Forca e Sigurisë së Kosovës (FSK) ka ndryshuar lokacionin e parakalimit për nder të Ditës së Pavarësisë, më 17 shkurt, përcjell albinfo.ch.

Ndryshe nga vitet e kaluara, kur parakalimi organizohej në sheshet qendrore të Prishtinës, sivjet ai do të mbahet në rrugën “Luan Haradinaj”, në segmentin nga “Qafa” deri te “New Born”.

Lajmi është konfirmuar nga Vëllazërim Qerimi, shef i sektorit të informimit publik në FSK.

Sipas programit zyrtar të manifestimeve shtetërore për shënimin e 18-vjetorit të Pavarësisë së Kosovës, parakalimi i FSK-së do të nisë në orën 11:30.

Autoritetet u kanë bërë thirrje qytetarëve të respektojnë udhëzimet e sigurisë dhe të planifikojnë lëvizjet në përputhje me ndryshimet në qarkullim gjatë kësaj ngjarjeje. /Albinfo.ch

Nënkryetari i Lëvizjes Vetëvendosje, Glauk Konjufca, shprehu optimizëm se nesër, përveç se Kuvendi do të konstituohet, do të formohet edhe Qeveria e re, përcjell albinfo.ch.

“Nesër do të bëhet Kuvendi dhe shumë shpresoj që nesër do të bëhet edhe qeveria. Për të tjerat flasim pastaj,” tha ai.

Konjufca gjithashtu theksoi se LVV nuk ka refuzuar kurrë aktgjykimet e Gjykatës Kushtetuese. “Ne kurrë nuk i kemi refuzuar aktgjykimet e Gjykatës Kushtetuese. Deri tash, ato kanë qenë beteja politike, por kur Gjykata ka vendosur si në rastin e vitit 2014, kur tha se shumicën mund ta bëjë vetëm fituesi i zgjedhjeve, ne u tërhoqëm dhe vepruam sipas vendimit të Gjykatës,” shtoi ai. /Albinfo.ch

Presidentja e Kosovës, Vjosa Osmani, ka thirrur seancën konstituive të Kuvendit të Kosovës për nesër, më 11 shkurt, duke filluar nga ora 12:00, përcjell albinfo.ch.

Menjëherë pas këtij njoftimi, kryetari aktual i Kuvendit, Dimal Basha, ka thirrur një takim me kryetarët e subjekteve politike për sot në orën 17:00.

Në rendin e ditës së takimit do të jetë pika “Përgatitjet për Seancën konstituive të Legjislaturës X të Kuvendit të Republikës së Kosovës”, duke përfshirë koordinimin për rendin e ditës dhe vendosjen e vendeve të deputetëve në sallë.

Takimi përgatitor synon të sigurojë që seanca konstituive të zhvillohet pa pengesa dhe në përputhje me Kushtetutën dhe rregulloren e Kuvendit. /Albinfo.ch

Presidentja e Kosovës, Vjosa Osmani, ka thirrur seancën konstituive të Kuvendit të Kosovës për të enjten, më 11 shkurt 2026, në orën 12:00. Vendimi u mor pas konsultimeve me shumicën e partive parlamentare dhe duke marrë parasysh urgjencën e formimit të institucioneve, miratimin e buxhetit dhe marrëveshjeve ndërkombëtare, përcjell albinfo.ch. 

“Pas konsultimit me shumicën e partive parlamentare të përfaqësuara në Kuvend dhe duke pasur parasysh urgjencën e krijimit të institucioneve, miratimin e buxhetit dhe marrëveshjeve ndërkombëtare, në përputhje me Kushtetutën dhe legjislacionin në fuqi, Presidentja ka vendosur që seancën konstituive ta ftojë për nesër, më 11 shkurt, në orën 12:00”, thuhet në njoftimin e Presidencës.

Caktimi i seancës vjen një ditë pas certifikimit të rezultateve të zgjedhjeve të 28 dhjetorit nga Komisioni Qendror i Zgjedhjeve. Në këto zgjedhje, Lëvizja Vetëvendosje fitoi 57 ulëse (51%), Partia Demokratike e Kosovës 22 ulëse, Lidhja Demokratike e Kosovës 15, Aleanca për Ardhmërinë e Kosovës 6, ndërsa 20 ulëse janë të rezervuara për komunitetet.

Për shkak të mungesës së institucioneve pas zgjedhjeve të shkuara, Kuvendi ende nuk ka miratuar buxhetin e vitit 2026 dhe marrëveshjet ndërkombëtare. Një nga obligimet kryesore të Kuvendit të ri është edhe zgjedhja e presidentit të ri deri më 4 mars, një muaj para përfundimit të mandatit të Vjosa Osmanit.

Sipas nenit 8 të Rregullores së Kuvendit, përgatitjet për seancën konstituive janë përgjegjësi e kryetarit të legjislaturës së mëparshme, Dimal Basha. Ai ka thirrur mbledhjen e kryetarëve të partive për të koordinuar rendin e ditës dhe vendosjen e vendeve të deputetëve në sallë. Mbledhja u caktua për orën 17:00.

