Cyrihu planifikon zgjerimin e rrjetit të tramvajit drejt Affolternit

Qytetarët do të votojnë për projektin 160 milionë frangash që synon përmirësimin e transportit publik në një lagje me rritje të shpejtë

Qyteti i Cyrihut po planifikon ndërtimin e një linje të re tramvaji për të lidhur lagjen Affoltern me rrjetin ekzistues të transportit urban. Për shkak të rritjes së madhe të popullsisë në këtë zonë, projekti është dërguar në votim dhe qytetarët do të vendosin më 14 qershor, përcjell albinfo.ch.

Sipas planit, linja 11 e tramvajit do të zgjatet nga ndalesa Brunnenhof deri në Holzerhurd, duke krijuar një lidhje të drejtpërdrejtë të Affolternit me qendrën e qytetit, përfshirë stacionin kryesor të trenit, rrugën Bahnhofstrasse dhe zonën e liqenit të Cyrihut. Pjesa më e madhe e itinerarit do të kalojë në një shirit të dedikuar në mes të rrugës Wehntalerstrasse, i cili në disa segmente do të gjelbërohet.

Me këtë projekt, linja aktuale e autobusit 32, që aktualisht shërben për lidhjen me Affolternin, pritet të zëvendësohet. Ky autobus do të shkurtojë itinerarin dhe do të përfundojë në Bucheggplatz, për shkak të kapaciteteve të kufizuara nga rritja e numrit të udhëtarëve.

Autoritetet e qytetit theksojnë se projekti është i domosdoshëm për të rritur kapacitetin e transportit publik dhe për të përmirësuar stabilitetin dhe besueshmërinë e rrjetit. Për realizimin e tij është planifikuar një kredi prej 160 milionë frangash zvicerane, ndërsa një pjesë e financimit pritet të sigurohet edhe nga kantoni.

Nëse miratohet nga qytetarët, ndërtimi i linjës së re të tramvajit pritet të nisë në vitin 2028.

---