Qeveria po kërkon mundësitë për regjistrim të diasporës

Republika e Kosovës e ka më se të nevojshëm posedimin e shifrës zyrtare të shtetasve të saj që jetojnë në diasporë, e cila në regjistrimin e fundit të popullsisë së Kosovës ka mbetur jashtë regjistrimit të rregullt.

Për këtë Ministria e Diasporës ka publikuar së fundmi një iniciativë për regjistrimin e diasporës, e cila sipas Ministrit, Ibrahim Makolli, ka për qëllim që të ofrojë numrin zyrtar të shtetasve të Kosovës që jetojnë në diasporë e që si projekt do të ndihmojë edhe në hartimin e politikave.

“Pas regjistrimit të fundit është parë se rreth 25 për qind e qytetarëve të Kosovës jetojnë jashtë vendit, që kanë migruar në periudha të ndryshme kohore dhe për të pasur një përkujdesje institucionale ndaj tyre është më se i nevojshëm regjistrimi i tyre për të ditur se ku janë të koncentruar, cili është kapaciteti i tyre”, ka thënë ministri për Kohen Ditore.

Sipas tij, elementi kryesor është që të dihet numri i tyre që ka shumë rëndësi për institucionet, sepse ndihmon në hartimin dhe zbatimin e politikave për ta.

Ai ka theksuar se dikasteri të cilin e drejton është duke analizuar alternativat sesi do të bëhet regjistrimi.

“Jemi në fazën e studimit të modaliteteve sesi do të shkojë ky proces përmes ambasadave, konsullatave apo përmes bashkëpunimit me institucionet e tjera, në mënyrë që të kemi mundësinë për të pasur një regjistër të plotë të mërgimtarëve tanë”, ka theksuar Ministri Makolli.