Kuvendi i Kosovës miratoi sot në lexim të dytë projektbuxhetin për vitin 2026, përcjell albinfo.ch.
Buxheti u miratua me 62 vota pro dhe 36 kundër.
Ai kap vlerën rreth 4 miliardë euro, ndërsa u cilësua si i përkohshëm dhe emergjent, pasi do të rishikohet në muajt në vijim.
Gjatë seancës, nuk u miratua asnjë amendament i opozitës me implikime financiare, ndërsa u mbështetën dy amendamente për përfshirjen në buxhet të fondeve për Komunën e Prishtinës dhe atë të Shtimes.
Strehimi po shndërrohet në një krizë në rritje në të gjithë Evropën.
Në dhjetor 2025, Komisioni Evropian njoftoi Planin e tij të parë Evropian për Strehim të Përballueshëm.
Iniciativa synon të adresojë një nga shqetësimet më urgjente për qytetarët: aksesin në strehim të përballueshëm, të qëndrueshëm dhe cilësor, shkruan Scan, transmeton albinfo.ch.
Shumica e vendeve evropiane tashmë ofrojnë përfitime strehimi si pjesë e sistemeve të tyre të mbrojtjes sociale. Megjithatë, nivelet e mbështetjes ndryshojnë shumë, duke reflektuar politika të ndryshme kombëtare.
Sipas Eurostat, strehimi përbënte 1.35% të shpenzimeve totale për mbrojtje sociale në BE në vitin 2024. Kjo shumë arriti në 66.5 miliardë euro, e barabartë me 0.37% të PBB-së së BE-së dhe 148 euro për banor.
Përfitimet e strehimit për person ndryshojnë shumë në të gjithë Evropën.
Ato variojnë nga pothuajse zero në Bullgari në 755 euro në Irlandë midis 31 vendeve. Finlanda renditet e dyta me 484 euro, e ndjekur nga Mbretëria e Bashkuar me 406 euro. Midis pesë ekonomive më të mëdha evropiane, Italia (13 €) dhe Spanja (36 €) ndajnë ndjeshëm më pak se homologët e tyre.
Në terma nominalë, Gjermania ndan shumën më të madhe për përfitimet e strehimit me 27.4 miliardë euro, duke përbërë më shumë se dy në pesë të totalit të BE-së. Franca vjen pas me 16.1 miliardë euro, rreth një të katërtën e totalit.
Plani Evropian i Strehimit të Përballueshëm, i prezantuar së fundmi, përqendrohet “në rritjen e ofertës së strehimit, nxitjen e investimeve dhe reformave, adresimin e qirave afatshkurtra në zonat nën presion të strehimit dhe mbështetjen e njerëzve më të prekur”.
Sipas ekspertëve, suksesi i planit do të përcaktohet nga kapaciteti në nivel lokal për të përmbushur këto nevoja. Përballueshmëria duhet të jetë qëllimi dhe strehimi më i përballueshëm është ai publik, bashkëpunues dhe social.
Gjatë dekadës së fundit, midis vitit 2015 dhe tremujorit të tretë të vitit 2025, çmimet e shtëpive në BE u rritën me 64% dhe qiratë me 21% sipas Eurostat.
Qarkullimi i trenave në Stacioni i Winterthurit është kufizuar për shkak të një daljeje nga shinat. Lajmi është konfirmuar nga SBB përmes portalit të saj zyrtar të njoftimeve për ndërprerje, përcjell albinfo.ch.
Sipas njoftimit, kufizimet pritet të zgjasin deri rreth orës 14:30. Linjat S7 dhe S19 janë më të prekurat, ndërsa udhëtarët duhet të llogarisin anulime dhe vonesa të mundshme të shërbimeve.
Autoritetet hekurudhore bëjnë thirrje që pasagjerët të informohen rregullisht për përditësimet më të fundit dhe të planifikojnë udhëtimet e tyre duke marrë parasysh ndryshimet në orare.
Ski Mountaineering shënoi debutimin e tij historik olimpik, ndërsa zvicerania Marianne Fatton hyri në histori duke fituar medaljen e artë në garën sprint, në garat e zhvilluara në Bormio, përcjell albinfo.ch.
Në këtë paraqitje të parë olimpike të këtij sporti, Fatton tregoi superioritet të plotë, veçanërisht në fazat vendimtare të garës. Ndërrimet teknike rezultuan vendimtare: ajo i vendosi skitë në shpinë me një shpejtësi të jashtëzakonshme dhe më pas i riktheu ato në këmbë me precizion maksimal, duke lënë pas edhe francezen Emily Harrop, ish-numrin një botëror.
Fatton hyri në zbritjen finale me një epërsi të konsiderueshme dhe e përfundoi garën bindshëm, duke siguruar medaljen e parë olimpike në historinë e ski-mountaineering, sport që për herë të parë është pjesë e programit olimpik. Harrop u rendit e dyta, vetëm 2.38 sekonda pas zviceranes, ndërsa medalja e bronztë shkoi për spanjollen Ana Alonso Rodriguez, me vonesë prej 10.45 sekondash.
Fatton kishte paralajmëruar këtë sukses që në paraqitjet e saj të mëparshme. Në raundin kualifikues, sportistja nga Neuchâtel fitoi bindshëm, ndërsa në gjysmëfinale, në kushte të vështira për shkak të reshjeve intensive të borës, u mposht vetëm nga Harrop. Gara u zhvillua në pistën e ndërtuar në pjesën finale të pistës së Kupës së Botës alpine Stelvio.
Zvicerania tjetër, Caroline Ulrich, u eliminua në fazën gjysmëfinale. Ndërkohë, te meshkujt, Arno Lietha u rendit i katërti dhe Jon Kistler i gjashti, duke mbetur shumë pranë medaljeve.
Ski Mountaineering do të ketë edhe paraqitjen e tij të dytë dhe të fundit në këtë edicion olimpik të shtunën, me garën e stafetës së përzier, ku pritet sërish konkurrencë e fortë dhe interes i madh sportiv. /Albinfo.ch
Të provosh kuzhinën vendase është po aq e rëndësishme sa të vizitosh atraksionet kryesore kur udhëton në një vend të ri, por skenat gastronomike të Evropës ndryshojnë shumë sa i përket buxhetit që duhet të shpenzosh për një vakt për dy persona.
Platforma Ferry GoGo ka kryer një studim dhe ka përpiluar një listë të vendeve evropiane, nga më luksozet te më të lirat, bazuar në çmimin mesatar të një darke me tre pjata për dy persona (pa përfshirë pijet) në atë që e përshkruan si një restorant “të kategorisë së mesme”, shkruan Monitor, transmeton albinfo.ch.
Pra, ku do të shkojë më larg buxheti juaj?
