Kosova

O’Conell: Ndryshimi i kufijve nuk do të sjellë fundin e tensioneve

Ambasadori britanik në Kosovë, Ruairi O’Connell, në një intervistë për mediumin “Euronews” ka folur rreth dialogut mes Kosovës dhe Serbisë.

O’Connell beson se janë dy arsye pse serbët në Kosovë ende nuk janë integruar në shoqëri. E para, sipas tij, për shkak të mungesës së një marrëveshjeje gjithëpërfshirës mes Prishtinës dhe Beogradit.

“Ekziston një shkallë e së vërtetës dhe shkallë e drejtësisë që nevojitet për të gjithë që të ecin përpara”, u shpreh ambasadori, transmeton Indeksonline, përcjell Albinfo.ch.

Ndërsa e dyta, sipas O’Connell, është sundimi i përshtatshëm i ligjit.

Tutje, ai tha se një ndryshim i kufijve nuk do të sjellë fundin e tensioneve. Ambasadori beson se duhet të ketë partneritet të vërtetë dhe miqësi nëse duan të përfundojnë tensionet.

“Ka një numër traumash të thella që dolën nga luftërat dhe lëvizja e kufijve nuk do të adresojë këto brenda dy vendeve që do të vazhdojnë të mbesin fqinjë, duhet të synohet një e ardhme që nuk është antagonizëm mbi kufi të ri, por një partneritet i vërtetë dhe miqësi në të ardhmen”, u shpreh ambasadori.

Kurse për takimin në Berlin, O’Connell nuk pret përparim të madh në negociata, por ai shpreson që palët ta përdorin këtë mundësi për të “rivendosur”.