Tre hapat e mbetur deri te finalizimi i liberalizimit të vizave

Dje shtetet anëtare të Bashkimit Evropian, duke përfshirë edhe ato që vazhdojnë të mos e njohin Kosovën, në mënyrë unanime kanë votuar në përkrahje të heqjes së regjimit të vizave për kosovarët. Ky votim shënon njëherësh edhe një prej momenteve më të rëndësishme të procesit të liberalizimit të vizave.

Në rrugën përpara drejt finalizimit të këtij procesi kanë mbetur edhe tre hapa, të cilët janë proceduralë, meqë tashmë për procesin s’ka mospajtime politike në mes të shteteve anëtare.

Pas votimit të djeshëm, hapi i radhës është që përfaqësuesit e tri institucioneve të BE-së, Parlamenti Evropian, Këshilli dhe Komisioni, të nënshkruajnë aktin ligjor.

Në momentin që përfundohet ky hap, atëherë mbetet procedura e publikimit në gazetën zyrtare, bashkë me datën e hyrjes në fuqi të ligjit dhe hapi i tretë ose i fundit është hyrja e liberalizimit të vizave në fuqi.

Kjo do të ndodhë jo më larg se data 1 janar 2024, derisa për atë se kur do të jenë në gjendje që kosovarët të lëvizin lirshëm në Zonën Schengen varet nga sistemi ETIAS, për të cilin po bëhen përpjekje për të funksionalizuar.