Në Kosovë, ku një vakt me antipasta, pjata kryesore dhe ëmbëlsira kushton vetëm rreth 20 euro. Pas saj vijnë Maqedonia e Veriut (24.38 euro) dhe Moldavia (30.32 euro), çka tregon qartë se rajoni është vendi ideal për të ngrënë me kosto të përballueshme.
Por çfarë mund të gjeni në menu?
Pjata kombëtare e Kosovës është flija, byreku me shtresa petash që vendosen mbi njëra-tjetrën me një përzierje kremoze kosi, gjalpi dhe djathi, i cili shtypet dhe piqet nën saç.
Specat e mbushur, perimet turshi dhe, sigurisht, bakllavaja janë gjithashtu pjesë e menusë, ndaj nuk do të mungojnë pjatat e bollshme. Dhe sigurohuni të provoni një makiato të shijshme.
Në anën tjetër të spektrit, aty ku një darkë jashtë do t’ju kushtojë shumë më tepër, është Zvicra!
Një darkë mesatare me tre pjata për dy persona në një restorant zviceran të kategorisë së mesme pritet t’ju kushtojë 107.24 euro, më shumë se katër herë çmimi i një darke në Kosovë.
Danimarka u rendit e dyta dhe Luksemburgu i treti, por më poshtë janë pesë vendet kryesore në secilën kategori, me çmimet përkatëse.
Pesë vendet më të lira në Evropë për të ngrënë jashtë
Kosova: 20.00 euro
Maqedonia e Veriut: 24.38 euro
Moldavia: 30.32 euro
Bosnja dhe Hercegovina: 30.75 euro
Serbia: 38.34 euro
Pesë vendet më të shtrenjta në Evropë për të ngrënë jashtë:
Zvicra: 107.24 euro
Danimarka: 93.69 euro
Luksemburgu: 90.00 euro
Norvegjia: 89.86 euro
Holanda, Irlanda, Finlanda, Belgjika: 80.00 euro
Reshjet e forta të borës kanë detyruar autoritetet e Aeroporti i Vjenës të ndërpresin përkohësisht fluturimet, duke shkaktuar anulime dhe vonesa të shumta në trafikun ajror. Operacionet janë pezulluar deri në mesditën e së premtes, ndërsa situata mbetet problematike edhe për orët në vijim, tansmeton albinfo.ch.
Zyrtarët e aeroportit kanë bërë të ditur se ndalesa fillestare e fluturimeve është shtyrë me tre orë të tjera, deri në orën 11:00 GMT. Megjithatë, pritet që vonesat dhe çrregullimet në orare të vazhdojnë edhe gjatë pasdites për shkak të kushteve të pafavorshme atmosferike.
Sipas të dhënave zyrtare, rreth 150 nga 232 fluturimet e planifikuara për mëngjesin e së premtes janë anuluar. Autoritetet njoftojnë se nisjet e kufizuara mund të rifillojnë rreth mesditës, ndërsa uljet e avionëve pritet të nisin pas orës 13:00.
Probleme të ngjashme janë raportuar edhe në Gjermani, ku reshjet e borës gjatë natës kanë ndikuar në operacionet e Aeroporti i Mynihut. Aeroporti gjerman ka paralajmëruar se nisjet dhe mbërritjet mund të pësojnë vonesa ose anulime gjatë gjithë ditës.
Autoritetet u bëjnë thirrje pasagjerëve që, përpara se të nisen drejt aeroporteve, të kontrollojnë statusin e fluturimeve pranë kompanive ajrore përkatëse dhe të ndjekin njoftimet zyrtare. /Albinfo.ch
Kuvendi i Kosovës sot po e shqyrton në lexim të dytë Projektligjin mbi ndarjet buxhetore për Buxhetin e Republikës së Kosovës për vitin 2026.
Buxheti të enjten është miratuar në Komisionin për buxhet të Kuvendit Në të janë përfshirë edhe buxhetet e miratuara të Komunës së Prishtinës dhe asaj të Shtimes. Në këtë mbledhje nuk kaluan rreth 80 amendamente të opozitës.
Buxheti për vitin 2026 është paraparë të jetë 4 miliardë euro, prej të cilave 3.64 miliardë janë të hyra, ndërsa pjesa tjetër do të mbulohet me kredi dhe me deficit.
Më 16 shkurt Kuvendi me 66 vota për, 32 kundër dhe pesë abstenime pati miratuar në parim Projektbuxhetin për vitin 2026. Deputetët opozitarë e patën kritikuar dokumentin duke thënë se si i tillë nuk përmban reforma dhe jep diskrecion për ministrin e Financave që të ndajë mjete për ministri duke kaluar edhe shumën prej 30 për qind. Por, ekzekutivi ka paralajmëruar rishikimin e tij, duke thënë se këtë do ta bëjë pasi të sjellë programin qeverisës.
Pas miratimit në parim, me propozim të Vetëvendosjes u bë shmangia e afateve që shqyrtimi i dytë i Projektligjit të bëhet më 20 shkurt.
Ministri i Financave Hekuran Murati ne seancën kur po shqyrtohet në lexim të dytë Projektligji për ndarjet buxhetore, ka thënë se buxheti për vitin 2026 është i përkohshëm dhe emergjent dhe se ai do të rishikohet.
Sipas tij amendamentet që janë të vlefshme do të përfshihen në buxhet gjatë procesit të rishikimit.
“Të gjitha ato që janë të vlefshme dhe i konsiderojmë që, në disa raste edhe kemi pasur pajtueshmëri, që të mbështeten projekte të tilla, besoj që do të gjejnë mbështetje në ministritë e linjës në momentin kur e sjellim buxhetin e rishikuar me prioritetet e Qeverisë të reflektuara në të”, ka deklaruar Murati.
Ai ka thënë se amendamente nuk kanë pasur mundësi që të propozojnë as ministrat që e kanë marrë detyrën.
“Ky është një buxhet i përkohshëm emergjent, për këtë arsye ne si qeveri nuk u kemi dhënë hapësirën, madje as ministrave që kanë marr dikasteret e tyre që të bëjnë ndryshime, duke konsideruar që nuk kemi shumë kohë për të bërë ndryshimet e nevojshme dhe cilësore dhe që pastaj ato të mos reflektojnë me probleme gjatë rrugës”, është shprehur Murati.
Ai ka thënë se ideja ka qenë që Projektbuxheti të procedohet sa më parë, në mënyrë që shteti të ketë një buxhet.
Murati ka thënë se kjo është një zgjidhje emergjente për shpenzimet rrjedhëse por se për të nuk mund të iniciohet asnjë projekt prokurimi. “Këtë mund ta konfirmoni edhe në komunat ku qeverisni ju, pra asnjë projekt prokurimi nuk mund të iniciohet për shkak se nuk ka buxhet dhe nuk mund të bëhet zotimi i mjeteve duke mos e pasur buxhet”, ka theksuar Murati.
