Ministri gjerman i mbrojtjes: Nuk ka tërheqje nga Kosova

"Gjendja në Kosovë vazhdon të mbetet, pa ndryshime ,e vështirë", ka thënë de Maizière sot në Bruksel

Ministri gjerman i mbrojtjes, Thomas de Maiziere ka përjashtuar mundësinë e tërheqjes së shpejtë të trupave gjermane nga Kosova. Ai këtë qëndrim e ka arsyetuar me gjendjen jo të qetë në veriun e Kosovës. “Gjendja në Kosovë vazhdon të mbetet, pa ndryshime ,e vështirë”, ka thënë de Maizière sot në Bruksel.

Këtë deklaratë e ka dhënë në margjina të takimit të ministrave të mbrojtjes të shteteve të NATO-s, në të cilin, në rend dite ishte angazhimi i KFOR-it në Kosovë.

“Unë nuk shoh në këtë moment asnjë mundësi për të tërhequr trupa tjera prej atje”, njoftojnë mediet gjermane të ketë thënë ministri gjerman i mbrojtjes.

Në mesin e trupave të KFOR-it, gjermanët përbëjnë grupin më të madh. Aktualisht në Kosovë shërbejnë mbi 1300 ushtarë gjermanë.