Shqipëri: Nga nesër nis aplikimi i dozës së tretë të vaksinës anti-Covid

EPA/ETIENNE LAURENT

Komiteti Teknik i Ekspertëve ka vendosur që vaksina përforcuese do të aplikohet për qytetarët të cilët janë mbi 60 vjeç dhe tek ata persona që kanë mbi 6 muaj nga marrja e dozës së dytë.

Gjithashtu ekspertët kanë marrë vendim edhe për uljen e moshës së vaksinimit, referuar eksperiencave ndërkombëtare, deri në 16 vjeç dhe 12 vjeç për fëmijët me probleme shëndetësore. Por ekspertët kanë saktësuar se prioritet vijon të mbetet vaksinimi i popullatës me dy dozat e para të vaksinës.

Procesi i vaksinimit masiv po vijon në pikat e përqëndruara te vaksinimit, në qendrat shëndetësore, poliklinika si dhe nëpërmjet njësive të lëvizshme në komunitet në kuadër të aksionit kombëtar ” Derë më derë”, raporton Atsh, përcjell Albinfo.ch.

Prej fillimit të vaksinimit janë kryer në total 1,900,000 doza të vaksinës ndaj COVID19. Prej tyre rreth 885,613 qytetarë i kanë kryer të dy dozat e vaksinës antiCOVID.

Vaksinimi është i hapur dhe të gjithë qytetarët mbi 18-vjeç mund të paraqiten me kartën e identitetit në qendrën e tyre shëndetësore, në poliklinika ose në qendrën më të afërt të vaksinimit, çdo ditë, nga 08:00-20:00, për të kryer vaksinën antiCOVID. Deri tani kanë mbërritur në vendin tonë 2,496,960 vaksina antiCOVID.