Shefi i Grupit Parlamentar të AAK-së, Besnik Tahiri, ka thënë se do të presin nga shumica në Kuvend nëse do t’i votojnë amendamentet e AAK-së e më pas do të vendosin për mbështetjen për buxhetin 2026.
Ai ka shtuar se 14 prej amendamenteve janë të AAK-së dhe se do të ishte e palogjikshme të mos futeshin.
“Ne do të presim cili do jetë reagimi i qeverisë, ju shumicës, nëse edhe kësaj here nuk do të kalojë në seancë asnjë amendament i AAK-së, krejt ushtrimi edhe leximit të parë edhe procesit të shkurtimit të afatit për diskutimin e amendemtneve ka qenë mashtrim optik. Do lexojmë amendamentet tona dhe do shohim a do marrim mbështetje”.
Shefja e Grupit Parlamentar të Lidhjes Demokratike të Kosovës (LDK), Jehona Lushaku, në seancën ku po shqyrtohet buxheti i vitit 2026 ka thënë se nuk do ta përkrahin atë.
Por ajo ka kërkuar që 21 amendamentet e saj, që nuk e morën përkrahjen e shumicës parlamentare në Komisionin për buxhet, të hidhen në votim edhe në seancë.
“Amendamentet tona adresojnë probleme reale, të qytetarëve, kanë të bëjnë me arsimin, kanë të bëjnë me shëndetësinë, kanë të bëjnë me investimet kapitale, kanë të bëjnë me rrjetin e digjitalizimit dhe të energjisë andaj ju bëjmë thirrje që t’i vendosni në votim”, është shprehur Lushaku.
Partia Demokratike e Kosovës nuk ka do ta mbështesë buxhetin për vitin 2026.
Shefi i GP të PDK-së, Arian Tahiri, ka thënë se buxheti siç është paraqitur ka shumë defekte. Ai ka shtuar se PDK-ja i ka dhënë vërejtjet në diskutimin paraprak dhe ka pritur ndryshim brenda dy leximeve, por se nuk ka pasur ndryshim.
“Ne i tërheqim të gjitha amendamentet dhe nuk e mbështesim këtë buxhet që nuk e reflekton as përbërjen e qeverisë, nuk është dokument profesional, ka shumë defekte për 2026 por do jetë i dëmshëm edhe për vitet e ardhshme”, ka thënë ai në seancë.
Presidentja e Kosovës, Vjosa Osmani, ka bërë të ditur se në takimin e zhvilluar me presidentin amerikan Donald Trump janë diskutuar dy çështje kyçe për vendin: procesi gjyqësor ndaj katër ish-liderëve të UÇK-së në Hagë dhe situata e marrëdhënieve me Serbinë, përcjell albinfo.ch.
Në një intervistë për Klan Kosova, Osmani konfirmoi se tema e aktakuzave dhe kërkesës për dënime deri në 45 vjet burg për secilin nga katër ish-krerët e UÇK-së ka qenë pjesë e bisedës me presidentin amerikan, si dhe zhvillimet e fundit në raport me Serbinë.
Megjithatë, ajo u shpreh e rezervuar për të dhënë më shumë detaje mbi përmbajtjen konkrete të diskutimeve, duke theksuar se nuk është në interes të Kosovës që në këtë fazë të bëhen publike informacione shtesë.
“Kemi diskutuar. Unë ju kisha lutur për mirëkuptimin tuaj. Nuk besoj që është në interesin e Kosovës në qoftë se japim më shumë detaje rreth kësaj. Mirëpo, dua të siguroj që i kemi diskutuar të dyja temat dhe kemi marrë garanci të fuqishme”, deklaroi Osmani.
Ajo shtoi se në momentin e duhur, së bashku me kryeministrin e Shqipërisë, Edi Rama, do të flasin më gjerësisht për përmbajtjen e këtyre diskutimeve.
Sipas Osmanit, takimi dhe mbështetja e marrë për këto çështje përbëjnë një zhvillim pozitiv për Kosovën. “E kemi informuar në detaje për këto dy tema dhe sërish dua ta them, sot ka qenë një ditë jashtëzakonisht e mirë për Kosovën”, u shpreh ajo.
“Broja do të na mungojë disa javë”, tha trajneri i Burnley, Scott Parker, në prag të ndeshjes kundër Chelsea, duke iu referuar situatës së sulmuesit shqiptar.
Një deklaratë që përkthehet në një mungesë pothuajse të sigurt të Brojës për sfidën e Play-off-it të Botërorit kundër Polonisë në Varshavë.
Kjo ndeshje zhvillohet më 26 mars dhe sulmuesi 24-vjeçar ka pak më shumë se një muaj kohë.
Deklarata e trajnerit Parker nuk ishte precize për kohën e rikuperimit të Brojës, por disa javë mund të jenë një muaj, ndoshta dhe më shumë, transmeton albinfo.ch.
Edhe nëse Broja rikthehet në stërvitje pas pak javësh, ai sigurisht që nuk mund të jetë 100% gati për Poloninë, sepse do t’i duhet të luajë për të kapur formën optimale. Duke llogaritur edhe kalvarin e dëmtimeve të tij, gjasat janë që sulmuesi të mos bëjë pjesë në strategjinë e trajnerit të Kombëtares, Silvinjo, për përballjen e rëndësishme me polakët.
Broja ka munguar në dy ndeshjet e fundit të Burnley-t për shkak të një shqetësimi fizik.
Në rastin më optimist ai mund t’i bashkohet skuadrës angleze në mesin e marsit, ndërsa kuqezinjtë duhet të shohin zgjidhje të tjera në sulm për Play-off-in e Botërorit. Dëmtimet po shndërrohen në një makth të vërtetë për sulmuesin shqiptar.
Futbollisti shqiptar, Ernest Muçi po kalon momentin më të mirë të karrierës së tij në Turqi, duke u shndërruar në protagonist absolut te Trabzonspor.
Mesfushori shqiptar është shpallur lojtari i muajit nga HT Spor, një vlerësim që konfirmon ndikimin e tij të madh në skuadër.
24-vjeçari ka regjistruar 13 gola dhe katër asistime në të gjitha garat, duke barazuar rekordin e Anastasios Bakasetas për më shumë gola nga një mesfushor në një sezon me Trabzonsporin.
Vetëm në kampionat ai ka shënuar 10 gola, ndërsa në Kupë ka shtuar edhe tri të tjerë, duke u kthyer në motorin ofensiv të ekipit, transmeton albinfo.ch.
