Pas përfundimit të takimit me presidenten Vjosa Osmani, kreu i PDK-së, Bedri Hamza deklaroi para mediave se kanë kërkuar që data e zgjedhjeve të jetë 21 dhjetori, përcjell albinfo.ch.

Hamza tha se kjo datë është propozuar për të mos humbur më shumë kohë.

“Presidentja bazuar në zhvillimet e seancës së djeshme ku mandatari i dytë nuk arriti ti sigurojë votat sot ka nënshkruar dekretin për shpërndarjen e Kuvendit. Kemi kërkuar që të jetë data 21 për shpalljen e zgjedhjeve. Vendi ka nevojë sa më shpejtë të ketë institucione. Vendi ka nevojë të shpejtë për formim të institucioneve. Data tjetër që u përmend në takim ishte data 28 por ne ishim për datën 21”, theksoi Hamza.

Tutje kryetari i PDK-së tha se nuk kanë vija të kuqe për asnjë subjekt politik.

“Do të garojë me një ekip të mirë, me një program të mirë, me një listë të mirë. Jemi të përgatitur për këtë gjendje sepse të gjitha veprimet kanë qenë që vendi të shkoj drejt zgjedhjeve të parakohshme. Po e ripërsëris, PDK-ja nuk ka vija të kuqe për asnjë subjekt politik”, deklaroi Hamza në pyetjen e gazetarëve për ndonjë bashkëpunim të mundshëm me partitë politike.

Edhe kryetari i Aleancës për Ardhmërinë e Kosovës, Ramush Haradinaj ka thënë se sot është nënshkruar dekreti për shpërndarjen e Kuvendit.

Sipas tij, datat e propozuara janë 21 dhe 28 dhjetor.

“Duke qenë se është humbur shumë kohë, duke qenë se ka shumë akumulime të temave buxhetore, kemi propozuar që dita e zgjedhjeve të jetë 21 dhjetor. Mendojmë se në këtë mënyrë do ta fitojmë një javë kohë për vazhdimet  buxhetore.  Qeveria e Kosovës mund të marrë vendime për të përmbushur disa detyrime buxhetore që i ka si ndaj RTK-së edhe ndaj palëve tjera. Periudha e para vitit të ri, sepse pushteti po kërkon 28 dhjetorin, kjo periudhë është për familjen dhe është një arrogancë nga politika që me u shpall zgjedhjet më 28 dhjetor”, ka thënë ai.

Kryeministri në detyrë i Kosovës, Albin Kurti, të premten do të marrë pjesë në Samitin e Planit të Rritjes së Bashkimit Evropian që mbahet në kryeqytetin e Shqipërisë, Tiranë, përcjell albinfo.ch.

Ndërkaq, sipas njoftimit të Kryeministrisë, sonte, kryeministri në detyrë merr pjesë në Darkën e Liderëve në kuadër të këtij samiti.

Plani i Rritjes, që mbulon periudhën 2024-2027, përmban një paketë prej 6 miliardë eurosh, e miratuar nga BE-ja në fund të vitit 2023, për të përkrahur përafrimin e ekonomive të gjashtë vendeve të Ballkanit Perëndimor me standardet evropiane.

Për të përfituar nga këto fonde, vendet duhet t’i përfundojnë reformat e kërkuara nga BE-ja, që përfshijnë sektorin privat, tranzicionin e gjelbër dhe digjitalizimin.

Nga kjo paketë, Kosova mund të përfitojë mbi 880 milionë euro, prej të cilave mbi 250 milionë si grant pa kthim, ndërsa pjesa tjetër në formë kredie me kushte të favorshme.

Kosova ishte ndër të parat që miratoi agjendën e reformave, por fondet mbeten të bllokuara për shkak të mungesës së institucioneve që ta ratifikojnë marrëveshjen formale me BE-në.

Presidentja e Kosovës, Vjosa Osmani, ka nënshkruar sot vendimin për shpërndarjen e Kuvendit, menjëherë pas takimit me liderët e partive politike, përcjell albinfo.ch.

Ky hap erdhi pasi mandatari i dytë për formimin e qeverisë, Glauk Konjufca, nuk arriti të sigurojë shumicën për të krijuar kabinetin e ri qeveritar.

Ndërkohë, Faton Peci nga radhët e partisë Guxo ka bërë të ditur se partitë politike kanë propozuar datën 28 dhjetor si ditë të zgjedhjeve të reja parlamentare, ndërsa vendimi i plotë pritet të formalizohet së shpejti.

Deputeti i Lëvizjes Vetëvendosje, Halil Thaçi, ka deklaruar se ndër datat e përmendura si opsione për zgjedhjet e reja, 28 dhjetori është më e përshtatshmja për subjektin e tij politik, përcjell albinfo.ch.

