Në një ceremoni të veçantë në qytetin e Kukësit, biznesmeni dhe filantropi Lazim Destani u nderua me titullin “Çelësi i Qytetit” dhe me Certifikatën e Mirënjohjes, gjatë inaugurimit të Shqiponjës monumentale, simbol i krenarisë kombëtare, përcjell albinfo.ch.

Destani, i ftuar nga Kryetari i Bashkisë, Albert Halilaj, vizitoi fillimisht institucionet lokale dhe zhvilloi një takim miqësor me drejtuesit dhe qytetarët e Kukësit. Në ceremoninë e inaugurimit pranë rreth-rrotullimit të Gostilit, ai falënderoi edhe mikun e tij, Pandeli Majko, për angazhimin në vendosjen e Shqiponjës, që fluturoi nga Tirana për të gjetur vendin e vet në malet e Kukësit.

Në fjalën e tij, Destani theksoi rëndësinë e këtij simboli kombëtar dhe lidhjen e tij personale me Kukësin: “Sot ndjej të njëjtat emocione si kur kjo Shqiponjë u vendos në Tiranë me rastin e 100-vjetorit të Pavarësisë. Mirënjohja që pranova sot nga Bashkia juaj është ndër më të veçantat për mua.”

Ai gjithashtu uroi për zhvillim ekonomik dhe kulturor të Kukësit dhe gjithë trojeve shqiptare, duke nxjerrë në pah rëndësinë e bashkëpunimit dhe integrimit në Bashkimin Europian. Ceremonia u zhvillua në atmosferë festive, me pjesëmarrjen e qytetarëve dhe miqve të Diasporës.

Postimi i plotë i tij:

Me rastin e inaugurimit të Shqiponjës monumentale në qytetin e Kukësit, dje pata kënaqësinë të kaloj një ditë të bukur këtu, në këtë qytet të njohur me epitetin ‘Qyteti i mikpritjes dhe bujarisë’.

I ftuar nga Kryetari i Bashkisë – Kukës, z. Albert Halilaj, fillimisht pata nderin të realizoj një vizitë miqësore te kjo Bashki. Me këtë rast, në atmosferë të ngrohtë e vëllazërore, nga Kryetari Halilaj pranova titullin “Çelësi i Qytetit” të Kukësit si dhe Çertifikatën e Mirënjohjes. Krahas drejtuesve të Bashkisë, në këtë ceremoni të pranishëm ishin edhe një grup nga miqtë e mi, të ardhur nga trojet tona e nga diaspora. Këta më thanë, erdhëm këtu për të qenë sot pranë teje, por më shumë, për ta nderuar qytetin e Kukësit, banorët e kësaj ane, dhe mbi të gjitha, në nderim të simbolit tonë kombëtar, Shqiponjës monumentale që sot po inaugurohet këtu në këtë qytet.

Me përfundimin e takimit në Bashki, të gjithë së bashku u nisëm për te rreth-rrotullimi i Gostilit, vendi i përurimit të Shqiponjës monumentale. Sado që ishte mot me shi, këtu gjetëm shumë banorë të zonës që ishin tubuar për ta ndjekur ceremoninë.

Për ftesën si dhe për mirënjohjen që pranova nga Bashkia e Kukësit falënderoj Kryetarin Albert Halilaj së bashku me stafin e tij si dhe gjithë kuksianët. Në mënyrë të veçantë falënderoj mikun tim Pandeli Majko për praninë këtu dhe për angazhimin e tij personal që kjo Shqiponjë të fluturojë nga Tirana për t’u vendosur në folenë e vet, në malet e Kukësit.

Fjala ime e plotë te ceremonia e inaugurimit të Shqiponjës monumentale:

Kam nderin dhe kënaqësinë e veçantë që sot ndodhem në mesin tuaj këtu në Kukës, ku po promovohet përurimi i kësaj Shqiponje, simbol dhe krenari e jona kombëtare.

Siç e dimë, kjo Shqiponjë fluturoi nga Tirana për tu vendosur këtu në Kukës. Në Tiranë, vendit ku qëndroi për disa vite, i dha emrin “Sheshi Shqiponja”, ndërsa erdhi këtu sepse siç duket, Shqiponjat i duan malet e larta.

Për angazhimin që kjo Shqiponjë të vendoset në Kukës, ju falënderoj personalisht juve zoti Halilaj si dhe stafin e Bashkisë që ju drejtoni.

Juve zoti Pandeli Majko ju falënderoj gjithashtu për angazhimin tuaj që kjo Shqiponjë të vijë këtu në Kukës, në këtë qytet me tradita të lashta kombëtare, e të njohur për moton “Qyteti i mikpritjes dhe bujarisë”.

Të nderuar qytetarë të Kukësit dhe gjithë ju bashkëkombës të dashur, si dhurues i kësaj vepre arti, sot në këtë ceremoni kam të njëjtat emocione siç i kisha kur ky monument u vendos në Tiranë me rastin e shënimit të 100-vjetorit të Pavarësisë. Gëzimi dhe emocionet janë të njëjta pasi Shqiponja Dykrenare është në zemrën e çdo shqiptari.

Unë vij nga katundi Bozovcë i malësisë së Sharrit, rrethi i Tetovës, dhe këtë katund ku linda e u rrita, vetëm pak kodra e ndajnë nga Kukësi. Me këtë rast dua të sjell këtu një moment të veçantë nga fëmijëria ime, dhe që lidhet jo vetëm me mua por me gjithë shqiptarët e asaj ane. E kam fjalën për vitet e gjashtëdhjeta të shekullit të kaluar, e në vazhdim. Brezi ynë si dhe ata pas nesh, jemi rritur me zërin amënor e me tingujt e bukur të këngëve që vinin nga valët e Radio Kukësit. Zëri që na vinte nga ky qytet ka qenë ushqim shpirtëror i përditshëm për ne, ka qenë zëri që na mbushte zemrën me gëzim, na mbushte me frymë dhe energji të reja, dhe mbi të gjitha, na e forconte ndjenjën e dashurisë ndaj atdheut.

Ky ka qenë motivi që më ka bërë edhe këtë qytet ta ndiej si qytetin tim. Në ato kohëra si fëmijë nuk do ta kisha imagjinuar kurrë se pas më shumë se gjysmë shekulli qyteti i Kukësit do të më nderojë me titullin “Çelësi i Qytetit”. Andaj, mirënjohja që pranova sot nga Bashkia juaj, për mua është ndër më të veçantat. Sot e tutje, sa herë që do vij në Kukës, do ta çel portën e këtij qyteti me po atë ngrohtësi që e çel portën e shtëpisë sime në Tetovë!

Për Kukësin, për Shqipërinë, për të gjitha trojet tona uroj më të mirën, zhvillim ekonomik dhe përparim shoqëror e kulturor. Pandalshëm le të punojmë së bashku për forcimin e vendeve tona e për realizimin e aspiratave tona kombëtare. Të palëkundur le të ecim drejt integrimit të vendeve tona në Bashkimin Europian, sepse ne shqiptarët krahas gjeografisë, këtu e kemi edhe historinë tonë të lavdishme, si dhe përkatësinë tonë kulturore.

Meqenëse jemi në muajin nëntor, në Nëntorin e Festës së Pavarësisë dhe Ditës së Flamurit, juve këtu dhe gjithë bashkëkombësve ju uroj;

Gëzuar 113 vjetori i Pavarësisë së Shqipërisë!

Gëzuar Dita e Flamurit Kombëtar!