Forma e tij e shkëlqyer ka ndezur edhe diskutimet e transferimeve. I huazuar nga Beshiktash për 1 milion euro, Muçi ka një opsion blerjeje prej 8.5 milionë eurosh.
Drejtuesit e Trabzonsporit po shqyrtojnë rinegocimin e shumës, ndërsa klubi i Stambollit mban një qëndrim të fortë, duke u mbështetur te kontrata e vlefshme deri në vitin 2027.
Pas sulmuesit Paul Onuachu, Muçi është golashënuesi i dytë më i mirë i skuadrës dhe një nga lojtarët më vendimtar të edicionit.
E ardhmja e tij pritet të jetë një nga temat më të nxehta të verës në futbollin turk, teksa shqiptari po jeton fazën më produktive të karrierës.
Qeveria e Kosovës ka miratuar pakon e re, të 19-të, të sanksioneve ndaj Federatës Ruse dhe Bjellorusisë me synim kundërshtimin e agresionit rus në Ukrainë, përcjell albinfo.ch.
Kryeministri Albin Kurti e prezantoi këtë pikë duke thënë se synojnë që të zbatojnë vendimet e Këshillit të BE-së dhe SHBA-së” për vendosjen e sanksioneve ndaj Federatës Ruse dhe Bjellorusisë në raport me situatën në Ukrainë”.
Ndërkaq, ministri i Jashtëm, Glauk Konjufca, e prezantoi dhe bëri me dije se për cilët sektorë vlejnë këto sanksione.
“Në vijim të mbështetjes për kundërshtimin e agresionit të Federatës Ruse ndaj Ukrainës, në përputhje me masat dhe sanksionet e BE-së dhe SHBA-së, partnerë strategjikë, MPJD propozon për shqyrtim dhe miratim vendimin për zbatimin e pakos së 19-të të sanksioneve të BE-së, si dhe masave shtesë të BE-së ndaj Federatës Ruse”.
Konjufca përmendi këtu sanksionet e fundit të BE-së ndaj Rusisë e Bjellorusisë.
“Pakoja synon sektorin e energjisë, financave, kompleksin ushtarako-industrial, tregtinë dhe zinxhir të furnizimit në mallra ushtarake dhe me përdorim të dyfishtë. Shërbime strategjike, përfshirë teknologjinë dhe inteligjencën artificiale, si dhe masa lidhur me kontrollin e lëvizjes së diplomatëve rusë dhe përgjegjësinë për rrëmbimin dhe deportimin e fëmijëve ukrainas”.
Ai tha se veprime të harmonizuara përfshijnë edhe ndaj Bjellorusisë.
Ngërçi i zgjatur politik në Kosovë gjatë vitit 2025 ka ndikuar drejtpërdrejt në ngadalësimin e rritjes ekonomike dhe përshpejtimin e inflacionit.
Fondi Monetar Ndërkombëtar ka vlerësuar se ngërçi politik në Kosovë më 2025 ka ndikuar në rritjen ekonomike.
Në deklaratën përmbyllëse nga vizita në Kosovë, Misioni i FMN-së ka deklaruar se ekonomia ka treguar qëndrueshmëri, por se rritja është ngadalësuar, ndërsa inflacioni është përshpejtuar. Edhe pse perspektiva, sipas FMN-së është pozitive, ende mbesin disa rreziqe negative.
“Përderisa ekonomia ka treguar qëndrueshmëri karshi ngërçit të zgjatur politik, vlerësohet se rritja është ngadalësuar në vitin 2025, ndërsa inflacioni është përshpejtuar dhe deficiti i llogarisë së jashtme rrjedhëse është zgjeruar. Ngërçi politik ka kufizuar avancimin e zbatimit të agjendës së reformave në kuadër të Planit të Rritjes së BE-së dhe qasjen në financim të jashtëm”.
FMN-ja ka thënë se ka pasur edhe deficit të llogarisë së jashtme, ndërsa ka vënë re se edhe rritja e pagave reale ka stagnuar.
“Ngërçi i zgjatur politik ka pasur ndikim në rritjen ekonomike te vitit 2025. Rritja është ngadalësuar në 3½ për qind (vit mbi vit) deri në fund të tremujorit të tretë të 2025, nga 4¾ për qind një vit më parë, pasi konsumi privat dhe investimet u dobësuan karshi ngadalësimit të kreditimit dhe rritjes së të ardhurave reale. Rritja e importit të mallrave, veçanërisht e produkteve ne sektorin e energjs, ka çuar në përkeqësim të bilancit tregtar, duke e zgjeruar deficitin e llogarisë së jashtme rrjedhëse në 9.6 për qind të BPV-së, nga 8.4 për qind në vitin 2024.
Ky ndikim i jashtëm i rritjes është kompensuar pjesërisht me rritje të konsumit qeveritar dhe investime publike, me mbështetje të përmirësimit të ekzekutimit të buxhetit. Inflacioni u përshpejtua në 5¼ për qind (vit mbi vit) deri në dhjetor, nga 1.1 për qind një vit më parë, i nxitur nga rritja e çmimeve të ushqimeve. Punësimi formal ka vazhduar të shënojë rritje, megjithëse rritja e pagave reale ka stagnuar ndërsa papunësia ka mbetur e lartë (10 për qind). Kjo, së bashku me pjesëmarrjen vazhdimisht të ulët të fuqisë punëtore, veçanërisht atë të grave, është indikacion i kapaciteteve ende të pashfrytëzuara në tregun e punës”, thuhet në deklaratë.
Në tabelën e shfaqur në këtë deklaratë, është thënë se sipas analizës preliminare rritja reale e Bruto Produktit Vendor të 2025-s ishte 3.4 për qind, ndërsa për 2026 ka parashikuar rritje 3.8 për qind.
Ajo ka rekomanduar rikalibrim të politikës fiskale për 2026 për ta ulur impulsin fiskal dhe për t’i adresuar disbalancat makroekonomikë. “Në periudhën afatmesme, politika fiskale duhet të ankorohet në një kornizë të bazuar në rregulla, duke balancuar stabilitetin makroekonomik dhe objektivat zhvillimore, ndërkohë që ndërtohen rezervat fiskale. Sektori financiar është në gjendje të mirë, mirëpo rritja e lartë e kreditimit në vitet e fundit kërkon monitorim të afërt të rreziqeve të sektorit financiar. Duke u bazuar në reformat e kohëve të fundit, duhen përpjekje të mëtejshme për të rritur reziliencën sistemike, së bashku me forcimin e mbikëqyrjes. Reformat strukturore, të bazuara në Planin e Rritjes të BE-së, do të gjenerojnë përfitime për rritjen dhe do të zhbllokojnë mbështetje të konsiderueshme financiare të jashtme në periudhën afatmesme”.