Punimet e seancës konstituive i drejton deputeti më i vjetër, i ndihmuar nga më i riu. Sipas Rregullores, rendi i ditës përfshin: formimin e Komisionit të Përkohshëm për Verifikimin e Kuorumit dhe Mandateve; betimin e deputetëve; zgjedhjen e Kryetarit të Kuvendit dhe të nënkryetarëve. Në legjislaturën e kaluar pati bllokada, veçanërisht në zgjedhjen e nënkryetarit serb.

Kuvendi ka mandat katërvjeçar nga dita e seancës konstituive. Kryetari zgjidhet nga grupi më i madh parlamentar me shumicën e votave të të gjithë deputetëve, ndërsa tre nënkryetarë zgjidhen nga grupet më të mëdha dhe dy të tjerët nga komunitetet, përfshirë një nga serbët dhe një nga komunitetet tjera. Gjykata Kushtetuese ka konfirmuar të drejtën e Listës Serbe të propozojë kandidatin për nënkryetar edhe pas ezaurimit të emrave të deputetëve të saj.

Kosova është vlerësuar me 43 pikë në Indeksin e Perceptimit e Korrupsionit për vitin 2025 të organizatës ndërkombëtare, Transparency International (TI), duke shënuar një rënie për një pikë krahasuar me vitin paraprak, përcjell albinfo.ch.

Vlerësimi i ri bën që Kosova të renditet e 76-ta në botë nga gjithsej 182 vende dhe territore, apo tri pozita më poshtë se më 2024.

Sipas TI, vlerësimi me pikë i një shteti tregon nivelin e korrupsionit të perceptuar në sektorin publik nga zero (që do të thotë se një vend është jashtëzakonisht i korruptuar) deri në 100 (një vend i pastër nga korrupsioni), ndërkaq renditja e një shteti në indeks tregon pozicionin e tij relativ krahasuar me vendet e tjera.

Kosova mori vlerësimin më të mirë më 2024 (44 pikë), duke zënë vendin e 73-të në botë. Kjo pasi shënoi një përparim të lehtë në luftimin e korrupsionit krahasuar me vitin 2023, kur ishte vlerësuar me 41 pikë.

Kosova përfshihet në këtë Indeksin e Perceptimit të Korrupsionit që nga viti 2012. Që atëherë, vlerësimin më të keq vendi e kishte pasur më 2013, 2014 dhe 2015, kur për tri vjet rresht ishte vlerësuar me 33 pikë.

Për vitin 2025, nga vendet e rajonit, Mali i Zi është vlerësuar më së miri me 46 pikë (njësoj si herën e kaluar), Maqedonia e Veriut me 40 (njësoj si herën e kaluar), Shqipëria me 39 (ka shënuar përkeqësim nga 42 pikë sa kishte në indeksin e kaluar), Bosnje e Hercegovina me 34 (ka shënuar rënie, pasi herën e kaluar kishte 33 pikë) dhe Serbia me 33 (ka shënuar rënie pasi herën e kaluar kishte 35 pikë).

Në pjesën për Evropën Lindore dhe Azinë Qendrore, organizata tha se indeksi tregon se institucionet e dobëta dhe ngecjet në demokraci po e nxisin korrupsionin dhe po ngushtojnë hapësirën për shoqërinë civile.

Përqendrimi i pushtetit, ndikimi në gjyqësor dhe presioni ndaj shoqërisë civile po nxisin kthim prapa të demokracisë dhe po dobësojnë mekanizmat e kontrollit duke reduktuar mbikëqyrjen publike, tha organizata.

“Në gjithë Ballkanin Perëndimor, mungesa e transparencës në vendimmarrje për projekte të mëdha investuese është një dobësi e zakonshme”, u tha në raport.

“Pezullimi i rregullave për transparencë dhe kompetencat diskrecionale po i ekspozojnë fondet publike ndaj rrezikut të korrupsionit dhe në të njëjtën kohë po e dëmtojnë besimin e publikut”, u shtua në pjesën për Ballkanin Perëndimor.

Raporti përmend Bosnje e Hercegovinën dhe Shqipërinë sa i përket çështjeve mjedisore.

TI tha se mungesa e procedurave konkurruese ka çuar në “shfrytëzim të pakontrolluar të burimeve natyrore në Bosnje” dhe ka çuar në “rrezik për degradim mjedisor në rastin e ishullit të Sazanit në Shqipëri”, si dhe “i ka mundësuar Qeverisë së Serbisë të nënshkruajë një marrëveshje sekrete me një investitor të huaj dhe në mënyrë të paligjshme të anulojë mbrojtjen e një monumenti kulturor për ta zëvendësuar atë me një hotel luksoz”.

Sa i përket Sazanit, Shqipëria në fund të vitit 2024 i dha statusin e investitorit strategjik kompanisë të dhëndrit të presidentit amerikan, Donald Trump, Jared Kushner, për të ndërtuar një resort turistik në ishullin e Sazanit në afërsi të Vlorës.

Statusi i investitorit strategjik, kompanisë së Kushnerit i është dhënë për periudhën 10-vjeçare.

