fitore dhe do ta mbushin kombin tonë me krenari. I puth të gjithë sportistët tanë në ballë”, përfundoi Erdogan.

Turqia tashmë ka siguruar pjesëmarrjen në Botërorin 2026, ndërsa Kosova mbetet jashtë, duke e përmbyllur rrugëtimin e saj historik me eliminimin në finalen e plejofit./Albinfo.ch

Sulmuesi dhe një nga kapitenët e Kosovës u shpreh i zhgënjyer pas humbjes 1-0 nga Turqia në “Fadil Vokrri”, duke thënë se ekipi dha gjithçka dhe se Kosova do të kualifikohet në një kampionat të madh në të ardhmen, përcjell albinfo.ch.

Sulmuesi i Kombëtares së Kosovës, Vedat Muriqi, ka folur me emocione pas eliminimit të “Dardanëve” nga Turqia në finalen e plejofit për kualifikim në Kupën e Botës 2026.

Kosova u mposht me rezultat minimal 1-0 në stadiumin “Fadil Vokrri” në Prishtinë, duke humbur mundësinë historike për të siguruar pjesëmarrjen e parë në Botëror.

Pas ndeshjes, Muriqi ka deklaruar se ekipi luftoi deri në fund, por sipas tij fati nuk ishte në anën e Kosovës.

“Shumë vështirë. Kemi luftuar prej ditës së parë e deri këtu. E nisëm kampanjën me humbje të thellë dhe menduam se nuk ka kthim. Por vazhduam mirë. Unë jam shumë krenar me bashkëlojtarët e mi. Jam shumë krenar që jam ndër kapitenët. Do të kisha dëshirë ta udhëheq ekipin në Amerikë, por fati nuk e deshi”, deklaroi Muriqi.

Ai shtoi se megjithëse kjo ishte një goditje e rëndë për ekipin dhe për vendin, është i bindur se Kosova do të arrijë së shpejti të kualifikohet në një turne të madh ndërkombëtar.

“Unë nuk e di a do të jem, por Kosova do të kualifikohet në një kampionat të madh. Kemi pasur shumë raste. Më dhimbset gjithë ekipi, gjithë shteti. Gjithë kjo përkrahje…”, u shpreh sulmuesi kosovar.

Muriqi po ashtu theksoi se skuadra kishte mundësi për të ndryshuar rrjedhën e ndeshjes, por mungoi realizimi në momentet vendimtare.

Humbja ndaj Turqisë i dha fund rrugëtimit të Kosovës në plejofin e Botërorit 2026, megjithatë paraqitja dhe përkrahja masive nga tifozët në “Fadil Vokrri” konfirmuan edhe një herë rritjen dhe potencialin e kësaj përfaqësueseje./Albinfo.ch

Federata e Futbollit të Kosovës reagoi pas humbjes minimale 0-1 në “Fadil Vokrri”, duke theksuar krenarinë për angazhimin e “Dardanëve” në rrugëtimin drejt Botërorit 2026, përcjell albinfo.ch.

Ëndrra e Kosovës për kualifikim në Kampionatin Botëror 2026 është shuar sonte në Prishtinë.

“Dardanët” nuk arritën të sigurojnë biletën historike për Botërorin, pasi në ndeshjen vendimtare të zhvilluar në stadiumin “Fadil Vokrri” u mposhtën minimalisht me rezultat 0-1 nga Kombëtarja e Turqisë.

Pas përfundimit të takimit, ka reaguar Federata e Futbollit të Kosovës (FFK), e cila pavarësisht zhgënjimit nga eliminimi, ka shprehur krenari për përfaqësuesen dhe për luftën e treguar gjatë gjithë rrugëtimit.

“Nuk ia dolëm, por gjithmonë KRENAR ME DJEMTË TANË”, ka shkruar FFK në reagimin e saj.

Kosova ishte vetëm një hap larg realizimit të ëndrrës së madhe për të qenë për herë të parë pjesë e një Kampionati Botëror, por rrugëtimi përfundoi me humbjen ndaj Turqisë, ndërsa përfaqësuesja kosovare pritet tashmë të fokusohet në synimet e ardhshme ndërkombëtare./Albinfo.ch

Mediumi prestigjioz britanik i kushton hapësirë ëndrrës së Kosovës për Botërorin 2026, duke theksuar progresin e shpejtë nga ndeshja e parë e lejuar nga FIFA deri te finalja vendimtare e plejofit, përcjell albinfo.ch.

Mediumi prestigjioz britanik BBC i ka kushtuar vëmendje rrugëtimit të Kombëtares së Kosovës në përpjekjen për një kualifikim historik në Kupën e Botës, duke e cilësuar atë si një histori të jashtëzakonshme zhvillimi dhe ambicieje në një periudhë të shkurtër kohore.

