Një në pesë fëmijë të vegjël në Zvicër flet rrallë ose fare gjermanisht. Gjithnjë e më shumë kantone dhe komuna po zhvillojnë testime gjuhësore për fëmijët trevjeçarë.

Edhe pse lindin në Zvicër, shumë fëmijë nuk mësojnë asnjë fjalë gjermanisht në shtëpi. Kjo ua vështirëson ndjeshëm komunikimin në kopsht. Të dhënat e reja nga Universiteti i Bazelit, siguruar ekskluzivisht nga SRF, tregojnë se 55 për qind e fëmijëve flasin një ose më shumë gjuhë të huaja në shtëpi, dhe një në pesë fëmijë të vegjël flet shumë pak ose aspak gjermanisht.

Testime gjuhësore nga kantonet dhe komunat

Për këtë arsye, gjithnjë e më shumë kantone dhe komuna kanë filluar të kryejnë testime gjuhësore. Një pyetësor vlerëson njohuritë e gjuhës gjermane te fëmijët para se të hyjnë në kopsht. Nëse niveli i gjuhës është i pamjaftueshëm, fëmijët detyrohen të ndjekin kurse gjermane para fillimit të kopshtit, transmeton albinfo.ch.

“Nëse nuk mund të komunikosh me fjalë, duhet të bërtasësh ose të godasësh për të tërhequr vëmendjen”, thotë Cornelia Bosshart, udhëheqëse e një grupi lojërash.

Shanaya, që flet portugalisht në shtëpi, ndjek dy herë në javë grupin e lojës “Purzelbaum” në Matzingen, kantoni i Thurgau. Aty ajo mëson gjermanisht për t’u përshtatur më lehtë më vonë në kopsht.

Në Thurgau, 25% e fëmijëve të testuar kishin njohuri të dobëta të gjermanishtes. Sipas Bosshart, kur fëmijët nuk e kuptojnë gjuhën, ata shpesh shfaqin sjellje të vështira. “Kjo ka ndikim të madh edhe në arsimimin e tyre të mëvonshëm.”

Gjermanishtja ndihmon edhe në zhvillimin emocional

Marina Jambreus nga Universiteti i Bazelit, e cila ka bashkëzhvilluar pyetësorët, thekson: “Kur fëmijët hasin për herë të parë në gjermanisht vetëm në kopsht, ata mbeten prapa të tjerëve. Është e vështirë të kapin ritmin.” Sipas saj, gjuha ndihmon edhe në përpunimin emocional: “Fëmijët që mund të shprehin emocionet përmes gjuhës, dinë edhe t’i kontrollojnë ato më mirë. Të tjerët përjetojnë stres ose tërhiqen shoqërisht.”

Njohuri të dobëta në gjermanisht, edhe pse me pasaportë zvicerane

Në Thurgau, 25% e fëmijëve të testuar kishin njohuri të pamjaftueshme të gjermanishtes. Në disa komuna, si Bischofszell, deri në 47% e këtyre fëmijëve kishin pasaportë zvicerane. Kjo ka befasuar edhe autoritetet.

Beat Brüllmann, shef i Zyrës për Shkollat Popullore, thotë: “Edhe neve na habiti. Mendojmë se kjo ndodh për shkak të martesave me persona që flasin gjuhë të huaja.” Edhe pse prindërit flasin gjermanisht, shumë fëmijë rriten me gjyshërit dhe komunikojnë me ta në një gjuhë tjetër.

Promovimi i hershëm i gjuhës lehtëson punën në kopsht

Vizitat në çerdhe dhe grupe loje për fëmijët trevjeçarë me mangësi në gjermanisht i kushtojnë kantonit Thurgau rreth 2 milionë franga në vit. Fillimisht ishte planifikuar që prindërit të paguanin, por Gjykata Federale e ndaloi këtë masë.

