Kryenegociatorët e Kosovës dhe Serbisë qëndrojnë sot në Bruksel për takime në kuadër të dialogut të ndërmjetësuar nga Bashkimi Evropian, transmeton albinfo.ch.

Zyrtarët nuk kanë dhënë hollësi mbi temat e plota të diskutimit, por pritet që fokus kryesor të jetë nisja e punës së Komisionit të përbashkët për të pagjeturit. Çështjet e tjera që mund të diskutohen varen nga planet e të dërguarit të posaçëm për dialog, Peter Sorensen, si dhe nga gatishmëria e palëve për të trajtuar këto tema.

Takimet zakonisht zhvillohen fillimisht në mënyrë të ndarë me lehtësuesin e BE-së, ndërsa më pas, nëse palët arrijnë dakordësi, mbahet edhe sesioni i përbashkët trepalësh. Kjo strukturë pritet të ndiqet edhe sot. Takimet shërbejnë gjithashtu për t’i dhënë sinjale BE-së dhe opinionit publik se dialogu po vazhdon, edhe pse deri më tani nuk ka pasur progres të prekshëm.

Nga pala serbe, mediat kanë raportuar se pritet të kërkohet formimi urgjent i Asociacionit të Komunave Serbe dhe të tërhiqet vërejtja mbi atë që ata e quajnë “presion ndaj Serbëve në Kosovë”. Bashkimi Evropian ka konfirmuar për KOHËN se takimi po mbahet sot, me Peter Sorensen në rolin e udhëheqësit të dialogut.

Së shpejti do të shënohen tre vjet nga njoftimi i BE-së për arritjen e “Marrëveshjes së Brukselit” apo “Marrëveshjes për rrugën drejt normalizimit”. Megjithatë, implementimi i saj ka qenë minimal. Marrëveshja nuk u nënshkrua nga Serbia, por BE-ja ka insistuar gjithmonë se zbatimi i saj është obligim ligjor i palëve.

Peter Sorensen u emërua lehtësues i dialogut para një viti dhe së fundmi mandati i tij u zgjat për të paktën dy vjet. Ai pasoi Miroslav Lajçak nga Sllovakia. Bashkimi Evropian fajëson mungesën e progresit te palët dhe mungesën e gatishmërisë për të zbatuar detyrimet nga dialogu, ndërsa si pengesa përmenden kriza politike në Kosovë dhe situata e tensionuar politike në Serbi gjatë vitit të kaluar. /Albinfo.ch

Kryeministri në detyrë, Albin Kurti, ka përkujtuar 28-vjetorin e sulmit të dytë të forcave serbe ndaj familjes së komandantit Adem Jashari, i cili ndodhi më 22 janar 1998 në Prekaz, përcjell albinfo.ch.

Përmes një postimi në Facebook, Kurti ka theksuar se, ashtu si në vitin 1991, edhe në vitin 1998 familja Jashari rezistoi e armatosur, duke u shndërruar në shembull dhe simbol të rezistencës kundër regjimit shtypës të Serbisë dhe të luftës për çlirimin e Kosovës.

“Çdo 22 janar, e kujtojmë ditën e kësaj date të vitit 1998, kur policia serbe e sulmoi për herë të dytë familjen Jashari në Prekaz. Mëngjesin e hershëm të asaj dite, për gjysmë ore, një grup policësh serbë shtiu në breshëri predhash dhe armë automatike ndaj shtëpive të Shaban Jasharit. Duke e mbrojtur familjen dhe shtëpitë e tyre nga ky sulm kriminal, prej brenda shtëpive rezistuan me armë Shabani dhe djali i tij Hamza. Rezistenca e tyre i ktheu mbrapsht policët serbë, por nga plumbat e të shtënave të shumta, u plagosën dy vajza, Selvete dhe Iliriana Jashari. Filmimet e shumta dhe fotografitë e mediave të bëra në Prekaz pas këtij sulmi, na shërbejnë si dëshmi edhe sot për atë se çfarë ngjau më 22 janar 1998.Kjo ishte hera e dytë që familja Jashari në Prekaz ishte cak i aksioneve policore, pas aksionit të parë të 30 dhjetorit 1991, datë kjo që vite më pas do të nis të shënohet si Dita e Veteranëve të Ushtrisë Çlirimtare të Kosovës. Si më 1991 edhe më 1998, familja Jashari rezistoi e armatosur, duke u kthyer në shembull dhe simbol të rezistencës ndaj regjimit shtypës të Serbisë dhe luftës për çlirimin e Kosovës dhe lirinë e popullit”, ka shkruar Kurti.

Ai ka shtuar se historia e çlirimit të Kosovës, është shenjuar nga njerëz kurajoz dhe familje të tilla sikur familja e Shaban Jasharit, që me aq vendosmëri dhe vetëdije u flijuan për liri.

“Një muaj e gjysmë më pas, regjimi i Millosheviqit do të ekzekutonte një aksion shumëherë më të egër e më të gjerë ndaj familjes Jashari dhe tërë fshatit Prekaz, gjatë të cilit rezistenca e kësaj familje dhe e këtij fshati do të shënojnë kulmin e saj, duke frymëzuar mijëra njerëz që t’i bashkoheshin UÇK-së. Historia e çlirimit të Kosovës, është shenjuar pikërisht nga njerëz kurajoz dhe familje të tilla sikur familja e Shaban Jasharit, që me aq vendosmëri dhe vetëdije u flijuan për liri. Mes kujtimesh plot respekt dhe nderimesh të thella për familjen e Shaban Jasharit nga Prekazi i Poshtëm i Drenicës”, ka shkruar Kurti./Albinfo.ch

Kryeministri Edi Rama iu përgjigj pyetjeve të deputetëve të opozitës se pse nuk ishte në Davos për të nënshkruar Kartën për Bordin e Paqes, përcjell albinfo.ch.

Ai tha se ishte mes një zgjedhjeje, të shkonte në Davos për ftesën e Trump apo të priste vajzën e tij, Ivanka Trump, e cila dje ishte në Vlorë. Rama tha se zgjodhi të dytën, me lejen e presidentit të SHBA-ve.

“Meqë po përsëritet e njëjta pyetje dhe mos shqetësoheni pse unë nuk jam atje se mezi prisnit, duhet të bëja një zgjedhje mes ti përgjigjesha ftesës së babait apo të mikprisja vajzën këtu në Shqipëri. Edhe zgjodha vajzën. Natyrisht që vajzën e zgjodha me lejen e babait”, tha Rama.

Kujtojmë se ditën e kaluar, Ivanka Trump ishte në Vlorë ku me vete kishte 80 arkitektë me vete, të huaj dhe vendas./Albinfo.ch