Thaçi ka theksuar se Vetëvendosje është e gatshme të shkojë në zgjedhje “kurdoherë”, pavarësisht datës që do të vendoset.

“Që të dy opsionet për ne janë në rregull, mirëpo 28 dhjetori sigurisht që është datë më e mirë për zgjedhje. Por, pavarësisht kësaj, ne si Lëvizje Vetëvendosje kemi deklaruar vazhdimisht se jemi të gatshëm kurdo herë për zgjedhje. Na vjen keq që nuk u arrit të krijohet qeveria, sepse kishim një opozitë që qëndroi stoike në bllokadën e shtetit, prandaj këtë përgjegjësi do ta bartin para qytetarëve ata që e bllokuan krijimin e institucioneve”, ka thënë Thaçi.

I pyetur nëse Vetëvendosje, si fituese e zgjedhjeve të 9 shkurtit, ndjen përgjegjësi që vendi po shkon përsëri në zgjedhje, Thaçi është shprehur se subjekti ka treguar gatishmëri dhe kompromis gjatë gjithë procesit.

“Që nga fillimi kemi bërë kompromise, sepse kemi ofruar opsione të ndryshme, qoftë me tërheqjen e Albulena Haxhiut apo me Albin Kurtin. Ne në vazhdimësi kemi bërë përpjekje që të ecim tutje dhe të krijojmë institucionet tona. Mirëpo u formua një bllok i opozitës, dhe sot në Kuvend u pa qartë votimi i tyre, pra kundër”, ka shtuar ai në tëvë1.

Presidentja e Kosovës, Vjosa Osmani, i ka ftuar në takim kryetarët e partive politike, për të enjten, sot, pas dështimit të mandatarit, Glauk Konjufca, që t’i sigurojë votat e mjaftueshme për formimin e Qeverisë, përcjell albinfo.ch.

Partia Demokratike e Kosovës, Lidhja Demokratike e Kosovës, Aleanca për Ardhmërinë e Kosovës e Nisma Socialdemokrate e kanë konfirmuar për Kohën se do të marrin pjesë në takimin e orës 10:30. 

Sipas Kushtetutës, nëse as në tentimin e dytë nuk zgjidhet Qeveria, presidenti i Kosovës i shpall zgjedhjet, të cilat duhet të mbahen jo më vonë se dyzet (40) ditë nga dita e shpalljes së tyre. Zgjedhjet e reja më së largu duhet të mbahen në janar.

Kuvendi i Kosovës të mërkurën ka votuar kundër formimit të qeverisë me kryeministër Glauk Konjufcën. Pro formimit të Qeverisë sipas propozimit të Lëvizjes Vetëvendosje votuan vetëm 56 deputetë, 4 abstenuan dhe 53 ishin kundër. Partitë që deri tash ishin në opozitë – PDK-ja, LDK-ja, AAK-ja ishin kundër. Nisma abstenoi. Pas dështimit për Qeverinë, vendi shkon në zgjedhje të parakohshme.

Partitë politike i kanë kërkuar presidentes që të caktojë sa më shpejt datën e zgjedhjeve.

Deputeti i PDK-së, Memli Krasniqi, ka thënë se për caktimin e datës së  zgjedhjeve nuk duhet humbur kohë.

“Shpresoj shumë që zgjedhjet e jashtëzakonshme të cilat duhet të shpallen menjëherë, sot apo nesër, pa humbur kohë, vërtetë të ju japin qytetarëve një mundësi për verdiktin e tyre që Kosovës do ti japë një qeveri e cila para së gjithash nuk është qeveri e një mentaliteti një partiak e përjashtues por një qeveri që e kthen bashkëpunimin si normë…”, ka theksuar Krasniqi.

E deputeti i LDK-së, Armend Zemaj, ka bërë thirrje që për caktimin e datës së zgjedhjeve presidentja Vjosa Osmani të mos ndikohet nga askush.

“E thërrasim presidenten e vendit që të respektoj afatet kushtetuese dhe të mos lejojë asnjë ndërhyrje të kujtdo qoftë në vendimmarrjen e saj”, ka deklaruar Zemaj.

Ish-diplomati Sylë Ukshini të mërkurën mbrëma në “Interaktiv” ka thënë se nuk pret ndryshime të mëdha sa i përket rezultateve nga zgjedhjet e reja për partitë politike.

“Ky bashkimi i një pozicioni që e ka bë PDK me Bedri Hamzën, dhe vendosja e një kapele mendoj se Hamzës i ka dhënë më shumë fuqi dhe mund të shënojë një ngritje të ndjeshme në krahasim me partitë tjera. LDK-ja humbi dy bastione, do mbetet prapë në shifrat që ka qenë. LVV-ja mund të ketë plus minus. Por nuk mund të ketë ndryshime aq të mëdha brenda një kohë të shkurt”, përfundoi Ukshini.