Restorantet në Zvicër kanë arritur një rezultat mesatar të kënaqësisë prej 85 pikësh në vitin 2024, duke kaluar me pak konkurrentët gjermanë, të cilët morën 84.8 pikë.

Në renditjen më të re të gastronomisë, St. Gallen dhe Winterthur ndajnë vendin e parë. Ndërkohë që shërbimi vazhdon të jetë një pikë kritike, vlerësimet ndërkombëtare janë në rritje  veçanërisht ato nga Azia dhe bota arabe, transmeton albinfo.ch.

Më pak komente, më shumë zëra ndërkombëtarë

Megjithëse numri i përgjithshëm i komenteve ra pak krahasuar me vitin e kaluar  sidomos në Ticino  vërehet një rritje e madhe nga vizitorët ndërkombëtarë. Komentet nga Kina u rritën me 56%, nga vendet arabe me mbi 15% dhe nga Turqia me 74.5%.

Megjithatë, shumë vizitorë arabishtfolës kritikojnë shërbimin,  ata ndihen të padëshiruar për shkak të prejardhjes së tyre ose ankohen për mungesën e përshtatjes së ushqimeve ndaj zakoneve të tyre, si p.sh. fondue me alkool.

St. Gallen dhe Winterthur në krye, Lozana po përmirësohet

St. Gallen dhe Winterthur ndajnë vendin e parë për vitin 2024. Lozana ende nuk arrin nivelin e tyre, por ka përmirësimin më të madh, me një rritje prej 3%.

Chur gjithashtu spikat për cilësinë e ushqimit, shërbimit dhe raportit çmim-vlerë   edhe pse ka marrë më pak komente në total.

Lavdërime ose kritika,  shumë pak mes tyre

Një prirje e dukshme është polarizimi i vlerësimeve: 76% e komenteve janë ose shumë pozitive ose shumë negative. Vizitorët e pakënaqur japin zakonisht vetëm një yll, ndërsa të kënaqurit japin pesë yje. Në përgjithësi, 86.1% e vlerësimeve për restorantet zvicerane janë pozitive.

Shërbimi nën presion   veçanërisht gjatë fundjavave

Kritikat ndaj shërbimit dhe raportit çmim-vlerë janë më të theksuara gjatë fundjavave dhe në muajin gusht. Ushqimi dhe ambienti marrin vlerësime të qëndrueshme, por pikët bien të shtunave dhe të dielave. Gushti, që është periudha më e ngarkuar për gastronominë, sjell më shumë komente  por edhe vlerësimet më të ulëta.

Rreth studimit “Gastro WebReview 2025”

Ky studim është kryer për herë të gjashtë për restorantet në Zvicër dhe për herë të pestë në Gjermani. Janë analizuar mbi 600,000 komente online për gati 5,000 restorante në 16 qytete për secilin vend. Studimi është realizuar nga kompania zvicerane re:spondelligent dhe konsiderohet ndër më të besueshmit në fushën e vlerësimeve online të restoranteve.

Rregullatori i çmimeve në Zvicër ka vendosur se tarifat e komisionit të Booking.com për hotelet në vend janë të tepërta. Si rezultat, platforma e udhëtimeve është urdhëruar të ulë këto tarifa me afro 25%. Booking.com e ka kundërshtuar vendimin dhe njofton se do ta apelojë në Gjykatën Federale Administrative.

Rregullatori ka konstatuar se Booking.com bie nën juridiksionin e ligjit zviceran për monitorimin e çmimeve dhe se tarifat që aplikon janë të pajustifikuara. Pas përpjekjeve të pasuksesshme për negociata intensive me kompaninë, është marrë vendimi për uljen e detyruar të komisioneve.

Kompania do të ketë tre muaj për të zbatuar vendimin, pas hyrjes në fuqi të tij. Masa është e përkohshme dhe do të qëndrojë në fuqi për tre vjet, transmeton albinfo.ch.