Planet e tij për investim në Shqipëri ishin përballur me kundërshtime në këtë shtet, sidomos nga ambientalistët që kishin thënë se mund të shkaktohen dëme në zonat e mbrojtura bregdetare, sidomos për zonën e Zvërnecit.

Ndërkaq, sa i përket heqjes së mbrojtjes së monumentit kulturor në Serbi, që përmend TI-ja, bëhet fjalë për ish-ndërtesën e Shtabit të Përgjithshëm të ushtrisë jugosllave, ku Kushner kishte planifikuar të ndërtonte një hotel.

Por, në mesin e dhjetorit të vitit të kaluar, u raportua se Kushner është tërhequr nga ky investim.

TI tha po ashtu se në disa vende të Ballkanit Perëndimor, përgjigja e dobët e gjyqësorit vlerësohet si një nga pengesat kryesore për luftën e suksesshme kundër korrupsionit, “teksa gjyqtarët dhe prokurorët po bëhen gjithnjë e më shumë objekt i sulmeve nga qeveritë”.

Në këtë drejtim, organizata përmend Serbinë ku thuhet se pas hetimeve për abuzime të dyshuara nga anëtarë të Qeverisë, Prokuroria për Krim të Organizuar në Serbi “po përballet me presion në rritje, përfshirë fushata denigruese të udhëhequra nga Qeveria, pengimin e bashkëpunimit me policinë dhe ndryshime ligjore që dobësojnë aftësinë e saj për të hetuar krimin e organizuar dhe korrupsionin e nivelit të lartë”.

Duke folur për Serbinë, organizata tha se ky shtet bën pjesë në mesin e vendeve që janë vlerësuar dobët në indeks dhe ku më 2025 ka pasur rritje të protestave nga gjenerata e re, pasi të rinjtë në këto shtete, “protestuan për të kërkuar llogaridhënie nga qeveritë e tyre”.

Në vitin e kaluar, Serbia u përball me protesta të mëdha, përmes së cilave qytetarët kërkuan përgjegjësi për vdekjen e disa personave nga rrëzimi i një strehe betoni në një stacion hekurudhor dhe më pas kërkesat e tyre u zgjeruan, duke kërkuar zgjedhje të reja.

Ndërkaq, në rastin e Bosnjës, Transparency International tha se ndikimi politik mbi emërimet në sistemin gjyqësor “është aq thellësisht i rrënjosur, saqë përpjekje të shumta për ta rregulluar atë në mënyrë efektive kanë dështuar, pavarësisht faktit se kjo përbën një pengesë serioze për integrimin e vendit në Bashkimin Evropian”.

Në raportin e publikuar, TI tha se mesatarja globale e Indeksit të Perceptimit të Korrupsionit ka pësuar rënie në më shumë se një dekadë, në vetëm 42 nga 100.

“Shumica dërmuese e shteteve kanë dështuar që ta mbajnë nën kontroll korrupsionin: 122 nga 182 shtetet janë vlerësuar me nën 50 pikë në indeks”, tha Transparecy International.

Po ashtu, numri i shteteve që vlerësuar me mbi 80 pikë ka rënë nga 12 sa ishin një dekadë më parë në vetëm pesë këtë vit.

“Në veçanti, një trend shqetësues i përkeqësimit i korrupsionit në demokraci – nga Shtetet e Bashkuara (64), Kanadaja (75) dhe Zelanda e Re (81), e deri në disa pjesë të Evropës, sikurse Mbretëria e Bashkuar (70), Franca (66) dhe Suedia (80)”, u tha nga kjo organizatë ndërkombëtare.

Sipas indeksit të këtij viti, në krye të tij është Danimarka, Finlanda dhe Singapori, sikurse ishin edhe vitin e kaluar. Ndërkaq në fund të listës, të renditura më së keqi janë Venezuela, Somalia dhe Sudani.

Transparency International thotë se të dhënat që përdoren për përpilimin e indeksit mbulojnë këto forma të korrupsionit në sektorin publik: ryshfeti, keqpërdorimi i fondeve publike, përdorimi i funksioneve publike nga zyrtarët për përfitime personale pa u përballur me pasoja, aftësia e qeverive për të frenuar korrupsionin në sektorin publik, burokracia e tepruar që mund të rrisë mundësitë për korrupsion në sektorin publik, emërimet politike në shërbimin civile, ligje që u mundësojnë zyrtarëve publikë të mos e deklarojnë pasurinë apo konfliktet e mundshme të interesit, mbrojtja ligjore për personat që raportojnë rastet e ryshfetit dhe korrupsionit, kapja e shtetit dhe qasja në informacione mbi çështje publike dhe aktivitete të Qeverisë.

Ndërkaq, ky indeks nuk mbulon perceptimin e qytetarëve për korrupsionin apo përvojën e tyre me këtë dukuri, mashtrimet me tatime, rrjedhjet e paligjshme të financimeve, personat që mund të ndihmojnë në kryerjen e veprave korruptive, pastrimin e parave, korrupsionin në sektorin privat dhe ekonomitë dhe tregjet joformale./rel