Prishtinë: PDK-ja e shkëput koalicionin me LDK-në

Partia Demokratike e Kosovës e ka shkëputur nga sot koalicionin qeverisës në Komunën e Prishtinës.

Lajmi është bërë i ditur nga nënkryetari i Partisë Demokratike të Kosovës, Uran Ismajli, i cili ka deklaruar se e ka dërguar shkresën zyrtare te kryetari i Prishtinës, Përparim Rama, teksa njoftoi se drejtorët e drejtorive komunale dhe aksionerët e PDK-së në ndërmarrje publike kanë dhënë dorëheqjet e tyre.

”Në mbledhjen e jashtëzakonshme të Kuvendit Komunal të Prishtinës sot PDK mundësoi kuorumin dhe votoi pro shfuqizimit të vendimit për këmbimin e dëmshëm të pronave në Badoc. Sapo dërgova shkresën zyrtare tek Përparim Rama për të komunikuar vendimin për shkëputjen e koalicionit qeverisës në Prishtinë. Drejtorët e drejtorive komunale dhe aksionerët e PDK-së në ndërmarrje publike kanë dhënë dorëheqjet e tyre”, ka shkruar ai, transmeton albinfo.ch.

Ismajli u shpreh se ekipi i partisë së tij, për dy vjet ka bërë një punë të jashtëzakonshme në secilin dikaster.

”Për dy vjet shërbim, ekipi i PDK-së solli një dinamikë të re në Kryeqytet dhe ka bërë punë të jashtëzakonshme në secilin dikaster. Nën udhëheqjen e shkëlqyer të Nënkryetares Sahatçiu, drejtoritë e udhëhequra nga PDK-ja janë vlerësuar si drejtoritë me performancën më të mirë, brenda dhe jashtë. Gjallërinë, sinqeritetin, pozitivitetin dhe dinamikën që e kishim në fushatën tonë “Prishtina na bashkon” e kemi përçuar edhe në qeverisjen e Kryeqytetit dhe qytetarët janë dëshmitarët më të mirë për këtë gjë. Ne nuk do të jemi pjesë e një qeverisjeje që dëmton interesin publik, ku mungon komunikimi, ku puna e mirë nuk vlerësohet dhe meritokracia përbuzet. Duke mos dashur asnjëherë që Prishtina të bllokohet, jemi tërhequr nga të gjitha pozitiat për të hapur rrugë për krijimin e një shumice të re në Kryeqytet”, ka shkruar ndër të tjera ai.