Reagimi i Booking.com

Booking.com e ka cilësuar vendimin si të padrejtë dhe ka deklaruar se do ta apelojë. Kompania argumenton se përdorimi i platformës nga hotelet është vullnetar dhe se komisionet reflektojnë vlerën që ajo ofron për partnerët.

“Komisionet nuk do të ndryshojnë për sa kohë që është në proces apelimi,” tha kompania për agjencinë Keystone-SDA.

Praktikat e çmimeve në fokus

Booking.com është përballur me kritika edhe më parë për politikat e saj të çmimeve. Rreth tre vite më parë, Parlamenti Zviceran ndaloi platformat si Booking.com të përfshijnë klauzola që detyrojnë hotelet të mos ofrojnë çmime më të ulëta në faqet e tyre zyrtare. Ky qasje u mbështet nga Gjykata Evropiane e Drejtësisë në një vendim të dhënë shtatorin e kaluar.

Për shkak të zgjedhjes personale apo mungesës së banesave, shumë punëtorë, kryesisht nga Franca, flenë në furgonë apo kamionë të përshtatur për jetesë dhe të parkuar në Zvicrën frëngjishtfolëse. Në përgjigje të numrit gjithnjë në rritje dhe ankesave nga përdorues të tjerë, autoritetet në Lausanne kanë marrë masa kufizuese.

Disa javë më parë, qyteti i Lausanne vendosi në heshtje kufizime në disa parkingje në jug të qytetit. Ndërkohë që gjatë dimrit disa punëtorë të huaj kishin qëndruar pa shumë probleme pranë liqenit, situata ka ndryshuar ndjeshëm, sipas një të reje franceze që fle në një furgon të vogël të përshtatur.

Ajo, e cila vjen rregullisht në Zvicër për projekte të përkohshme, kryesisht për vendosjen dhe çmontimin e skenave në evente kulturore, tregon se javën e kaluar nuk mundi të hynte në parkingjet në zonën e Vidy-t për shkak të “gurëve të mëdhenj që kufizojnë kalimin në dy metra”. “Jam e tronditur nga kjo situatë”, thotë ajo.

240 franga gjobë

Një tjetër punëtor mobil i tregoi RTS-së për përvojën e tij. Ai e kishte lënë furgonin në parkingun afatgjatë në Le Bourget dhe ishte kthyer në Francë për pushimet shkollore. Kur u kthye, gjeti gjashtë gjoba në xhamin e parë të automjetit  nga 40 franga secila, në total 240 franga  edhe pse kishte paguar lejen për parkim.

Sipas policisë, gjobat u dhanë sepse automjeti tejkalonte paksa hapësirën e përcaktuar për parkim. Por duket se qëllimi është largimi i këtyre përdoruesve nga parkingjet pranë liqenit. Më 20 shkurt, policia ndryshoi sinjalistikën në të gjitha parkingjet në jug të qytetit, duke ndaluar parkimin e karavanëve dhe shtëpizave të lëvizshme nga mesnata deri në orën 08:00 të mëngjesit.

Një fenomen në rritje

Pierre-Antoine Hildbrand, zyrtar komunal përgjegjës për sigurinë dhe ekonominë në Lausanne, deklaroi për La Matinale:

“Vitet e fundit kemi vënë re një rritje të ndjeshme të prezencës së karavanëve, sidomos në parkingjet pranë liqenit, me njerëz që vendosen aty për periudha të gjata  javë apo muaj të tërë. Kjo shkaktoi pakënaqësi në mesin e qytetarëve, që nuk mund të përdornin këto hapësira, ose që nuk e kuptonin si zbatohej rregullorja.”

Ai shton se: “Komuna vendosi të kufizojë përdorimin e këtyre hapësirave dhe të ndalojë parkimin e karavanëve në parkingjet buzë liqenit.”, transmeton albinfo.ch.

Roli i punëdhënësve?

Hildbrand thekson se punëdhënësit duhet të marrin më shumë përgjegjësi, duke siguruar paga që lejojnë punëtorët të gjejnë banesa, ose të qëndrojnë në kampingje të përshtatura.