Misioni i FMN-së vizitoi zyrtarisht Kosovën nga 3 shkurti deri më 13 shkurt.
Shefi i misionit të FMN-së për Kosovën, David Amaglobeli, kishin mbajtur konferencë për media me ministrin e Financave, Hekuran Murati, dhe guvernatorin e Bankës Qendrore të Kosovës, Ahmet Ismaili. Aty Ismaili tha gjatë 2025-s, ekonomia e Kosovës dëshmoi qëndrueshmëri të lartë e rritja ka vazhduar me ritme pozitive.
Ai vlerësoi se ekonomia e Kosovës vazhdon të paraqesë qëndrueshmëri dhe ecuri pozitive, duke ndjekur një trajektore të qëndrueshme të rritjes, pavarësisht sfidave dhe rreziqeve të jashtme që kërkojnë vëmendje të vazhdueshme. Sektori financiar, veçanërisht ai bankar, mbetet i qëndrueshëm, i kapitalizuar mirë, me likuiditet të lartë dhe me nivel të ulët të kredive joperformuese.
Në përmbyllje, Guvernatori i BQK-së theksoi se progresi i arritur në stabilitetin financiar, mbikëqyrjen, sistemin e pagesave, qeverisjen, integritetin financiar dhe harmonizimin me standardet e BE-së dëshmon përkushtimin e BQK-së për ndërtimin e një sistemi financiar të qëndrueshëm, transparent dhe modern, në funksion të rritjes së qëndrueshme ekonomike dhe prosperitetit të vendit.
Më 2025, Kosova ishte pa institucione për shkak të bllokadave në Kuvend. Zgjedhjet e shkurtit të 2025-s nuk prodhuan Qeveri të re e Kuvendi nuk mori asnjë vendim për shkak të ngërçeve deri në konstituim.
Shtetet e Bashkuara kanë paguar rreth 160 milionë dollarë nga mbi 4 miliardë që i detyrohen OKB-së. Kështu ka deklaruar një zëdhënës i Kombeve të Bashkuara të enjten, ndërsa presidenti Donald Trump po zhvillonte takimin e parë të Bordit të Paqes, për të cilin shumë ekspertë thonë se mund të minojë Kombet e Bashkuara.
“Javën e kaluar, morëm rreth 160 milionë dollarë nga Shtetet e Bashkuara si një pagesë të pjesshme të detyrimeve të prapambetura për buxhetin e rregullt të OKB-së”, citohet të ketë thënë zëdhënësi nga Reuters.
Gjatë fjalimit të tij në hapjen e takimit të Bordit të Paqes, Trump tha se Uashingtoni do t’i jepte OKB-së para për ta forcuar atë.
Po ashtu, presidenti i SHBA-së, Donald Trump, njoftoi të enjten se FIFA do të ndajë 75 milionë dollarë për nisma sportive në Gaza.
Njoftimi ishte pjesë e një sërë angazhimesh financiare të paraqitura përfaqësuesve të 47 vendeve. Trump e përfshiu këtë kontribut brenda planit për rindërtimin e enklavës palestineze, në varësi të çarmatimit të Hamasit dhe vendosjes pasuese të një strukture ndërkombëtare stabilizimi. Presidenti nuk specifikoi mekanizmin me të cilin do të siguroheshin fondet, as nuk sqaroi nëse ato do të vinin nga burimet e vetë FIFA-s apo nga një fushatë e jashtme për mbledhje fondesh. Gjithashtu, nuk u përmend asnjë marrëveshje zyrtare që do të nënshkruhej gjatë këtij eventi.
Referenca për mbështetjen e futbollit u shfaq së bashku me shifra të tjera të njoftuara në takim, të tilla si 7 miliardë dollarët që, sipas Trump, disa vende tashmë i kanë premtuar për rindërtim dhe 10 miliardë dollarët që Shtetet e Bashkuara do të kontribuonin në fond.
Qeveria ka miratuar propozim-vendimin për themelimin e Këshillit Shtetëror, i cili do të ketë përgjegjësi për organizimin dhe shënimin e 28-vjetorit të Epopesë së Ushtrisë Çlirimtare të Kosovës, përcjell albinfo.ch.
“Mirë se takohemi në mbledhjen e rregullt të Qeverisë. Të martën patëm mbledhjen solemne për 18-vjetorin e Pavarësisë. Sot, në pikën e parë të rendit të ditës, kemi themelimin e Këshillit Shtetëror për shënimin e 28-vjetorit të Epopesë së Ushtrisë Çlirimtare të Kosovës. Shkurti është muaj feste shtetërore dhe krenarie qytetare, marsi është muaj lavdie historike dhe nderimi i sakrificës. Në kalendar vjetor shkurti vjen para marsit, por në kalendarin e historisë sonë, para shkurtit ishte marsi. E pa 5, 6 dhe 7 Marsin, nuk bëhej 17 Shkurti, pa flijimin e familjes Jashari, nuk bëhej festa shtetërore e Republikës, pa luftën e Ushtrisë Çlirimtare të Kosovës për liri, nuk bëhej parakalimi i ushtrisë sonë në liri”, tha ai.
Kryesues i këshillit do të jetë Ejup Maqedonci me bashkëkryesues Andin Hotin, dhe anëtarë Sami Lushtaku, Saranda Bogujevci, Elbert Krasniqi, Bashkim Jashari, Gazmend Hoxha. Nga një përfaqësues do të jenë edhe nga organizatat e dala nga lufta e UÇK-së, Zyrës së Presidentes, Kuvendit, Zyrës së Kryeministrit, si dhe Asociacionit të Komunave.
Epopeja mbahet më 5, 6 dhe 7 mars.
Kabineti qeveritar pos që miratuan themelimin e Këshillit Shtetëror për shënimin e 28 vjetorit të Epopesë së Ushtrisë Çlirimtare të Kosovës, ministrat e kryeministri miratuan po ashtu edhe 11 pika tjera të rendit të ditës.
