Lajme

Shqipëria në konferencën ekonomike nga Integra International

Gjatë panelit të dedikuar ambasadorëve të akredituar në Uashington DC të Shqipërisë, Zelandës së Re dhe Botsvanës, me qëllim promovimin e mundësive të investimit në vendet e tyre respektive, ambasadorja Floreta Faber bëri një përmbedhje informuese gjithëpërfshirëse mbi evoluimin e ekonomisë së vendit tonë që prej vitit 1990 dhe deri në aktualitetet.

Gjithashtu ajo vuri në dukje avantazhet që ofron vendi ynë si, pozita strategjike gjeografike, baza ligjore favorizuese për investimet e huaja, fuqia punëtore e arsimuar, prodhuese dhe kosto-konkurruese, ekonomia e fortë dhe e qëndrueshme si edhe politikat fiskale optimale dhe konkurruese në rajon, transmeton albinfo.ch.

Po ashtu, ambasadorja ftoi pjesëmarrësit të shohin mundësinë e investimit në Shqipëri në sektorët kyç si energjia e rinovueshme, industria e minierave, fasoneria si edhe turizmi, tashmë prioritet i Qeverisë shqiptare, konkretizuar edhe me politikat atraktive dhe favorizuese në këtë sektor.

Gjithashtu, ajo argumentoi interesin ekonomik, por edhe nevojën e një prezencë më të gjerë të kompanive amerikane në pikat kyçe të industrisë sonë, të cilat duhet të jenë në përputhje me marrëdhëniet e shkëlqyera që karakterizojnë dy vendet tona. Pjesëmarrësit patën rastin të njiheshin me projektet konkrete të investimit që ofron vendi ynë, të cilat iu shpërndanë pjesëmarrësve në takim.​

Duke qenë se Integra International është një asociim ndërkombëtar financiar me rreth 4.500 anëtarë nga e gjithë bota, profesionistë në fushën e kontabilistëve, konsulencës financiare dhe ekspertëve ekonomikë të tregut ndërkombëtar, kanë për qëllim këshillimin e biznesit në vende të ndryshme të botës.

Vlen të theksohet se në këtë aktivitet morën pjesë rreth 150 individë, përfaqësues kompanish dhe ekspertë të fushës kryesisht nga SHBA-ja, por edhe nga shumë vende të Evropës (Gjermania, Austria Spanja, Norvegjia etj.), por jo vetëm.​  /Albinfo.ch.