Por vetë punëtorët nomadë thonë se shpesh u ndalohet hyrja në kampingje, që sipas tyre preferojnë turistët. Megjithatë, disa punëdhënës ofrojnë vende specifike për parkim për stafin që jeton në automjete  si në rastin e Montreux Jazz Festival, që siguron hapësira të posaçme për kamionë gjatë ndërtimit dhe çmontimit të skenave.

Fenomen i përhapur edhe në qytete të tjera

Edhe qytete të tjera në Zvicrën frëngjishtfolëse janë prekur nga ky fenomen. Në Perroy, përgjatë bregut të Vaud-it, parkingu pranë plazhit ishte kthyer në vend të preferuar për punëtorët e huaj. Aty, autoritetet kanë ndërhyrë me sinjalistikë ndaluese dhe diskutime të shumta me përdoruesit, duke e zgjidhur situatën, sipas anëtares së komunës, Hélène Saxer.

Zvicra do të ndërpresë deri në fund të vitit 2025 transportin hekurudhor të kamionëve me shofer, një shërbim i rëndësishëm për lëvizjen e mallrave përmes Alpeve. Vendimi vjen për shkak të ndërprerjeve të shumta në rrjetin hekurudhor në Gjermani dhe vështirësive ekonomike që përballojnë operatorët RAlpin dhe CFF Cargo, të cilët kanë njoftuar shkurtim vendesh pune dhe mbyllje terminalesh, transmeton albinfo.ch.

Kjo ndalesë pritet të sjellë një rritje të ndjeshme të trafikut rrugor, me rreth 70,000 kamionë shtesë në vit, duke rrezikuar objektivat klimatikë të vendit dhe duke përmbysur politikat e transferimit të mallrave nga rruga në hekurudhë. Ndërsa disa ekspertë e konsiderojnë vendimin të papërgjegjshëm, të tjerë theksojnë se është pjesë e zhvillimit drejt transportit të kombinuar pa shoferë, si zgjidhje afatgjatë për mungesën e shoferëve dhe sfidat logjistike.

Gjithnjë e më shumë të rinj po marrin pension invaliditeti – kryesisht për shkak të sëmundjeve mendore. Tani, bordi i Konferencës së Zyrave të Sigurimit për Invaliditet (IV) po propozon masa drastike: një kufi moshe dhe mundësinë për pensione të përkohshme.

Shifrat janë alarmante: 7,399 persona të moshës 18 deri në 24 vjeç marrin pension invaliditeti për shkak të problemeve mendore  që përbën dy të tretat e të gjithë përfituesve në këtë grupmoshë. Statistikat e publikuara këtë javë janë shqetësuese edhe për vetë sigurimin për invaliditet (IV). Thomas Pfiffner, nënkryetar i Konferencës së Zyrave IV (IVSK), propozon masa drastike për emisionin “Rundschau”:

“Ne do ta mbështesnim fuqimisht këtë,” thotë Pfiffner

Sipas tij, personat nën 30 vjeç nuk do të marrin më pension invaliditeti. Në vend të tij, do të ofrohej një kompensim tjetër  më i ulët,  me kushte të caktuara, si pjesëmarrja në programe integrimi me prag të ulët dhe trajtim mjekësor. “Nga perspektiva e sigurimit për invaliditet, kjo do të ishte një ndryshim i madh: do të mbanim dosjen hapur dhe do të vazhdonim të ndjekim personin përmes menaxhimit aktiv të rastit,” shton ai.

Pension IV për tre vjet, jo për gjithë jetën

IVSK dëshiron gjithashtu të rishikojë të drejtën për pension në përgjithësi. Aktualisht, sapo dikush merr një pension, është pothuajse e pamundur të kthehet në punë. Sipas Pfiffner, kjo është “mangësia kryesore” e sistemit. Ai propozon që në të ardhmen të mundësohet dhënia e pensioneve të përkohshme. Aktualisht, kjo nuk është e mundur dhe heqja e një pensioni IV është shumë e vështirë: “Kërkohet përmirësim i gjendjes shëndetësore  dhe kjo është e vështirë për t’u provuar nëse i siguruari nuk e dëshiron atë.”