Më poshtë gjeni pikat e rendit të ditës që u miratuan sot nga ana e Qeverisë së Kosovës:
-1. Shqyrtimi i Propozim-vendimit për themelimin e Këshillit Shtetëror për shënimin e 28 vjetorit të Epopesë së Ushtrisë Çlirimtare të Kosovës (ZKM);
-2. Shqyrtimi i Projekt-rregullores për Fushat e Përgjegjësisë Administrative të Ministrive (ZKM);
-3. Shqyrtimi i Projekt-programit të Projektligjeve për vitet 2026 – 2028 (ZKM)
-4. Shqyrtimi i Projekt-programit të Vlerësimit Ex-Post të Akteve Juridike (ZKM);
-5. Shqyrtimi i Projektligjit për Ratifikimin e Marrëveshjes për Qasje në Arsimin e Lartë dhe Pranim për Studime në Ballkanin Perëndimor (ZKM);
-6. Shqyrtimi i Projektligjit për Ratifikimin e Amendamentit Nr. 2 të Marrëveshjes Financiare ndërmjet Republikës së Kosovës dhe Bashkimit Evropian, për Programin IPA 2017, pjesa e parë (ZKM);
-7. Shqyrtimi i Projektligjit për Ratifikimin e Amendamentit Nr. 3 të Marrëveshjes Financiare ndërmjet Republikës së Kosovës dhe Bashkimit Evropian, për Programin IPA 2018 (ZKM);
-8. Shqyrtimi i Projekt-rregullores për Procedurën e Shqyrtimit Administrativ të Akteve të Komunave (MAPL);
-9. Shqyrtimi i Propozim-vendimit për themelimin e Ndërmarrjes Publike Lokale “Fushë-Kosova” Sh. A., Fushë-Kosovë (ME);
-10. Shqyrtimi i Propozim-vendimit për themelimin e Ndërmarrjes Publike Lokale “Eko Drenasi” Sh. A., Gllogoc (ME);
-11. Shqyrtimi i Propozim-vendimit për ndryshimin dhe plotësimin e Vendimit të Qeverisë Nr. 01/64, të datës 25 shkurt 2022, “Për zbatimin nga Republika e Kosovës të vendimeve të Këshillit të Bashkimit Evropian dhe Shteteve të Bashkuara të Amerikës, për vendosje të sanksioneve ndaj Federatës Ruse dhe Bjellorusisë, në raport me situatën në Ukrainë” (MPJD);
Shkrimtari dhe studiuesi kosovar Ag Apolloni ka prezantuar më 17 shkurt 2026 tezat e tij kërkimore në Departamentin e Letërsisë Krahasimtare në Universitetin e Harvardit, ku trajtoi origjinën dhe variantet e baladës së njohur shqiptare për vëllain që mban besën edhe pas vdekjes, transmeton albinfo.ch.
Studimi i tij ndërlidhet me baladën që ka frymëzuar romanin e njohur të Ismail Kadare, Kush e solli Doruntinën?, i përkthyer në anglisht me titullin The Ghost Rider. Në prezantim, Apolloni analizoi dimensionin mitik, kulturor dhe krahasimtar të figurës së Kostandinit dhe motivit të besës në traditën shqiptare dhe më gjerë.
Ai bëri të ditur se në projektin e tij njëvjeçar kërkimor në Harvard, si “respondent” ka profesorin e njohur David Damrosch, një ndër studiuesit më të rëndësishëm të letërsisë botërore, të cilin Apolloni e ka përmendur shpesh edhe në ligjëratat e tij në Kosovë dhe Evropë.
Në reflektimin e tij personal, Apolloni theksoi se qëndrimi në Shtetet e Bashkuara i ka ofruar një këndvështrim të ri për studimin e mitit të Kostandinit dhe konceptit të besës. Ai bëri një paralelizëm simbolik mes përvojës së tij si studiues në një vend të huaj dhe figurës legjendare që kthehet nga “bota tjetër” për të mbajtur premtimin, duke e parë këtë motiv si një urë mes traditës shqiptare dhe diskursit bashkëkohor akademik ndërkombëtar.
Postimi i plotë:
Më 17 shkurt 2026, në Departamentin e Letërsisë Krahasimtare (CompLit), në Universitetin e Harvardit, paraqita tezat e mia mbi origjinën dhe variantet e baladës së famshme për vëllain që e mban besën edhe pas vdekjes, e mbi të cilën Ismail Kadare shkroi romanin “Kush e solli Doruntinën?” (përkthyer në anglisht si “The Ghost Rider”).
Ka vite që studiuesin e mirënjohur, profesor David Damrosch, e kam përmendur nëpër ligjërata në Kosovë dhe Evropë, jo thjesht si një profesor, por si një apostull që me idetë e tij mbi letërsinë botërore po ndikon gjithandej nëpër botë për ta zgjeruar hartën e letërsisë, ndërsa sot pata kënaqësinë ta kem si ‘respondent’ për projektin tim njëvjeçar në Harvard.
Kur erdha vitin e kaluar në Amerikë, m’u duk sikur erdha në tjetër botë, dhe kjo ndjesi më ndihmoi edhe më shumë për ta studiuar Kostandinin që erdhi nga bota tjetër për ta realizuar premtimin (besën). Tek e fundit, unë dhe ai nuk dallojmë shumë: unë jam ‘guest’, ai është ‘ghost’, dhe të dy vijmë nga bota tjetër për të kryer një punë dhe për t’u kthyer prapë./Albinfo.ch
https://www.facebook.com/share/p/1AquhacHz1/?mibextid=wwXIfr
Shoqata Kulturore Shqiptare “Atdheu” në Thun organizon një mbrëmje festive me rastin e 17 Shkurtit, 18-vjetorit të Pavarësisë së Kosovës, shkruan albinfo.ch.
Me moton e bashkimit dhe mallin për vendlindjen, organizatorët ftojnë të gjithë bashkatdhetarët që të bëhen pjesë e një nate me këngë dhe valle shqiptare, në frymën e unitetit dhe gëzimit.
Mbrëmja do të mbahet më 21 shkurt 2026, duke filluar nga ora 18:30, në sallën Bärensaal, në adresën Frutigenstrasse 68d, 3604 Thun.
I ftuar special i mbrëmjes është këngëtari Fidaim Aliu, ndërsa mysafir do të jetë edhe Sh.K. Albakult Ostermundigen. Programi pritet të sjellë performanca artistike dhe valle tradicionale nga fëmijë dhe të rinj.
Çmimi i hyrjes është 10 franga, ndërsa për fëmijët deri në 15 vjeç hyrja është falas.
Për informata shtesë, organizatorët kanë vënë në dispozicion numrin e kontaktit: 078 731 31 04.
Një mbrëmje që synon të forcojë lidhjet mes diasporës dhe atdheut, duke festuar së bashku një nga datat më të rëndësishme në historinë e Kosovës. /Albinfo.ch
Shtëpia italiane e stolive luksoze Bvlgari ka zgjedhur këngëtaren shqiptare me famë botërore, Dua Lipa, si ambasadoren e saj të re globale. Lajmi u bë i ditur në Milano nga zëvendësdrejtoresha ekzekutive e kompanisë, Laura Burdese, e cila theksoi se artistja mishëron vlerat thelbësore të markës, transmeton albinfo.ch.
