Shqipëria

Nga bora e madhe, mbyllen shkollat në Qarkun e Korçës

Shqipëria është përfshirë këto ditë nga reshje të dendura dëbore, duke vështirësuar qarkullimin dhe duke krijuar kufizime për komunitetin në disa prej qarqeve.

Ministria e Mbrojtjes e Shqipërisë, përmes Drejtorisë së Përgjithshme të Emergjencave Civile si dhe Shtabi i Përgjithshëm i Forcave të Armatosura janë në kontakt të vazhdueshëm me 5 ministritë e linjës për t’u dalë në ndihmë qytetarëve, përcjell albinfo.ch.

Mbi dy mijë efektivë të Forcave të Armatosura, Policisë së Shtetit, punonjës të OSSHE-së dhe të shëndetësisë janë në gatishmëri të plotë për t’iu gjendur pranë banorëve për çdo problem. Në qarkun e Korçës, që përfshin qytetin e Korçës, Pogradecin, Devollin dhe Ersekën, do të mbyllen të gjithë shkollat shkaku i reshjeve të borës. Drejtoria Arsimore Rajonale në Korçë ka thënë se moti ka pamundësuar zhvillimin normal të procesit mësimor.

Edhe kryeministri i Shqipërisë, Edi Rama, thekson se të gjitha strukturave shtetërore janë angazhuar maksimalisht për të qenë pranë njerëzve dhe për të lehtësuar situatën e vështirë të krijuar nga reshjet e dendura të dëborës.