Pfiffner shpreson gjithashtu për një ndryshim në qëndrimin e të siguruarve: “Nëse ke një pension të përhershëm, e përshtat jetën tënde me atë. Por nëse e di që pensioni do të zgjasë vetëm tre vjet, është një situatë krejtësisht tjetër.”

Konferenca e Zyrave IV ka propozuar këto masa për Këshillin Federal për rishikimin e ardhshëm të sistemit IV. Këshilli pritet t’i diskutojë për herë të parë përpara pushimeve verore.

Presidentja e Zvicrës, Karin Keller-Sutter, ka theksuar se Zvicra mbështet përpjekjet e Kosovës për integrim ndërkombëtar, por ka bërë të qartë se anëtarësimi në Këshillin e Evropës është çështje që vendoset nga vetë shtetet anëtare.

Deklarata u bë në një konferencë për media të mbajtur pas takimit me Presidenten e Kosovës, Vjosa Osmani, e cila po zhvillon vizitën e parë shtetërore të një presidenti të Kosovës në Zvicër. E pyetur konkretisht për mbështetjen e Zvicrës ndaj anëtarësimit të Kosovës në KiE, Keller-Sutter u shpreh: “Kjo është gjithmonë çështje e brendshme dhe vendim i shteteve anëtare. Këto janë vendime sovrane.”

Megjithatë, presidentja zvicerane nënvizoi se Zvicra ka qenë një mbështetëse e qëndrueshme e Kosovës ndër vite. “Ne gjithmonë kemi mbështetur Kosovën, organizatat multilaterale dhe përgatitjet për anëtarësim në to, përmes bashkëpunimit në demokraci, paqe, sundim të ligjit dhe zhvillim ekonomik të qëndrueshëm,” tha ajo.

Keller-Sutter përmendi gjithashtu se ish-presidenti Alain Berset, si zviceran, luan një rol në përfaqësimin e interesave në kuadër të organizatave ndërkombëtare, por theksoi se ky rol nuk përbën vendimmarrje për Zvicrën si shtet.

Në përmbyllje, ajo shprehu mbështetjen e Zvicrës për aspiratat e vendeve të Ballkanit Perëndimor për anëtarësim në Bashkimin Evropian, duke e cilësuar këtë si një proces që ndihmon stabilitetin e rajonit.

Të drejtat e fëmijëve nuk konsiderohen ende një përparësi në Zvicër, paralajmëron Rrjeti Zviceran për të Drejtat e Fëmijëve në një letër të hapur drejtuar Këshillit Federal. Aleanca, e cila përfshin më shumë se 60 organizata joqeveritare, i bën thirrje qeverisë zvicerane të zhvillojë një strategji gjithëpërfshirëse për zbatimin e rekomandimeve të Komitetit të OKB-së për të Drejtat e Fëmijëve, shkruan RTS, transmeton albinfo.ch.

Në një deklaratë të publikuar të mërkurën, rrjeti shprehet i zhgënjyer nga përgjigja e autoriteteve ndaj raportit të Komitetit të OKB-së, i cili në vitin 2021 i dha Zvicrës 137 rekomandime për përmirësimin e situatës së fëmijëve në vend. “Megjithëse ka ende boshllëqe të shumta në zbatimin e të drejtave të fëmijëve, raporti i Këshillit Federal i datës 14 mars 2025 përmend vetëm tetë masa shtesë për të forcuar këto të drejta,” thuhet në letrën e hapur.

“Është për të ardhur keq që Këshilli Federal nuk po i kushton vëmendje të mjaftueshme anëtarëve më të pambrojtur të shoqërisë: fëmijëve dhe të rinjve,” thekson më tej dokumenti, transmeton albinfo.ch.