Sipas raportimit të Women’s Wear Daily (WWD), Burdese vlerësoi Lipën si një figurë që përfaqëson fuqizimin dhe lirinë moderne. “Dua Lipa mishëron një vizion bashkëkohor të fuqizimit dhe lirisë që përputhet thellësisht me vlerat e ‘Bvlgarit’. Ajo është zë i fortë dhe autentik që ripërcakton suksesin dhe përmes artit dhe vetëbesimit të saj frymëzon gratë në mbarë botën”, u shpreh ajo.
Burdese, e cila do të marrë zyrtarisht postin e drejtoreshës ekzekutive më 1 korrik, si pasardhëse e Jean-Christophe Babin, e cilësoi bashkëpunimin me artisten si fillimin e një kapitulli të ri emocionues për markën.
Nga ana e saj, Dua Lipa tha se e konsideron këtë rol si një privilegj të veçantë. “Është jashtëzakonisht e veçantë të punosh përkrah një brendi ikonik si ‘Bvlgari’ dhe jam shumë e lumtur të jem pjesë e një shtëpie që mishëron vetëbesimin, kreativitetin dhe feminitetin modern”, u shpreh ajo, duke shtuar se krijimet e markës i japin gjithmonë “prekjen e fundit perfekte” çdo paraqitjeje.
Lipa i bashkohet ambasadoreve aktuale të markës, përfshirë Anne Hathaway, Lisa, Liu Yifei dhe Priyanka Chopra Jonas.
Së fundmi, artistja u shfaq me stoli të Bvlgarit në Berlin International Film Festival, ku shoqëroi të fejuarin e saj, aktorin Callum Turner, në premierën e filmit Rosebush Pruning. Po ashtu, ajo u paraqit me krijime të markës edhe në fushatën promovuese të Milano Cortina 2026 për NBC Olympics & Peacock.
E njohur për aktivizmin dhe angazhimin e saj filantropik, Dua Lipa u përfshi nga Time në listën “Time 100” për vitin 2024, ndërsa Billboard e renditi në vendin e 25-të në listën “Top 100 Women Artists of the 21st Century” për vitin 2025.
Përveç sukseseve në muzikë — me shtatë çmime Brit Awards dhe tre Grammy Awards — ajo ka ndërtuar një profil të fuqishëm edhe në film dhe modë. Në vitin 2023 debutoi si aktore në filmin Barbie me regji të Greta Gerwig, ku interpretoi edhe këngën Dance the Night.
Në industrinë e modës, Lipa ka qenë imazh i markave si YSL Beauty dhe Evian. Ajo debutoi në pasarelë në shfaqjen pranverë 2022 të Versace në Milano, ku u përdorën këngë nga albumi i saj Future Nostalgia, ndërsa në vitin 2023 bashkëpunoi me Donatella Versace për koleksionin “La Vacanza”.
Me këtë rol të ri, Dua Lipa forcon më tej pozicionin e saj si një nga figurat më të rëndësishme globale që ndërthur muzikën, modën dhe ndikimin kulturor. /Albinfo.ch
Ambasada e Republikës së Kosovës në Francë ka organizuar një pritje solemne në Paris për të shënuar 18-vjetorin e shpalljes së pavarësisë së vendit. Ceremonia u mbajt në ambientet prestigjioze të Salons Hoche, ku morën pjesë përfaqësues të trupit diplomatik, autoritete franceze, miq të Kosovës si dhe bashkatdhetarë nga diaspora, transmeton albinfo.ch.
Në këtë mbrëmje festive u përkujtua rrugëtimi shtetformues i Republikës së Kosovës, duke vënë theksin te sakrificat dhe arritjet përgjatë 18 viteve të shtetësisë. Po ashtu, u theksua miqësia e qëndrueshme ndërmjet Kosovës dhe Francës, si dhe mbështetja e vazhdueshme nga vendet mike në proceset integruese të vendit.
Programi artistik nisi me shfaqjen e dokumentarit “Destination Francophonie – Kosovo”, prodhim i TV5MONDE, i cili pasqyron energjinë, kulturën dhe potencialin frankofon të Kosovës, duke e prezantuar vendin para publikut ndërkombëtar nga një këndvështrim kulturor dhe bashkëkohor.
Atmosfera e mbrëmjes u pasurua më tej nga koncerti i grupit kosovar “Don’t Listen to Your Neighbors”, që solli në skenë frymën kreative dhe dinamizmin e skenës moderne muzikore të Kosovës.
Organizatorët theksuan se kjo ngjarje ishte më shumë sesa një festë përvjetori – ajo përfaqësonte një dëshmi të identitetit evropian të Kosovës dhe të përkushtimit të saj ndaj vlerave demokratike, bashkëpunimit ndërkombëtar dhe integrimit evropian.
Në fund, u shpreh mirënjohje për të gjithë të pranishmit dhe për mbështetjen e vazhdueshme ndaj Kosovës në forcimin e rolit të saj në arenën ndërkombëtare./Albinfo.ch
Gjykata Federale e Zvicrës ka refuzuar të enjten një padi kundër Konfederatës Zvicerane. Padia ishte ngritur nga disa spitale dhe klinika mjekësore që kërkonin kompensim për ndalimin e procedurave jo urgjente gjatë pandemisë së COVID-19.
Sipas gjykatës, shteti federal nuk është përgjegjës për dëmet e pretenduara që rrjedhin nga masat e emergjencës, transmeton albinfo.ch.
Rasti dhe Kërkesa për Dëme
Në fillim të pandemisë, pranvera e vitit 2020, Këshilli Federal kishte ndaluar spitalet, klinikat, zyrat mjekësore dhe ato dentare të kryenin procedura jo urgjente për periudhën 17 mars – 26 prill 2020.
Në vitin 2023, disa kompani dhe klinika që i përkisnin të njëjtit grup spitalor paraqitën një kërkesë kompensimi prej 15.7 milionë frangash zvicerane, duke pretenduar se ndalimi kishte shkaktuar dëme financiare. Këshilli Federal kishte refuzuar kërkesën në mars 2024.
Vendimi i Gjykatës
Procesi gjyqësor publik u zhvillua në Lozanë të enjten, ku gjykata vendosi që padia duhet të refuzohej. Arsyeja e shkruar për vendimin do të publikohet më vonë.
Gjykata Federale ka theksuar se masat emergjente të pandemisë nuk mund të bëjnë shtetin përgjegjës për çdo dëmtim të pretenduar financiar.
Gjenerallejtënant Laurent Michaud, Shefi i Komandës së Operacioneve, nga 19 deri më 20 shkurt 2026 ndodhet në Kosovë për të vizituar personelin e Forcave të Armatosura Zvicerane të vendosura në Forcën e Kosovës (KFOR) .
Gjatë vizitës së tij dy-ditore, Shefi i Komandës së Operacioneve pritet të informohet mbi situatën aktuale të sigurisë në zonën e operacioneve, transmeton albinfo.ch një njoftim nga Ministria e Mbrojtjes e Zvicrës. Ai do të vizitojë elementët e ndryshëm të vendosur, në veçanti oficerët zviceranë të integruar në stafin ndërkombëtar të KFOR-it.
