Prishtinë: Ndërtimet pa leje do të rrënohen nga kompania e re

Rrënim i objekteve të ndërtuara pa leje, është duke u cilësuar si procedurë urgjente në Prishtinë

Drejtori i Inspektoratit në Komunën e Prishtinës, Adonis Tahiri, po zhvillon ‘luftë të ashpër’ me ndërtimet pa leje në kryeqytet.

Tahiri është zotuar se fat i njëjtë do t’i prsët të gjitha objektet për të cilat veprohet ndryshe me ligjet në fuqi.

Thuhet se javë më parë Kuvendi i Komunës së Prishtinës kishte hapur tenderin për rrënim të objekteve të ndërtuara pa leje, duke e cilësuar si procedurë urgjente.

Duhet theksuar se për tenderin me titull “Rrënimi i objekteve të ndërtuara pa leje – procedurë emergjente”, me vendndodhje “Në Prishtinë sipas kërkesave të zyrtarëve të Autoritetit Kontraktues”, fillimisht ishte parashikuar të shpenzoheshin 45.000 euro.

Pas tenderit është bërë e ditur se kishin aplikuar tre operatorë ekonomikë që kishin ofruar çmime më të vogla se shuma e paraparë, e deri tri herë më të madhe se ajo.

Në njoftimin e bërë publik në faqen zyrtare të Komisionit Rregullativ të Prokurimit Publik, thuhet se shuma më e ulët e ofruar ishte 31.480 euro, ndërsa më e larta 127.100 euro.

Fituese ka dalë “AGRO INVEST 1 ” SH.P.K. nga Komuna e Suharekës, e cila edhe ka ofruar çmimin më të ulët, shkuan arbresh.info.

Kujtojmë se muaj më parë Drejtoria e Inspektoratit në Komunën e Prishtinës ka rrënuar disa kate të objekteve që nuk e kanë respektuar vendimin e komunës për ndërtim, përcjell albinfo.ch.

---