Rrjeti vë në dukje se situata e fëmijëve refugjatë në sistemin e azilit është veçanërisht shqetësuese, por edhe në fusha të tjera si mbrojtja nga dhuna, shumë nga rekomandimet e OKB-së mbeten ende të pazbatuara.

Aleanca për Fëmijët i bën thirrje Këshillit Federal të caktojë burime të mjaftueshme financiare dhe njerëzore dhe të ndërmarrë hapa konkretë për të garantuar të drejtat e fëmijëve. Ajo kërkon gjithashtu një strategji të qëndrueshme dhe koherente që siguron zbatimin e plotë të rekomandimeve ndërkombëtare.

Rrjeti Zviceran për të Drejtat e Fëmijëve përfshin organizata të njohura si Pro Juventute, Mbrojtja e Fëmijëve Zvicerane dhe Lëvizja e Skautëve Zviceranë, transmeton albinfo.ch.

Zvicra dhe Bashkimi Evropian kanë përmbyllur zyrtarisht negociatat për një marrëveshje të re ndërmjet tyre, pas një procesi të gjatë bisedimesh. Negociatorët Patric Franzen nga Zvicra dhe Richard Szostak nga BE kanë nënshkruar me iniciale tekstet e marrëveshjeve në Bernë, duke shënuar një hap të rëndësishëm drejt rregullimit të ri të marrëdhënieve dypalëshe, shkruan swissinfo.ch., transmeton albinfo.ch.

Qeveria zvicerane konfirmoi të mërkurën këtë zhvillim, duke sqaruar se inicializimi është një procedurë përmes së cilës negociatorët udhëheqës e miratojnë përmbajtjen e dokumenteve duke vendosur inicialet e tyre në secilën faqe. Kjo nënkupton se dokumentet reflektojnë përfundimet e negociatave.

Këshilli Federal, organi ekzekutiv i Zvicrës, pritet të marrë një vendim për miratimin e marrëveshjeve dhe nisjen e konsultimeve publike përpara verës. Tekstet e plota do të publikohen pas këtij vendimi, ndërsa nënshkrimi zyrtar i marrëveshjeve pritet të ndodhë në tremujorin e parë të vitit 2026, transmeton albinfo.ch.

Më 28 shtator 2025, qytetarët zviceranë do të votojnë për dy çështje të rëndësishme në referendumin federal: ligjin e ri për identitetin elektronik (e-ID) dhe për vendosjen e një takse mbi shtëpitë e dyta. Të dy temat kanë ngjallur debat të gjerë në opinionin publik dhe politikën zvicerane, shkruan RTS, transmeton albinfo.ch.

Pas dështimit të iniciativës së parë në vitin 2021, autoritetet federale kanë sjellë një version të ri të ligjit për identitetin elektronik. Sipas këtij ligji, Konfederata do të jetë përgjegjëse për lëshimin e e-ID-së  një dokument elektronik falas dhe opsional, që synon të thjeshtojë qasjen në shërbimet publike dhe private në internet. Përdoruesit do të mund të aplikojnë për dokumente zyrtare, të vërtetojnë moshën ose të përdorin e-ID-në për qëllime të tjera administrative.

Megjithatë, jo të gjithë janë të bindur. Tre grupe të ndryshme  përfshirë Miqtë e Kushtetutës, shoqatën “Referendumi i e-ID 2.0” dhe lëvizjen Mass-Voll  kanë mbledhur mbi 50,000 nënshkrime për të sfiduar ligjin në referendum. Kundërshtarët theksojnë se, pavarësisht menaxhimit shtetëror, teknologjia mbështetet ende në infrastrukturën e kompanive private, duke rritur shqetësimet për mbikëqyrje dhe sigurinë e të dhënave personale, transmeton albinfo.ch.