Michaud gjithashtu do të zhvillojë diskutime me Ambasadorin Zviceran në Kosovë dhe Komandantin e KFOR-it.
Më tutje, Shefi i Komandës së Operacioneve do të informohet mbi zhvillimin e aftësive mbrojtëse nga dronë që aktualisht po testohen nga trupat zvicerane. Këto misione paqeruajtëse japin një kontribut të rëndësishëm në siguri dhe gjithashtu u lejojnë Forcave të Armatosura Zvicerane të fitojnë përvojë të vlefshme në prokurim duke testuar sistemet në një mjedis operativ.
Këto misione ofrojnë mbështetje thelbësore për sigurinë dhe u mundësojnë Forcave të Armatosura Zvicerane të fitojnë përvojë të vlefshme në prokurim duke testuar sistemet në një mjedis operativ.
Misionet gjithashtu ofrojnë qasje në funksione me vlerë të lartë të shtuar në një mjedis shumëkombësh. Kjo mundëson identifikimin e proceseve dhe doktrinave që kontribuojnë në zhvillimin e mëtejshëm të metodave të punës së dikujt, dhe ndërveprimi forcohet në mënyrë specifike. Kontributet në ndërtimin e paqes përfaqësojnë një investim të drejtpërdrejtë në aftësitë mbrojtëse.
Ministrja e Financave, Karin Keller-Sutter, paralajmëron se pa një rritje të taksës mbi vlerën e shtuar (TVSH), nuk do të ketë fonde të mjaftueshme për rritjen e shpenzimeve ushtarake.
Buxheti federal për vitin 2025 tregon një tepricë të përkohshme nga të ardhurat e larta tatimore, kryesisht nga kompanitë e mallrave, por sipas ministres, kjo nuk mjafton për planet e ardhshme të ushtrisë. Një e treta e fondeve shtesë të nevojshme do të mbulohet nga rritja e TVSH-së.
Qëndrimi i saj ka shkaktuar debat brenda partisë: ekspertët e sigurisë dhe disa politikanë propozojnë një rritje më të vogël të TVSH-së dhe përdorim të të ardhurave të tjera, si fitimet e bankës qendrore ose shitja e aksioneve të Swisscom. Ndërsa për përfaqësuesit e majtë, çdo rritje e TVSH-së për ushtrinë është e papranueshme.
Ministrja thekson se populli do të shikojë me kujdes nëse ka kursime reale para se të aprovojë fonde shtesë, duke e lidhur rritjen e TVSH-së direkt me mundësinë e financimit të ushtrisë.
Këshilli Federal i Zvicrës njofton se synon të përmirësojë shkëmbimin e informacionit midis forcave kantonale të policisë. Qeveria po planifikon modernizimin e sistemit aktual përmes platformës së standardizuar të kërkimit Polap dhe ka nisur një proces konsultimi publik.
Ministri i Drejtësisë dhe i Policisë, Beat Jans, shpjegoi se ligji duhet të ndryshohet që forcat kantonale të policisë të mund të lidhen me këtë platformë, e cila përdoret tashmë në nivel kombëtar dhe evropian që nga viti 2024. Qëllimi është të trajtohen kufizimet aktuale për shkëmbimin e të dhënave në luftën kundër krimit të organizuar.
Aktualisht, shkëmbimi i informacionit midis kantoneve është shumë i pabarabartë. Për shembull, masa për të hequr nga qarkullimi personat që kryejnë abuzime me fëmijë apo dhunë në familje shpesh pengohen nga kufijtë kantonalë. Gjurmimi i trafikantëve të drogës që lëvizin nga një kanton në tjetrin gjithashtu është i pamjaftueshëm.
“Policët në çdo kanton duhet të bëjnë kërkesa individuale për çdo rast,” tha Jans. “Është e ndërlikuar, joefikase dhe e ngadaltë.” Ai theksoi se shpesh është më lehtë të marrësh informacion nga vendet e tjera sesa nga kantonet e tjera në Zvicër.
Platforma Polap do të mundësojë që të gjithë policët në Zvicër të shkëmbejnë informacion në mënyrë standarde, duke ruajtur njëkohësisht mbrojtjen e të dhënave. “Polap nuk është një bazë e madhe të dhënash. Autoritetet e policisë nuk mbledhin informacione të reja. Ne thjesht sigurojmë që të dhënat ekzistuese të jenë të qasshme aty ku janë të rëndësishme për punën e policisë,” sqaroi Jans.
Qeveria ka hapur dy ndryshime ligjore për konsultim. Njëra synon të krijojë një bazë kushtetuese për rregullimin e shkëmbimit të të dhënave midis kantoneve dhe me Konfederatën, ndërsa tjetra synon të përshtatë të drejtat e qasjes në sistemet policore për autoritetet përkatëse. Procesi i konsultimit do të zgjasë deri më 26 maj, ndërsa zbatimi pritet jo më parë se viti 2029.
Tirana zyrtare mbështet studentët shqiptarë në Shkup: E drejta për provim në gjuhën shqipe duhet të respektohet
Medalje presidenciale për prof.dr. Nazmi Maliqin: Një jetë e përkushtuar për Kosovën
Donald Trump: I gjithë Irani mund të shkatërrohet” deri të martën në mbrëmje
Shqiptarë nga e gjithë bota bashkohen në Tiranë, publikohet agjenda e Samitit IV të Diasporës
Tirana zyrtare mbështet studentët shqiptarë në Shkup: E drejta për provim në gjuhën shqipe duhet të respektohet
Medalje presidenciale për prof.dr. Nazmi Maliqin: Një jetë e përkushtuar për Kosovën
Donald Trump: I gjithë Irani mund të shkatërrohet” deri të martën në mbrëmje
Shqiptarë nga e gjithë bota bashkohen në Tiranë, publikohet agjenda e Samitit IV të Diasporës
Opinione Vota e diasporës vendos në Kosovë, por mungon në Zvicër
Opinione Në kohë trazirash, vendimet kërkojnë maturi
Opinione Dekreti i Presidentes dhe interpretimi i neneve 82 dhe 86 lidhur me shpërndarjen e Kuvendit
Opinione Politika është i vetmi vend ku unë delegoj përgjegjësinë time!
Opinione Magazina albinfo.ch pranë lexuesit – edhe mbi re, me Chair Airlines
Opinione Krimi i organizuar në Francë dhe imazhi i shqiptarëve: një perspektivë mediatike
Opinione Një vit mes librash
Opinione Zvicra dhe Kosova drejt një epoke të re ekonomike