Në artikullin e saj, BBC thekson se humbja në ndeshjen vendimtare ndaj Turqisë i dha fund ëndrrës së Kosovës për pjesëmarrjen e parë në një Botëror, duke vënë në pah faktin se kjo ndodhi më pak se 10 vjet pasi Kosova luajti ndeshjen e parë kualifikuese për Kupën e Botës.

Sipas mediumit britanik, ky është një tregues i qartë i progresit të madh të një përfaqësueseje të re në arenën ndërkombëtare.

BBC rikujton se Kosova, e cila shpalli pavarësinë në vitin 2008, u lejua nga FIFA të luante ndeshjen e parë në mars të vitit 2014, kur barazoi 0-0 me Haitin.

“Ndeshja e tyre e dytë ishte një humbje 6-1 ndaj Turqisë”, shkruan BBC, duke e konsideruar këtë fakt si një kontrast të madh me përparimin që Kosova ka bërë deri te përballja e fundit vendimtare.

Në shkrim theksohet edhe paraqitja solide e Kosovës në fazën kualifikuese, ku ekipi përfundoi grupin vetëm tre pikë prapa Zvicrës, duke qenë shumë pranë një kualifikimi të drejtpërdrejtë në Botëror.

Ky rezultat e dërgoi Kosovën në “Path C” të plejofit, ku në gjysmëfinale arriti një fitore dramatike 4-3 ndaj Sllovakisë, një ndeshje që BBC e përshkruan si emocionuese.

Megjithatë, sipas mediumit britanik, Kosova nuk arriti të bëjë hapin e fundit në përballjen vendimtare ndaj Turqisë, në një ndeshje ku “fituesi merrte gjithçka”.

Artikulli i BBC përfundon duke e portretizuar Kosovën si një përfaqësuese që ka ndërtuar një rrugëtim të shpejtë dhe të fuqishëm drejt majës, duke treguar se ëndrra e Botërorit mund të jetë më afër sesa kurrë më parë./Albinfo.ch

Selektori i Kosovës, Franco Foda, tha se disfata 1-0 në “Fadil Vokrri” ishte zhgënjyese, por konfirmoi se nuk ka ndërmend të largohet dhe se synimi i radhës është kualifikimi në Kampionatin Evropian, përcjell albinfo.ch.

Selektori i Kombëtares së Kosovës, Franco Foda, ka folur pas humbjes zhgënjyese ndaj Turqisë, në finalen e plejofit për kualifikim në Kupën e Botës 2026.

Turqia triumfoi me rezultat minimal 1-0 në stadiumin “Fadil Vokrri”, duke siguruar biletën për Botërorin 2026, ndërsa Kosova mbeti vetëm një hap larg realizimit të ëndrrës historike.

Pas përfundimit të ndeshjes, Foda ka deklaruar se nuk ka ndërmend të largohet nga posti i selektorit, duke theksuar se projekti i tij me Kosovën vazhdon dhe se objektivi kryesor mbetet kualifikimi në Kampionatin Evropian.

“Kam pasur arsyen time që kam ardhur te Kosova, qëllimi ishte Evropiani që të kualifikohemi, sonte dështuam. Çdo gjë ka shkuar më shpejt se ç’kemi menduar. Qëllimi ynë mbetet Evropiani”, ka deklaruar Foda për “RTK”.

Ai ka shtuar se ndihet mirë në Kosovë dhe se nuk e sheh largimin si opsion.

“Jo nuk e kam plan ta lë Kosovën, më pëlqen vendi dhe njerëzit”, u shpreh ai.

Foda ka theksuar gjithashtu se skuadra është e mërzitur pas eliminimit, por ka lënë të kuptohet se Kosova kishte mundësi reale për t’u kualifikuar edhe ndaj një kundërshtari të fortë si Turqia.

Sipas tij, pavarësisht zhgënjimit të madh, Kombëtarja duhet të rikthehet më e fortë dhe të fokusohet në objektivin e ardhshëm, që mbetet kualifikimi në Evropian./Albinfo.ch

Përfundimi i ndeshjes ndaj Turqisë nuk solli vetëm eliminimin e Kosovës nga ëndrra për Botërorin, por edhe një nga momentet më prekëse të mbrëmjes.

Vedat Muriqi, një nga figurat kryesore të “Dardanëve”, u pa i thyer emocionalisht sapo u mbyll takimi.

Kosova luftoi me zemër deri në fund, por nuk arriti të ndryshojë fatin e takimit pas golit të pësuar në pjesën e dytë. Humbja i dha fund një rruge të gjatë dhe një ëndrre që ishte shumë pranë realizimit.

Lotët e Muriqit u bënë simbol i zhgënjimit, por edhe i pasionit dhe përkushtimit që kjo skuadër ka treguar gjatë gjithë rrugëtimit.