Tema e dytë në rend dite lidhet me sistemin e taksimit të strehimit. Parlamenti ka vendosur të shfuqizojë taksën aktuale mbi qiranë teorike për banesat kryesore dhe të dyta  një sistem që taksonte të ardhura të supozuara nga prona, edhe nëse ajo nuk jepej me qira. Në vend të saj, do të zbatohen zbritje vetëm të pjesshme për interesat hipotekore dhe kostot e mirëmbajtjes.

Për të kompensuar humbjet, ligji i ri u jep kantoneve të drejtën të vendosin një taksë të re mbi shtëpitë e dyta që përdoren për qëllime personale. Kjo ka shkaktuar kundërshtime nga kantonet turistike, të cilat frikësohen se do të humbasin të ardhura të rëndësishme.

Siç kërkohet për çdo ndryshim kushtetues, për ligjin do të nevojitet shumica e votës popullore dhe e kantoneve.

Zhvillimi i votimit të 28 shtatorit pritet të jetë vendimtar për drejtimin që do të marrë Zvicra në fushën e dixhitalizimit dhe të drejtës së pronës, duke reflektuar tensionin mes inovacionit teknologjik dhe mbrojtjes së të drejtave themelore, si dhe mes interesave federale dhe atyre kantonale, transmeton albinfo.ch.

Këshilli Federal ka shprehur mbështetje për një rregullore më fleksibile mbi orarin e punës për punonjësit që punojnë nga shtëpia, por ka kërkuar që kjo të vlejë vetëm për ata që kanë mundësinë të përcaktojnë vetë një pjesë të konsiderueshme të orarit të tyre të punës. Këto komente janë bërë në përgjigje të një propozimi të Komitetit Ekonomik dhe Tatimor të Këshillit Kombëtar, shkruan SRF, transmeton albinfo.ch.

Propozimi parasheh një zgjatje të kohës maksimale ditore të punës nga 14 në 17 orë, si dhe një reduktim të periudhës minimale të pushimit nga 11 në 9 orë. Po ashtu, do të lejohet puna e së dielës pa leje deri në gjashtë të dielave në vit për jo më shumë se pesë orë secila. Një tjetër element i rëndësishëm i propozimit është edhe e drejta për të qenë i padisponueshëm,  një masë që synon të mbrojë kohën personale të punonjësve.

Këshilli Federal vlerëson se rregullorja sjell qartësi dhe fleksibilitet, pa neglizhuar mbrojtjen e shëndetit, por paralajmëron se ajo duhet të zbatohet me kujdes. Ndërsa Komisioni synon që dispozitat të vlejnë për të gjithë punonjësit mbi moshën 18 vjeç, qeveria zvicerane propozon që ato të kufizohen vetëm për ata që kanë autonomi në menaxhimin e orarit të tyre, transmeton albinfo.ch.

“Sipas Këshillit Federal, vetëm ata që mund të vendosin vetë se kur të punojnë mund të përfitojnë realisht nga ky fleksibilitet, duke arritur një balancë më të mirë midis punës, jetës familjare dhe kohës së lirë,” thuhet në deklaratë.

Megjithatë, qeveria ka propozuar që e drejta për të qenë i padisponueshëm t’u garantohet të gjithë punonjësve, pavarësisht vendndodhjes së punës.

Një pakicë në Komitetin e Çështjeve Ekonomike kundërshtoi propozimin, duke shprehur shqetësimin se ndryshimet mund të çojnë në përkeqësim të kushteve të punës dhe në rrezik për shëndetin e punëtorëve. Ata paralajmëruan se pasojat afatgjata mund të përkthehen në kosto më të larta për ekonominë.

Propozimi fillestar u paraqit nga Thierry Burkart (FDP/AG), aktualisht anëtar i Këshillit të Shteteve, para pandemisë së COVID-19. Ai synon të përshtasë ligjin me realitetet e reja të tregut të punës në epokën digjitale dhe pas pandemike, transmeton albinfo.ch.