Lajme
Shqiptari Kaltrin Murati fiton çmimin “Polici i vitit” në Vjenë
Në një votim online, me afër 70 mijë vota, shqiptari Kaltrin Murati zgjidhet polic i vitit në Vjenë, raporton albinfo.at
Çdo vit gazeta austriake “Krone” nominon në një garë gjashtë policë, të cilët me punën dhe angazhimin e tyre kanë treguar suksese në mbrojtjen dhe sigurinë e popullatës në Vjenë. Me anë të votimit online, lexuesit e gazetës përgjatë një muaji mund të zgjedhin pastaj policin e tyre të preferuar. Më pas, gjatë një mbrëmje gala, bëhen të ditura rezultatet si dhe ndahen çmimet, shkruan albinfo.at.
Të mërkurën, më 13 mars, në Bashkinë e Vjenës, Rathaus, në mesin e 400 mysafirëve u ndanë edhe çmimet e “Oscar për policë të vitit”, të cilat u ndanë në gjashtë kategori, dhe dy çmime speciale, përfshirë edhe çmimin kryesor për Policin e vitit. Trofeu për policin më të mirë në Vjenë, me afër 70 mijë vota, e fitoi inspektori shqiptar, Kaltrin Murati.
Polici Murati këtë çmim e fitoi për arritjet e tij të sukseshme në luftën kundër kontrabandave dhe trafikantëve të drogës.
Inspektori policor, pas pranimit të çmimit, i emocionuar, theksoi: “Faleminderit! Ky çmim do të thotë shumë për mua. Secili nga kolegët e mi gjithashtu do ta meritonte”, shkruan krone.at, transmeton albinfo.at.
Ministri i Brendshëm, Gerhard Karner (ÖVP) dhe shefi i Policisë së Vjenës, Gerhard Pürstl, falënderuan të gjithë policët për angazhimin e tyre të madh dhe theksuan bashkëpunimin e mirë midis qeverisë federale dhe Vjenës për çështjet e sigurisë.
I kontaktuar nga albinfo.at, polici Murati shprehet shumë i lumtur për këtë çmim.
“Jam shumë i lumtur. Është një vlerësim shumë i madh që bëhet për punën time. Falënderoj gjithë popullatën e Vjenës për votën dhe besimin ndaj meje. Do të angazhohem sa më shumë që të jem në shërbim të popullatës, që Vjenën ta bëjmë një qytet të sigurt për secilin banor”, ka theksuar ai.
Polici Kaltrin Murati është i lindur në Vjenë, por me prejardhje nga Tetova. Babai i tij kishte migruar në Austri që në moshë të re. Kaltrini shërben në Policinë e Vjenës që nga viti 2015. Aktualisht është i stacionuar në “Stadtpolizieikommando”, në stacionin e policisë në Stumpergasse në Qarkun 6, në Margareten, kurse shërben në qarkun 4,5 dhe 6. Puna e tij është mbikëqyrja e rendit, komunikacionit dhe lëndëve narkotike
Gjatë karrierës si polic, Kaltrini ka fituar disa mirënjohje për punën dhe sakrificën e tij, ndërsa për këtë çmim ai ishte i nominuar edhe dy herë të tjera.
Të tjera nga Lajme
E-Diaspora
-
Shqiptarja e veshur me xhubletë diplomon në Universitetin prestigjioz në SHBA Mary Camaj në ditën e saj të diplomimit ka veshur xhubletën, duke marrë kështu pjesë në...
-
Kryeministri i Kosovës sërish me thirrje për qytetarët e Kosovës dhe ata në diasporë që të regjistrohen
-
ASK: Mbi 1.4 milionë qytetarë të regjistruar, mbi 400 mijë nga diaspora
-
Rama njofton për programin e veçantë për emigrantët që duan të investojnë në Shqipëri
-
400 mijë të regjistruar përmes platformës e-diaspora
Jeta në Zvicër
-
74 punonjës të Pfizer në Zug kërcënohen me largim nga puna Pasi mori përsipër specialistin e kancerit Seagen, i cili ka një degë në Zug, Pfizer zbuloi...
-
I akuzuari për tregti me drogë: “Jam eksploatuar nga bosi im në Shqipëri”
-
A mund të marr nënshtetësinë zvicerane dhe të lëviz menjëherë jashtë vendit?
-
Trashëgimia në Zvicër: Ligjet e shtetit duhet të ndjekin shtetasit e dyfishtë?
-
Historia e Nemo-s që fitoi Eurovizion-in